حَلا⋆ ִֶָ ๋

كنت مفكرة انو ما رح نوصل مع انو ما بعرف وين كنا رايحين
قرايبينا بحمص كلن طلعو من بيوتن و الجماعة اللي كنا معن رايحين ع ضيعتن بالساحل
كنا يمكن نروح معن
بس انقطعنا بنص الطريق بأول طرطوس
بس طلعت القطعة بنص هالطريق خير علينا الف الحمدلله
(و صار في كتير احداث ما رح اذكرها )
رجعت ماما هي واخي ع بيتنا لقيته مسروق
بهاد اليوم كلشي طلع من بيته
بيته انسرق
بيوت اقرايبيني كلن انسرقو حتى الشبابيك سارقينا
مين الي سرق؟
الجيران و الضيع المجاورة ..
طبعاً تركنا بيت المساكن
ما ضل حدا ضل فيها اصلاً بالزور جماعة الهيئة خلو العالم تاخد غراضها في عالم ما خلوهن ياخدو غراضن
البيوت تبع المساكن تقسمت و عباب كل بيت انكتب اسم امير او قائد من جماعة الفصائل
الترهيب للناس الي رجعت ع بيوتها بالمساكن كتير مقرف
صارو يفوتو ع البيوت بنص الليل و طبعا طول الوقت قواص
و بيقولولها لماما هاد بيتك لا تطلعي منو .. كيف يعني ؟؟بعد هالترهيب الي عم يعملوه بدن نضل
يعني عم يطفشو العالم بالغصب فالعالم طلعت اجباري عنها
وفي واحد من الهيئة قالها لماما انو نحنا ما منقتل بس العالم اللي رح تجي من ادلب هدول ما عندن رحمة بيقتلو و بيدبحو و ما بيردو ع حدا و محدا بمون ع التاني بيعملو الي بدن ياه حتى ع الجولاني ما بيردو
بفجرو حالن بين العالم انو في سبيل الله.
يعني ما بعرف شو قول !!

ما كنت متوقعة ارجع ع الشام بعد هديك الليلة
بس رجعت
وكل شي كان ببكي بهديك الليلة
الشهر كلو كان ببكي
بس ما بكيت ابداً بلحظتها
ما كنت عم استوعب شي وكنت طول الوقت خايفة
الكذب الي كنا عايشين فيه طول الوقت
المعتقلات .. المعتقلات الي تحت جامعتي
الجرائم و المجازر
كل ما شوف اسماء عالم مساجين اقرأهن
لوائح اسماء العالم الي كانت بالمعتقلات اقرأهن
بلكي كان اسم بابا بيناتهن
ما قدرت ما اقرأ الاسماء رغم اني بعرف انو ما رح لاقيه
بعد اللي صار قطعت الامل انو هو موجود
خلص استشهد عنجد
الطرفين قتلوه
ما بقى دور عليه

رفقاتي اللي اخواتن كان بالثورة و استشهدو وانا ما بعرف
العالم اللي بعرفها و رفقاتي وستورياتهن عن انو تحررنا و العلم الاخضر
ما عم استوعب
معقول كلن كانو بيعرفو انو حياتنا كذبة
حياتي انا كذبة
ما كنت عم استوعب شي
انا
اقلية
فلول نظام
شبيحة
ابنة قتيل
!!!؟
ومتل كتار ما كنا مستفيدين ع زمن بشار بالعكس خسرنا كتيير
وهلأ كمان نفس الشي
و في شغلة بتضحك بدي قولها
انا سجلت جامعة ع مفاضلة ذوي شهداء
وكل ما حدا يعرف مجموعي او معدلي يستغرب انو كيف .. فقله مفاضلة ذوي شهداء
يروح الاستغراب و عادي
بس في مرة وحدة قالتلي نيالك
لهلأ ما بنسىى
انو كيف نيالي يعني انو ما عندي اب مثلاً ؟؟
ما بيفكروا قبل ما يحكو ما بيفكروو
و العالم المعاقة هلأ اللي عم تقلي انو منيح نفدتي و سجلتي بالجامعة قبل ما يسقط
انو انا كنت المستفيدة عزمن بشار
بحب قلك رجعولي أبي و ما بدي منكن شي ..
انا محدا بيعوضني عن أبي و عن كلشي عشته بغيابه لو تعطوني سوريا كلهاا ..

انا حلا عمري ٩ سنين
اليوم قالوا انو بابا استشهد ..كان ضابط بالجيش بالفرقة الرابعة
قالولنا انو كانو محاصرين و هجموا عليهن ع الحاجز
في منن استشهدو وفي منن قدر يهرب
قالولنا انو كانو ناطرين الدولة تبعتلن دعم لانو ما ضل معن ذخيرة و هنن محاصرين مو قادرين يعملو شي .
بس الدولة ما بعتت شي و لا بعتت حدا !
قالولنا كمان انو ما بيقدروا يجيبو جثمان بابا ..
في كتير شغلات قالولها كمان كل ما نسأل حدا من رفقاته او الضباط الي كانو معو كل حدا يحكي شكل ..
رفيقه قال انو دفنوه هنيك لانو المنطقة خطرة وما بيقدرو يجيبوه _رغم انه في شباب كانو معه استشهدو وجابو جثمانن_
و حدا تاني قال انو زتو عليه قنبلة كان جنب سيارته و انفجرت السيارة ومات..
في حدا قال انو شافه مقطوعة رجله جنب سيارته
يمكن قتلوه او اخدوه اسير لانو اخدو كتير شباب ..
و حدا قال قطعوله راسه وعلقوه ع الحاجز ...!
بس انا ما صدقت انو استشهد و عم استناه يرجع لانن كلن كذابيين .
سنة ورا سنة و انا عم دور عليه بكل مكان وين ما رحت وقت امشي بالطريق اتطلع كتير حواليي يمكن شوفه
وقت كون بالسرفيس بحاول راقب كل العالم الي برا بالطريق يمكن لاقيه قول لحالي يمكن شوفه
كتير استنيته بكل مناسبة قول رح يجي اليوم وما يجي ....
هاد الامل ضل مرافق عيلتنا ٤ سنين تقريبا
ماما فقدت الامل بعد ما صارو يطلعو مساجين ويعملو مصالحات وهو ما طلع
انا ما بقرأ له الفاتحة و لا بقول الله يرحمه (يمكن غلط هاد الشي بس ..)
بحسه موجود مو معنا بس موجود و عايش ..
وقت يسألني اي حدا ابوكي وين او ابوكي شو بيشتغل
ما بعرف شو قله ..
كانت كلمة استشهد كتير تقيلة عليي غير اني مو متقبلة الموضوع
بس فكرة انو هو دافع عن هاد البلد وهدر دمه ما كنت اتحملها
بضل قول بيني و بين حالي تركوهن محاصرين ما فرقت معن كانو بيقدرو يأنقذوهن بس ما عملو هيك تركوهن.. بعتوهن عالموت وما فرقت معن
وما بتفرق معن .

كرهت كل سوريا و كل العالم و قرفت من العيشة بهالبلد وكل ما اوعى واكبر اكتر اكره اكتر

صار عمري ١٩ سنة
قالو انو تحررنا بس انا ما بعرف من شو ..
قبل التحرير بيوم
طلعنا من بيتنا لانو نحنا ساكنين بمساكن عسكرية (مساكن الفرقة الرابعة)
رحنا لعند قرايب عالم منعرفهن بالمزة
ع اساس نرجع ع البيت تاني يوم الصبح بس ما رجعنا ..
و قالولنا سقط النظام و تحررنا !!
كانت اسوأ ليلة لانو ما بعرف شو عم يصير
تركنا الشام و ما بعرف وين كنا رايحين
الي بعرفه كنا خايفين .. العالم كلها كانت خايفة
الشام بهي الليلة كانت كتير بشعة
اصوات رصاص و تخريب و ترهيب
وخوف
الطريق من الشام لحمص مفروش بدلات عسكرية و اسلحة
الطريق كان كتير بشع
نحنا كنا رايحين باتجاه حمص الطريق اللي جنبنا الي رايح ع الشام كان كلو ارهابيين
الشي الوحيد الي كنت عم فكر فيه انو بابا وين معقول يكون معن؟ او هدول هنن الي قتلوه ؟
كانو ارهاب دواعش
كل افكارنا عن انو داعش و الارهابيين مين؟
كانو هنن اللي عم شوفهن
الرايات السود
ملثمين و الن دقن
و شكلن بخوف
هي الصورة المطبوعة براسي عنن من الاخبار و المسلسلات و الافلام العربية او الاجنبية
نفسن نفسننن ..
الطريق كان كتير بشع
كان كله سيارات
السيارة عم تمشي بسرعة الشخص الي عم يمشي جنبها
كانو عم ينزلو بعض العالم من سيارتهن و اخدو السيارت و خلو العالم تمشي
اطفال و نساء و رجال وكلو .
ما بعرف ليش بس طول الطريق وانا قول الحمدلله بابا مو معنا رغم اني كنت خايفة و
بحاجة اله و بحاجة للامان
بهداك اليوم رجعوني لعمر ٩ سنين ..
طول الطريق وهنن عم يسبو العالم و يقوصو
في شغلات ما بتروح من بالي ...
كان في تنين ارهاب منزلين واحد من سيارته و مخلينه يركع ع ركبه
وهو عم يقلن: والله ماني ضابط والله
وهو يقله :خراس ولاك
في واحد منن قله للتاني شوف شغلك (يمكن هاد كان اعلى رتبة )
لانو رد عليه التاني ب: يا سيدي والله حرام..
ما خلاه يكفي و قله: متل ما قلتلكك
ما بعرف شو صار فيه لهاد العمو كنت عم ادعي بس انو ما يكون معه ولاده و زوجته
كان في كتير عساكر
كانو مقعدينن ع الارض بعيد شوي عن الطريق و اديهن لورا و وجهن للجهة التانية
وكان في شي ٥ اشخاص ما بعرف اذا عساكر او ضباط او عالم مدينة
عم يزحفوهن ع الارض و يقوصو عليهن من الجهة التانية من الطريق
يعني الرصاص عم يمر من فوقنا
ما بعرف شو هالاستعراض المقرف الي كان
ما بعرف اذا مات حدا منن
بس بعمري ما رح انسى هالموقفين ..
الطريق كان كتير بشع و بخوف
كنت طول الوقت عم ادعي للعالم
انو محدا يموت منن و يارب امن مخاوفن
و قلت الحمدلله انو رفيقتي ما طلعو من بيتن و يارب ما يطلعو مشان ما تشوف الي عم شوفو هلأ

بكرا وقت توقف قدام الله و يسألك ليش قتلت هي الروح شو بدك تقله ؟؟ فلول نظام !!!

الي عمله بشار ١٤ سنة تحت اسم القومية
عم تعملوه نفسه ذاته بس تحت اسم الاسلام

يارب ما تخليني اخسر ايماني ❤️

ارهاب ..
كل حدا فِرح و شمت باللي صار اليوم ارهابي .

عقلي مو متحمل انو في عالم مبسوطة باللي صار

يا الله عقدة الذنب اني عايشة حتضل ملاحقتني طول حياتي💔💔💔

١٤ سنة اصوات رصاص و انفجارات
١٤ سنة دم و حرب
١٤ سنة و ما شبعو

دم الشهداء وكل انسان
وكل الاحلام و الامنيات
و كل الدموع و الضحكات
كلن خسارةة
هالبلد ما بتستاهل ..

خسارةة خسارة بهالبلد كلشي

النا الله

نفسي وقت موت
موت مقوصة براسي