الشاعر محمد الظالمي

واغريبا واحسينا
عمرك مو مثل عمري ييمه
صدرك مو مثل صدري ييمه
واحسينا واغريبا

______________

يمه يابعد روحي زغيره اوياكم اجروحي
بس انه اعترف يمه ولا بطل الك نوحي

المثلك ينثر احساسه لا مو ينسحگ راسه
تچويك الشمس يمه واصيحاً وينه عباسه

انت غالي بعيوني لذالك بيها لطموني
اتمنه يبعد امك انه الي يسحگوني


واغريبا واحسينا
واحسينا واغريبا

_______________

اي والله العطش يذبح وسهم البگلب يجرح
وشيبك بالهوا يمه على العساله يتمرجح

يمه والرمح قاسي حَسيته شلع راسي
اتدور النفس يمه يريت انگطعت انفاسي

ادخيل الزهرة عالزهره وابني شيبته حَمره
شلون انظرلك وانت تلعب فوگك العشره

واغريبا واحسينا
واحسينا واغريبا


________________

يوليدي الشمر سيفه ياخذ زينب ابكيفه
زينب بالحبل يمه يجرها ويأخذ بحيفه

ويلي الخيمه من تلهب تركض بالوعر زينب
يدفعها الزجر يمه لحد ماتوگف وتتعب

انه ادري إشيمر بيها الشوج مأذي رجليها
تركض عالنحر يمه تريدك يبني تحميها

واغريبا واحسينا
واحسينا واغريبا

________________

مدري شنسه لو اذكر بالله اگبالي بس أشر
اوگف يا حبيب امك خل اللطم على الخنصر

يمه واعتني بشعرك منه الخولي ويجرك
ياذيك الرمل يمه من يلعب على نحرك

قليلة وياكم الشهگه وانت شفتك زرگه
اخ من العطش يمه گلبك ضامي ويحرگه

واغريبا واحسينا
واحسينا واغريبا

________________

ما ادري السمه تقبل زينب تركب الهزل
وبسبي الزجر يمه وعليها الحادي يتمرجل

أبنياتي شذنب عدهن بحبال الشمر شَدهن
عينك عالظعن يمه كل ديره تره ضدهن

الشام وحسرتي يمها وبالسوگ الظعن همها
زينب بالحجر يمه يضربوها ونزل دمها


واغريبا واحسينا
واحسينا واغريبا



الشاعر محمد الظالمي

سافرت عنكم ضوه غيمه ودفع بيها الهوه
ما أعتقد نرجع سوه حبيبي

____________________













ياعلي اْو كلك غيرة يالفزعتك عشيرة
الكون كله ابعينك والدنيا هم أسيرة

عشت بحياتك انسان ملك الانس ملك الجان
الدنيا نعم سفينه وانت عليه الرُبان

مالكني ملك التكوين بحساسي حاء انت وسين
وبفاطمة ياء ونون كملت حروف الحسين


ضرغام حته ابمشيتك ترعب الدنيا بخزرتك
بس الي تنزل دمعتك حبيبي


___________________




مالي اعله گلبك اعتاب اني اللذت خلف الباب
ما ردت واحد يشوف وخليت بابك احجاب

مره بحياتك ارتاح وانساني وانسه الاجراح
انت بحياتي شجرة ابگلبي غِرست السباح

بَخَرت بيتك اهواي الزهرة وأگلك مولاي
هنيالي بيك الغالي تمشي ورش بيدي الماي


ياحيدر واسمك مدد معناك من جدَ وجد
من المهد إلى اللحد حبيبي


_______________________




اني اعله مودك أوياك بيمن اصلي وانساك
صدگني يابو الحسين أهواك والله أهواك

لاتنجرح لا تحتار غير انت عندي الكرار
ممنونه منك حيدر عشنه ابساطة الدار

طَير انت بالدنيا طِيّر خير ونسوك اهل الخير
منهو البقه صديقك وتسولف انت ويالبير


لسه بعدنه اعله البعد ماماتت اخدود الورد
شماترحل الگلبي ترد حبيبي

_____________________






عشت ابجمالك أحلام صارت ليالي وايام
هسه بقيت ابوحدك ماتگدر ابدوني اتنام

مِستحيه منك والله خليتك بس الآه
يا يا الحسن سامحني ضلعي ولاظن تنساه

تمشي واباوعلك دوم هم يجي ونتفارگ يوم
صارت حقيقة هسا ومن عندي صاير محروم


نور الله بعيونك نزل حي على خير العمل
والوحشه صاحت بالخجل حبيبي

____________________





عشنه على عش ازغير بس هو عند الله چبير
امسح جبينك مرات ومن عنده يوگعلي الخير

يالتارس الدنيا احساس شيبت شيب البالراس
مرات اشوفك مجروح مرات اشوفك عباس

لا تهتم ابحرگ الباب معذور يا أبو اتراب
هو انت مو مالت لوم واني اسمعك أعتاب


اتحدى كل شي يمنعك والجن يصيح ويسمعك
يا ليتنا كُنا معك حبيبي


________________________




عيسى ولا چفينه لا نوح والسفينه
ما اعتقد يا يوسف توصل علي ابحنينه

جبريل خادم بيتي وعند الله عالي صيتي
وسفه احرگولي بابي ودخان يدخل ريتي

خير النسه عليهم تالي اندفع بيدهم
متواصلين اللعنه تبت يدى ابيهم


شتان بينك والسمه أتركها عندك فاطمه
متألم ومتألمه حبيبي




الشاعر محمد الظالمي

ياحُسين نور الله نورك
ياحُسين مشتاگ ازورك
ياحُسين والمس شعورك
ياحُسين

.
.
.


هايبو گلب الحنين اشگد احبك
گلبي ماريده اذا ما حَن لگلبك
صار الي چم ليلة ما جاي اعله ادربك
امنيتي كون الماي اجيبه وبيدي اشربك

كربلاء تربه عجيبه
كربلاء جثه سليبه
كربلاء حايطها سورك
ياحُسين

.
.
.


هوايه ماجيتك واحس مذنب يغالي
الفرگه مو وياك يمدبرلي حالي
اني من دونك تره مايسوه حالي
استرني يامذبوح مثل ستر الليالي

بالظلام تسمع أنيني
بالظلام انت التجيني
بالظلام تمتد جسورك

.
.
.


يامخلص نفسي من نفسي يظامي
ماشفت مذبوح انه يسمع كلامي
راح اسلم واعرف تردلي سلامي
السلام اعله الجبين السه دامي

ياذبيح يابوا رقيه
ياذبيح عينك عليه
ياذبيح فايح بخورك
ياحُسين
.
.
.
مره اذكر من اجيتك بالزيارة
ادخلوها بِسلامٍ هالعبارة
واعله باب القبله يامحله المنارة
وركض الشبابچك وگلبي اعله ناره

گلبي حيل ياريت اشگه
گلبي حيل مابيه فرگه
گلبي حيل عايز ظهورك
ياحُسين

.
.
.

كل خميس اتعودت مولاي احضره
من اشوف الگبه يامحلاها صفره
بيدي كون الزم لحيته وابقه انظره
واحسب اجروحه واعدهن طبره طبره

شبگه حيل لا ما اهده
شبگه حيل ما عوفه وحده
شبگه حيل والثم كسورك
ياحُسين

.
.
.



ها يبو اسكينه تعبت انطيني راحه
ياحبيبي اعتذر واجوا السماحه
هذا عشگك مو سهل بس للمناحه
وجهك اشلونه صدگ نشفن جراحه

اعتذر وارجع احبك
اعتذر وامشي اعله ادربك
اعتذر واشتم عطورك

ياحُسين


للشاعر محمد الظالمي

رسالة من فاطمة النحيله
رسالة عبر الزمان وجيله
رسالة الى حظن العليله

.
.
.

بسم الحُسين ابيدي العشگ الله يعشگ احسيني
هنيال روحي بشوفته يفرحني ويبچيني
ها يالعليله بوجنته شوفيها وتشوفيني
لوردتي بوسه الفاطمة تحبيها وتحبيني

حبيبي ابو الاكبر عيوني
حبيبي حياتي وماي لوني
حبيبي واگولن هم قليله

.
.
.

اقري الرسالة ابكل حذر واعرف اعيونج حمره
ليشغلچ الهم والمرض شما صرتي لونج صفره
شوفي خدوده اتأملي تاكلها رمل الصحره
شبگي الصدر يافاطمة شبگ الخيول العشره

حوافر تلعب على مچانچ
حوافر لعبة فله بحنانچ
حوافر وذاك سِنان وخيله

.
.
.

يبنيتي لحظه ركزي و فَتحي الاعيون اشويه
كلمن يلم ثوب السفر ابنيه تحزم ابنيه
ايسي ولا ترجع بعد شبگيها حيل ارقيه
وبيدج تره يافاطمة تلبسينه الترجيه

اديها باجر حبل عليها
اديها احا يچوي اديها
اديها تتسبل ابكل لليله


.
.
.

مرات اذا واحد عِشگ يغزي جماله ابحزنه
وشحال اذا واحد يحب ومعشوگه يطلع ابنه
مو قصة احسين وسبط بس هو هذا العدنه
هذا الجبين البي ضوه باچر احاجره ابوجنه

أحبه اعز من روحي روحه
أحبه ولا تشفه جروحه
أحبه حيلي تره من حيله

.
.
.


اي يالعليلة اعتقد كل غايب وعنده اسباب
والمشكلة گلب الابوا مايحمل البنته اعتاب
نفس المكان البي جرح واثنينه ابنفس الباب
اني اموت ابعتبته وانتي تودعين احباب

تباعد كلمن علن غيابه
تباعد والگلب شالع بابه
تباعد مايرجع وتحجيله

.
.
.


قبل العصر وكت الظهر گلبچ تخمشه الاحزان
صوت الاغراب بعتبتج ويصيح عفتها عريان
اي يالعليله والدلج مذبوح راسه وعطشان
تسفي الرياح ابجثته و مگلوب فوگ التربان

العقيلة ذيجه بلا حماها
العقيلة زلمه ركض وراها
العقيلة وشغير العقيلة


للشاعر محمد الظالمي

مستحيل هاي النهايه
والرحيل من البدايه
يازمان يبعدني عنكم
الله لا يحرمني منكم

.
.
.

راح اسافر واني اعرف هالسفر ماله رجوع
راح اروح وادري تبقه فوگ الخدود الدموع
بالله لمن تذكروني كتبوا اسمي بالشموع
راح اظل ذكرى اليمه تحبس انفاس الضلوع

بالختام هاي الرساله
والينام اني اعله باله
راح اروح مدري شگلكم
الله لا يحرمني منكم

.
.
.

صوتي ما تنسونه طبعا ألله ياصوت الحنان
من اصيح الله اكبر ينسمع في كل مكان
ياهلي مروا اعله گبري لا يباعدنه الزمان
الغربه مايحمله احد وجيت العاشگ امان

انتظر والدمعه تبدي
والگبر خلاني وحدي
ياحُسين هم تنسه امكم
الله لا يحرمني منكم

.
.
.

انت ياحيدر حبيبي انه مستحيه بچفاك
لَمنه بيت اِزغير لَكن يسوّه هالدنيا هواك
كل شي ما بيه شفتني واني اتالم وراك
ياسمه تفتر عليه واحنه غطتنه سماك

ياعلي مدحك قليلة
ياعلي احظرني لليلة
گبري ياحيدر يلمكم
الله لا يحرمني منكم

.
.
.


امكم الزهرة الحبيبة خايفه اعله العائله
يالحسن انت الچبير اتسد مكاني بأكمله
أمنية يم احسين عندي لاتروح اِلْـ كربله
الگلبْ يطلع مِن ضلوعي من تِطَلع القافله

اُمْ وانه وكل شي احسه
محبسك بالك تلبسه
يمه ذاك اليجري دمكم
الله لا يحرمني منكم

.
.
.

اْوصيتي يم زينب عِفتها واني بضلوعي الكسِر
يُمه لو شفتي حبيبي وحدة ظامي ومنكِسر
يمه قَبليه ابجبهته والمهم قبلي الصدر
فُرّي يايمه اِعله وجهج لو رجع خالي المهر

والحُسين ابلايه مناصر
والحُسين بين الحوافر
امذبحين كلها زلمكم
الله لا يحرمني منكم

.
.
.

للشاعر محمد الظالمي

إلهي ڪيف يتنفس من فارق الحُسين ؟! 💔

بين الاوقات وزحمة الراي
الحمد لله ذكرك وياي
آيمهدي آيمهدي

.
.
.


اظل اشمر حصى بالماي وتخيل تجيني
وانت تدري يامولاي عيني وماي عيني
بعد من هسا سامحني ما الزم حنيني
ما ادري شوكت ترجع طَوّلت ابسيني

انت بالروح وروحك هواي
الحمد لله ذكرك وياي
آيمهدي آيمهدي

.
.
.

تخليلي علامة ريت لو بلكت رساله
واگول المهدي يا هالناس خلاني اعله باله
أتسائل واگلهم دوم مدري اشلونه حاله
مدري الغيبه عاجبته لو شنهو الي حلاله

مدري شتگول وتشرب الماي
الحمد لله ذكرك وياي
آيمهدي آيمهدي
.
.
.

اگولن سيدي يمته هم تتلاگه العيون
هم نتشابگ اني وياك مثل الي يشبگون
بس عندي سؤال عليك خَله عقلي مجنون
شلون اتنام شلون اتعيش چا من تصرخ اشلون

زينب تصيح وتبچي مولاي
الحمد لله ذكرك وياي
آيمهدي آيمهدي
.
.
.

سالت احبابي عن اي شي كون اتحبه انته
گالولي ابكنز مظموم شكراً من عرفته
گالولي تون لحسين بس حَلفه ابغربته
مجلس كون اعيش وياه بيدي امسح دمعته

الذيج المتون تبجي عيناي
الحمد لله ذكرك وياي
آيمهدي آيمهدي

.
.
.

ما ارضه البُعد جا ليش نفسه شلون ترضه
ارض الله چبير هواي هو وينه ارضه
وين الله ابرگبته كون صبعي ايجيس نبضه
احلفه بالعزيز احسين والحافر يرِّضه


هو يبچي ويسمع ابچاي
الحمد لله ذكرك وياي
آيمهدي آيمهدي

.
.
.

لا يمكن اگوله الموت لازم كون اشوفه
تاج الراس ابو صالح ومقدر ضروفه
عجيبه ليش يتركني وما الزم چفوفه
انا انذليت بفراگه ولا يمكن اعوفه

عيني بالگاع ومره بسماي
الحمد لله ذكرك وياي
آيمهدي آيمهدي


للشاعر محمد الظالمي

لازم اشوفه حته لو مره
بچفوفي احضنه حضنت الشذره
من عمري گلوله على عمره





......

مرات اعاتب گلبك واحذر
وگلبي جُرارة طاح وتكسر
مرات اشوفك مدري اتصور
طِحت اعله متنك طيحت العنبر

يالمهدي احبك كلش اهوايه
مثل الفرات وروجته ومايه
محتاجه روحي منك النظره

......

اسمع جنت من امي واحنه ازغار
يطلع المهدي عن قُرب بالثار
من فرحتي افتحله باب الدار
طالت الغيبه وهسه صرنه اكبار

ما ادري يمته كون نتلاگه
امي الك يالمهدي مشتاگه
ما ادري چم حسره تجر حسره


.......


غايب عليه وطول غيابه
چا وينه بابه حته ادگ بابه
شگد المسافه عنه لحبابه
ياريت ايمم راسي بترابه

حِلّ المشاكل ياعلي حِلها
عقدت المهدي گلي شيفلها
واليا وكت هم ابقه انتظره



......

المشكلة يالمهدي ماتنحل
مثل التي وگفتها فوگ التل
وركض ادورك بس ولا اندل
ورجع اشوفك واطلع اتخيل

شفت السراب وماشفت طيفك
ابكيفك حبيبي ظلت ابكيفك
تدري عيوني اشگد الك حمره



......


رايد بشارة حته لو وحدي
واني ابلغ كل محب عندي
شفت الطريد الغائب المهدي
وخليت خده يلاسق بخدي

عندي امل بالغيبه خلصانه
بس شوكت والروح ولهانه
شكثره المطر ميفيد بالصحره



......

گالولي محبوبك بقه وحدة
تراب الصحاري ذَبلت خدة
لو مره اشوفه والله ماهدة
لهفة فراشه وشافت الوردة


گالوا طريقه الرؤيته سهله
كل أربعاء ابمسجد السهله
وظليت اروح متاني للبشره



.....




اقسم عليك ابرافع السبعه
هذا شبابي وخلّص ابسرعه
يمكن اموت وما الك رجعه
ياجمعة تطلع گلي جُمعه


يمته اشوفك سيدي امحزم
وخلفك يصلي عيسى ابن مريم
فرض الصلاة انشوفه بالحضره


للشاعر محمد الظالمي

هالسنه كل شي غَيرَت بيه
عفيه ياروحي زيدي حِنيه
ابوي ابوي ابوي حُسين
ابوي ابوي ابوي حُسين

.
.
.

هالسنه مختلفه بيه نعم مو مثل السنين
يالمعدل عدلتني شكراً الراسك حُسين
اني مو يمها وجبتني وعلمتني اعله الحنين
چنت يوميه اگولن اني وين وانت وين

ساكن ابگلبي تحفظك اضلوعي
عايش ابجرحي منبع ادموعي
أبوي أبوي أبوي حَنين
ابوي ابوي ابوي حُسين

.
.
.

گالوا العاشگ اذا حَب يكبر ابعينه الجرح
ينفتح ضيمه وعذابه او لو الماضي ينفتح
واني سالفتي يغالي سالفة اتنگط ملح
اني عاشگ راس ضامي شمحله طوله اعله الرمح


ما عفتك راسك والله يالغالي
حاولت انسه لكن ابالي
أبوي أبوي أبوي أنين
أبوي أبوي أبوي حُسين

.
.
.

شگد مضن ستين لليله وخلصن ايامك حرام
كون يبقه عمري وابقه انحب الحرگ الخيام
مدري شنهي اللذه بيكم وانت كل جسمك سهام
انت قصة ظعن يمشي قصة مابيها ختام

ظعن مايوگف الدنيا لو وگفت
ابرگبت السجاد زينب انشدت
أبوي أبوي أبوي حزين
أبوي أبوي أبوي حُسين

.
.
.

انت فاتح باب گلبي وانت بابك للعشگ
اصفن الروحي واباوع ويني وين الصدگ
علمتني دوم اقره بالعزه من احترگ
"حسين خليني اعله بابك غير بابك ما ادگ"

امشي وتخيل راسك ويايه
حسين شحجيلك خيرك هوايه
أبوي أبوي أبوي امين
أبوي أبوي أبوي حُسين

.
.
.

من محرم مرنه والله واحنه علگنه السواد
انشغلنه بالمجالس واعلن العالم حداد
العشره الاولى من محرم زاد شوگي وجرحي زاد
أنطيح الخيمه علينه من طحت من الجواد

والله ياعالم شتنفع اللطمه
وعالارض واگع جسم ابو اليمه
أبوي أبوي أبوي سِنين
أبوي أبوي أبوي حُسين


.
.
.

يعني معقولة خلصنه لا دخيلك ياحبيب
اني لسه بيه جمره وما شبعت من النحيب
گالوا اتمرضت كافي وگلت بس انت طبيب
يالبچيكم صار راحه لو گلت شيبك خضيب


والله مايكفي شما صرت انحب
واني ما ارضه تنسبي زينب
أبوي أبوي أبوي وتين
أبوي أبوي أبوي حُسين


للشاعر محمد الظالمي

تعال واترك الراح تعال الگلبي ورتاح
ابد ماتلگه ادفه من اديه
















اختنگنه والهوىَ المار احسه بيه علامه
احس الموت يركض مثل يوم القيامه
اگضي الليل اتانيك وحقك ما انامه
انه يرادلي حيل وترد بيه ابتسامه

تعبت من المواعيد غزت وجهي التجاعيد
وانه ابعمر الطفولة اوتدري بيه










طبع بالراحل يدور ويرد لهله المُسافر
يرد بخباره كل يوم وتظل نفس المشاعر
وانه ردولي منك يبويه بس حَوافر
عفتني بيوم ردتك عفتني ابيوم عاشر

اذا مره تجيني اشربك ماي عيني
عزيز انت وعزيزه انه رُقيه










نذر لو ترجع اليوم بشرط نفس المهابه
اطش الدنيا ريحان واحنيها الخرابه
اذا وجهك يردلي بجماله وبشبابه
اشبعك انه والله حبيبي بابا باه

ابويه اشمحله اسمه أحير اشلون اظمه
احن من گلبي يم روحي عليه










نمت والحمد لله اچه طيفك يغالي
رکضت عليه احبه ويأشرلي تعالي
اذا اني عزيزة يسرك هذا حالي
وحقك بس الدموع عفتها وياليالي

غيابك حيل قاسي خنگ گلبي ويراسي
تره الهجران صَدّگ بيه اذيه












كمشت ايده حِريمه شلت چفه واباوع
دخيلك بويه يحسين اشو تسعه الأصابع
انتبهت اعله الظهر ليش الجبد من عنده طالع
منو مخرب العمامه اشکثر يابويه واگع

عرفتك ما عرفتك ؟ منو مخرب كشختك
منو الحانيك مثل امي الزجيه










تعال اشگد گتلها يبويه انت وينك
ابطشت جابولي راسك وانا اسمع انينك
الذبح ميلوگلك دوم منو معفُر جبينك
حرت چا وين احضنك اريد اشبگ حنينك

شفتني ياضوه العين عليك حسين يحسين
الحمد لله الطشت جابك إليه











اخيراً بويه عشته گبل وضع العليله
مثلها اني هسا مريضه وهم نحيله
اگولن ليش تركض اوبچت يم العقيله
منو اليقبل يعوفك منو يفارگ خليله

بناتك حيل طيبات و حِريمه ابغيرنه تبات
حِريمه يا ابو الاكبر سبيه



للشاعر محمد الظالمي

زينب ماترجع الزينب قبل
زينب الما اله ظل صارله ظل
زينب صعدت سمه لا مو هزل
زينب













من المدينه طلعت بهيبة حماها
طلعت وطالع گمر جال ابسماها
حته جبرائيل يمسح في خطاها
والهواشم كلها تتلفت وراها

كعبه تمشي ويحف بيها نبي
كعبه بالمنجنيق الاجنبي
کعبه يضربها والمدمع تهل
زينب









وصلوا الديرة : الظعن بين طريقه
شافت العباس گمره من بريقه
هيه لا مو بس اخت " ام وصديقه"
گالت اشعر هالرسايل مو حقيقه

گلبي مايحمل افراگ والم
گلبي خايف على راعي العلم
گلبي گلي تره افراگ وقتل
زينب










هودج الحره سره ابرحلة طفوفه
"هودج" العباس سواه ابچفوفه
يعني محد شايف ومحد يشوفه
لكن الكل قاعدة وقت وضروفه

رحلة في اكتشاف الواقعه
رحلة بيها العقيلة طالعه
رحلة البيها دَخَل يشبع نبل
زينب






كربله وِصلولها والدنيا ضلمه
احسين تتخيل يصيح الماي يُمه
شافت السبعين الف كلها تلچمه
"أحُسينٌ يقتلوا" يا شر أمه

طلعت مدري اشطلع من الخيم
طلعت وياها اطفال وحرم
طلعت شافت جسم ما ينحمل
زينب











شافت الماشفت احسين ابحياته
شگد عجيبه احسين لموه ابعباته
المالهه حِس تالي طلعت للشماته
وتسمع يگولون مو ذني خواته

تبقه زينب عزيزة ابينوى
تبقه غيمه ودفع بيها الهوا
تبقه شما شافت اسهام واسل
زينب








ابمنطق الحكام خطبتها اعله الّجنود
مثل ماسوه الفتى واصحاب الخدود
ماتزل عن دين اخوها الخدر موجود
للاسف لسه اعله اديها الحبل مشدود

عمه مثل ابو طالب هي اظن
عمه كلها تنادي بالظعن
عمه زينب تره حلقة وصل
زينب



للشاعر محمد الظالمي

ماعِندي مُهِم بس أفتهم ما غيرك ابالي
يا اول حلم لاينرسم لا يترك اِخيالي
گلبي من أسئله عاشق كربله



__________________









محَيّر العالم حَقها معذوره
احنه عدنه اِحسين ماهو أسطوره
كل شي بالتكوين ينزِل يزوره
تحِفَّك الدنيا وكلها منظوره
للسِمه السابع يرتفع نوره
والشمس تفتره لعَزه عاشوره

وهج وهج وهج وهج وهج وهج حُسيني

يانور الضوه انت الهوه الماينشبع منك
قربني الك ما اخذلك ما اكتفي ابحزنك
بحزنك ياهله عاشق كربله



________________



شما اسافر دوم وتبعد الرحله
إنتَ كل ليلة تكبر وتحله
غَمَضت عيني روحي تندله
ذاك خُنصر طاح محد يحمله
ليش اشوف الراس طيحته سهله
صوت صهل اخيول وركضت الطفله

أبه أبه أبه أبه أبه أبه حُسينا

ارقيه نعم بين الخيم ادور احساسك
ترجع بالطشت من تلفت وتمشط ابراسك
شگد تتامله عاشق كربله



نور البگلبك مختلط بيه
لمسة ابداعك واضحه اعليه
مالك النيّه وشاغل النيه
انت تِجذبني وتمشي رجليه
غمض اعيوني واخذ بيديه
ريت بيه الخيل تسحگ اشويه

بطل بطل بطل بطل بطل بطل أشوفك

ماهمك عدد نايم أسد ماتعترف بيهم
وهسه مرقدك ويشاهدك ويباوع اعليهم
كل شي ظل اله عاشق كربله


دولة العشاق كربله هايّه
دولة قائدها صاحب الرايه
ياملك عرشك قمة الغايه
انت صح واحد : كلش هوايه
جننت گلبي وفقدت رايّه
خذت هذا الكون كله بحچايه

أحب أحب أحب أحب أحب أحب حياتك

يارب العشگ مانفترگ لويحترگ گلبي
بس انت صدگ ماتنشبگ ماينسبگ حُبي
جرحك اقبله عاشق كربله



______________________

كربله نعمة ابخير راعيها
شما ينصوها انت تبنيها
شگد كبر گبرك كلها حاويها
واليجي يزورك الجنه حَس بيها
تفتح اچفوفك للگصد ليها
هلا بزواري هوايه تحچيها

هلا هلا هلا هلا هلا هلا اليجيني

تتلگه الحضر بس ابنحر راسك بقه ابرمحه
مسموح اللطم اكسر عظم ما اوصل الجرحه
نوحي شما عله عاشق كربله


____________________


اشهدُ انك انت عافيتي
انه صح انسان والي حُريتي
بس عجيبه احسين گاعد ابنيتي
شما اذل روحي ترفع ابصيتي
مالي شخصيه انت شخصيتي
ياعبير الروح وياهوىَ ريتي

گمر گمر گمر گمر گمر گمر حياتي

اتعلم انه من موطنه احلامي احويها
وما انذل فلا اله على دمعاتك ابچيها
اسمي تسجله عاشق كربله


والله لو اگضي هذا كل عمري
خادمك ممنون اني من زغري
تقبل ادموعي والله ما ادري
المهم عندي خدمتك اجري
صدرك اشلونه مو مثل صدري
بي اظن حافر ولسه دم يجري

گلب گلب گلب گلب گلب گلب حبيبي

ادخيلك عالصبر شفت الشمر رافسهن اضلوعك
خفت اعله النحر ثاري انطبر ويتجارن ادموعك
دمعك هامله عاشق كربله


للشاعر محمد الظالمي

مَرَّت الليالي وقربت النهايه
مِن السَبي اجيتك لكربله مَشايه
حُسين حُسين حُسين














دارت الدِنيا واجيتَك بَربعينك
ماكو حاجِز يمنَع البيني وبينَك
بكُثر ماعندي نَفَس ناديت وينَك
اسم الله ياخويه الحجر خَرّب جَبينك

اي يخويه صعبه رحلة المنايه
من السبي اجيتك لكربله مشايه
حُسين حُسين حُسين









آه يانار الگلب ماتُطفه ناره
راجعه وراح اكتفي بَس بِالاشاره
حيره ما اگدر اوضح هالعِباره
اِبكثر ما عَطشان راسَك بي حراره

شما ارجع الحَاجب يرجع اعله رايه
من السبي اجيتك الكربله مشايه
حُسين حُسين حُسين









بالي ما مرتاح عِفتك جسم عاري
راجعه وِمتيهه ليلي من نهاري
اِنتَ هَم شايفني اركض بالظهاري
اي يخويه چبيره من ضيم الصحاري

امشي واني ميته والشمر ورايه
من السبي اجيتك لكربله مشايه
حُسين حُسين حُسين






راجعه وشوف السبي شِمْسوي بيّه
عِمت عيني جايبه راسك بديّه
كل شي تسالني أقِبله لو عليّه
وقبل لا تسأل تره ماتت رُقيّه


ماتت العَزيزة بخربت السَبايّه
من السبي اجيتك لكربله مشايه
حُسين حُسين حُسين








قَبل چان احسين يتلگاني اشوفه
هيج يفتحلي اصابيعه وچفوفه
بحضنه اشبگه واني احس روحي تطوفه
گتله ما عوفك وهِسّه صِرت اعوفه


عافِتك أخيتك صعبه مِنّي هايه
من السبي اجيتك لكربله مشايه
حُسين حُسين حُسين









منهو مِثلي اِتبوس أخوها بعَظُم نحره
منهو مثلي اشوف اخوها ادوسه عَشره
واني اصيح الخيل مو طشرتي صدره
بالحوافر گمت اشوف اللوان حَمره

العَلگُمي مشيته اعتاب الي اعله مايه
من السبي اجيتك لكربله مشايه
حُسين حُسين حُسين







گوم وتلگه المِشَّت عَنَّك غريبه
هم اِجت ياخويه اخُت مثلي حَبيبه
هذا راسَك گمت امشط بيدي شيبه
هاي اول مره اصيرلك طبيبه

انه أطيب گلبك محزمه بالرايه
من السبي اجيتك الكربله مشايه
حُسين حُسين حُسين


لِـ الشاعر مَحَمَد الظالمي

لقاء جميل جمعني مع خدام الحسين عليه السلام
الحاج #باسم_الكربلائي
وسيد #علي_الطالقاني
وسيد #عبد_الخالق_المحنه
البصرة #الفاو