تقدیرته ژمن دي ازمېښتونو ته تن نۀ ورکوي
ژوبل لاسونه زنځیرونو ته تن نۀ ورکوي

د ګرانقدرې مینې اور مې اېشولی وجود
د نفرتونو تنورونو ته تن نۀ ورکوي

تنکۍ منګول د خدای په مرسته څملولې نړۍ
د بوشکې بم، سترو اټمونو ته تن نۀ ورکوي

پر زخمي تلو په پېچومو کږلېچو روان دی
لوړو ژورو، غرو رغونو ته تن نۀ ورکوي

لوغړن جېله! د احرارو فکر نه بدلیږي
لمرینې وړانګې تورتمونو ته تن نۀ ورکوي

 غیور هیواد کې د درېیم عمر یو یو لاروی
د اربکي نسل زرګونو ته تن نۀ ورکوي

 مزار دې چېرې دی درځمه منتظر په ساندو
ځوانیمرګ یاد دې شوګیرونو ته تن نۀ ورکوي