فلسطينه

ميړانه او غيرت له مونږ نه تللی فلسطينه
د ډېرو له ذهنونو يې وتلی فلسطينه

په نوم مسلماني ده او بې روحه کالبوتونه
بس څه وکړو همت مو کوچېدلی فلسطينه

ذليلو يهوديانو سم قيامت پر تا جوړ کړی
د ننګ غيرت تاريخ مو نن بايللی فلسطينه

د وخت حکمرانان تش په نامه مسلمانان دي
ايمان يې په ډالرو نن پلورلی فلسطينه

کورونه، روغتونونه، مدرسې او مکتبونه
مسجد، محراب، منبر دې نړېدلی فلسطينه

هر ځوان دې قهرمان دی هر وګړی دې باتور دی
د سپر غوندې دښمن ته درېدلى فلسطينه

يوه جنازه نه ده په زرګونو جنازې دي
سپرلی د شهادت پر تا راغلى فلسطينه

درتلی نه شو کومک ته د درتلو لارې دي بندې
په غم دې (فيضاني) ډېر ژړېدلی فلسطينه

#ليکوال_م_رضوان_الله_فيضاني