ح تنحبي كتير من الصغار والكبار ، وأحياناً ح تنكرهي لأسباب مابتعرفيها من الكبار .
يمكن عيلة خطيبك يحبوكي أكتر منو مرات ، ويمكن هوي يحبك أكتر من حالك مرات ، ويمكن بس إنتي تحبيه وتكابري ع سوء اختيارك وإنتي عم تلونيه .
ح تنخاني من يلي وفيتي إلهن ع حساب عمرك ويمكن تفيقي عمرك 37 سنة وحبيبك صار عندو ولاد ،
ح يسمي بنتو ع اسمك ودخلك شو يعني .!
ما الوفى الكبير إنتي شلتيه وهوي بس شال بنتو الصغيرة.
ح تخوني لمجرد إنك ماقدرتي تحبي شخص انفرض عليكي فرض ويمكن باللحظة الأخيرة تصحيكي جروحك وترجعي تبتسمي لزوجك القاسي.
ح تضمي طفلك وتقولي الدنيا هون معي ،
وغريزة إمومتك ح تعلمك شو يعني "الجنة تحت رجليكي " ومية ألف خنجر بعيونك.
ح توقفي لحالك والكل يقلك بتستاهلي كل شي صار فيكي ،ح تدوري عَ الناس يلي كانت تنصحك وح تشوفيهون عم يضحكو عليكي.
ح ترافقي كتير ناس بطريقهم وينسوكي وح يرافقك كتير ناس بطريقك وبجوز تنسيهم كمان.
ح ترجعي لعند أبوكي عم تبكي وتقليلو "بطل بدي إكبر " ، ح يضحكلك أبوكي ويضمك ومش ح تهمّك أصوات صريخ الناس يلي برا باب بيت أبوكي .
ح تعاني لتقولي "بدي عيش" ،و لسا ح تعاني بشكل مضاعف لأنك حققتي ال "بدي عيش" .
ح تنظلمي كتير لمجرد إنك حلوة ،وح تنظلمي أكتر لو كنتي مش حلوة .
ح تتعبي ع الفاضي ، ح تسامحي ع الفاضي ، ح تموتي ع الفاضي ، وتنامي بلا غطا بكتير ليالي ،
ولو رجعوكي طفلة وسألوكي مرة تانية شو بدك تصيري لما تكبري لركضتي وعدلتي الأحلام :
"بدي صير قوية بس".
|فرح أسعد|.💙
