رقیب ته

دلته مه کوه شوخي سر به دي بایلې
لا ژوندي دي میړني سر به دي بایلې

که نظر وکړې تاریخ ته د پلرونو
بیا به غواړې معافي سر به دي بایلې

سر خوړلی ستا ګورګین دی پر دې خاوره
نوره مه کړه سربازي سر به دي بایلې

جنګ د ټوکو قیصې نه دي همت غواړي
افغانان دي لا ژوندي سر به دي بایلې

چې قدم ږدي د چندڼ تر سیوري لاندي
بیا نو خامخا حتمي سر به دي بایلې

سترګي برګي دلته مه راوړه رقیبه
ډیر به ځان کړې تاواني سر به دي بایلې

د #مشهود خبره ومنه ارام سه
څوک دی نه کړي غلامي سر به دي بایلې

#پښتو_انتخابي_شاعري