قصائد حسينيه مكتوبه الناشر ابو الاكبر

علي يبني
علي يبني
،،،،،،،،،،،،،،،،،،،،،،،
يألاكبر حسين ماعايــــز هواي جروحــه
يالاكبر من البواچي اعليك طلعت روحه
يالأكبر للخيـــم واصـــل صياحه ونوحه
يالأكبر راحـــت مـــن يدي زلــم مملوحه
ماكو واحـــد ضـــــل يبويه يعيني
حتئ هاي جدامي گـــوه تشيليني
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
يبويه للخيم ماراح ارد مـــــــــن دونــك
يبويه النوم مالايــــگ ترئ اعله عيونــك
يبويه الرمــــل حار وخاف يچوي متونك
يبويه بخيل لو عفتـــك ترئ يسحگونــك
گلبي مايطني اعوفــــــــك ومشي
عليك مو بس راسي شيب رمشي
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
يغالي يالعليك مــــــــــن الصبــه معودني
يغالي انتـه اخــوي وصاحبي وانتــه ابني
يغالي محــــــد بگــــــدك يبويــــه يحبني
يغالي ليش بجفاك الدهــــــــــــر دولبــني
انته اول واحـــــــــــــد يهد حيلي
الف عله فراگــــــــــــــك مسويلي
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
خطيــــه حسين اول تالي يصيـحولــــــه
خطيه بحـــــل رقيـــــــه الضلـو يتچــوله
خطيه گـــول ابوي وشيـــل عنــــه حموله
خطيه ويـــــن مايگعـــد عــــــــزه يسولــه
حسين ماضلت دموع بعينـــــــه
گامـــــــت اصبــــر عليه اسكينه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
يبزري گــــــــوم لاتكسر بگلـــــب حسينك
يبزري عاد بس هـــــل مـره افتــــح عينك
يبزري انتــــه طايح وانــه اصيحن وينــك
يبزري الموت شنهي وحــال بيني وبينـــك
بداعت امـــــك يالحنين وداعتي
گوم مـــو گربت منيتي وساعتي
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
مصطفئ الصالحي
،،،،،، شور،،،،،،

حي الله ... حي الله
حبيب ابن مظاهر
...1...
نزل مثل الغضب ... بيمينه فقاره
اساميهم شطب ... جاباهه البشاره

عليهم وزع الارواح بالكيف
هذا يعيش ذاك يموت بالسيف
فتح الهم مضيفه المايرد ضيف
بردهم وجانت معركة صيف

راواهم ... نجم الظهر ... راواهم
صفاهم ... يم الخيم ... صفاهم

حي الله ... حي الله
حبيب ابن مظاهر
...2...

وكف وكفت اسد .... ما بين المخيم
فلاهمه العدد .. بالحومه وتبسم

ماهم بعددهم جـــانو ألـــــوف
للكوفه بفخر رجعهم ازحــوف
يستكني اعله كيفه كربله تشوف
ياخذ روح واحد واحد يعوف

حملاته ... كلهن عزم ... حملاته
صولاته ... صولت نبي ... صولاته

حي الله ... حي الله
حبيب ابن مظاهر
.

....3....

صفات امن الكمر ... موجودة بجبينه
صبح اعظم فخر ... لحسين وبنينه

سطراته ثكيله ادكول عباس
ما واحد اكباله اليرفع الراس
كطاع الركب كطاع الانفاس
فارس مو العمره اتسولف الناس

سبعينهم ... رجع ركض ... سبعينهم
بسنينهم ... لف الارض ... بسنينهم

حي الله ... حي الله
حبيب ابن مظاهر
.....

....4....

حبيب ابشيبته ... لحسينه و يناصر
يرف برايته ... ما وكفه الساتر

ماجنه ابعمر تسعين من غار
سوه العجب بيهم شيخ الانصار
دخل كــل جيوش الظالم انذار
سيّرهم الملك الموت خطار

اراوحهم .... منهم خطف ... ارواحهم
بجراحهم ... سواله طف ... بجراحهم

حي الله ... حي الله
حبيب ابن مظاهر
......
تمت
.......
موسى الخادم

ضميتلك دمعة سنه يحسين يامية هله
بعيوني موشايل حزن لاشايل اني كربله
يحسين▪️يحسين▪️يحسين▪️يحسين
🏴🏴🏴🏴🏴🏴🏴🏴🏴🏴🏴
عداد عمري يشتغل وانه انتظر عاشورك
اشلون يتحمل سنه والكل خميس يزورك
ياابوعلي هاي السنه لمنه تحت في سورك
ياابورقيه وللدمع حزمنه فدوه لنورك
يحسين▪️يحسين▪️يحسين▪️يحسين
🏴🏴🏴🏴🏴🏴🏴🏴🏴🏴🏴
يحسين انه بخدمتك موكل سنه يوميه
وكل هذا احس غصبا علي ماعندي كل منيه
ماعندي شغله اويه البشر كونك تباوع ليه
انه امتلك بس خدمتك كلها تره مگضيه
يحسين▪️يحسين▪️يحسين▪️يحسين
🏴🏴🏴🏴🏴🏴🏴🏴🏴🏴🏴
يابوعلي ياابو الكرم خيرك علينه اهوايه
امنين ابتدي من مجلسك لوجية المشايه
واليوم انه بمجلسك منك اريد احجايه
رايد اضل بخدمتك كل السنين الجايه
يحسين▪️يحسين▪️يحسين▪️يحسين
🏴🏴🏴🏴🏴🏴🏴🏴🏴🏴🏴
ياابوعلي انه وعلي مااعيشن ابلا خدمه
يمكن لان بالذر جنت منطيها هاي الكلمه
گتلهم انه خادمك وانطوني هاي النعمه
خالقني الله لخدمتك والطين جان امدمه
يحسين▪️يحسين▪️يحسين▪️يحسين
🏴🏴🏴🏴🏴🏴🏴🏴🏴🏴🏴
حزنك طلع مثل الزرع خضر دمع بعيوني
من يهل عاشورك احس فجئه ايتغير لوني
مجنون انه ابهذا العزه والوادم ايعرفوني
انه علاجي بهالشهر هذا تره مضموني
يحسين▪️يحسين▪️يحسين▪️يحسين
🏴🏴🏴🏴🏴🏴🏴🏴🏴🏴🏴
📝احمد علي البغدادي



@tyyuuiiopp

من شفنه هلالك يحسين
نـزلـن دمـعـات أمـن العين
نبچيلك من دم كل عام
نذكر زينب والايتام
===============
ساعاتك تخنگ بالروح
كـل الناس اليله اتنوح
شايفلك مجروح اينام
وهلالك ضايفله اجروح
ترجع للماضي الايام * نذكر زينب والايتام
==============
توگـع من الشيعه اگلوب
تتـوادع ويـه المحبـوب
تحسب ياعاشور احساب
تنظرلك لو صار اغـروب
تضهر بالعالم إلام * نذكر زينب ولايتام
============
مـانترك دربـك مـولاي
اليطبخ واليسقي الـماي
متحزمه العالم وتصيح
اشرب من الموكب چاي
كل عاشور انشد احزام *نذكر زينب والأيتام
============
خدامك من جيل الجيل
تـلـزم دمـام او زنجيل
خل اعداك اشما يحچون
نـلـطم لو تمـطر سجّيل
من زوك زود الخدام * نذكر زينب والأيتام
============
خلهم يحچون الشمات
نحـزن ونعلي الرايات
يتجدد حزنك كل عام
مـانترك دربـك هيهات
نفسم بالراحت للشام *نذكر زينب والأيتام
============
للشاعر فاخرالشبيبي

قصيدة ثكيله حول العليله ع


ودعتهم ...والجرح لجماني
ودعتهم.... والوضع بجاني
شالت النوك ومشت
عيوني حكها لوبجت
ودعتهم ودعتهم





وداعهم جنه الجمر يجوي بدليلي
والله من يوم المشوا مانمته ليلي
غيابهم موت وغفل هدملي حيلي
من سروا بجوني...صحت ما حاجوني
ودعتهم ودعتهم




صحت بويه شمعنى انه الخليتني
صعدت كلهن خواتي من الضعن عزليتني
هذا موقف حيل يجرح بويه وبجيتني
نزلت الدمعات نار...والعكل من عندي طار
ودعتهم ودعتهم




اعاين بحركه ودليلي جنه نار
حلم هذا لو حقيقه البيه صار
الضعن جن يمشي عله كلبي بيوم سار
صحت حيل وياكم......كلبي ما ينساكم
ودعتهم ودعتهم





شفت الضعون ابعدت والكلب ذاب
صعبه اردن للديار الخاليه من الحباب
ليش ماردو عليه من صحت عالضعن غاب
كمت اتعثر وطيح.....لوتهب نسمات ريح
ودعتهم ودعتهم




حالي يا حال الغرايب من جفوني
شصار بيه وبالضعن ما ركبوني
بدمعه وحجايت ارجعي ودعوني
اصعب وداع وشفت...ديارهم من ارجعت
ودعتهم ودعتهم

نعي للعليله (ع)


تمنيت بـحلـم وهـلـي يـردون
واكحل ناضري وترتاح العيون
اشتاگ الگلب يا ناس لأم عون
حـتى بـمنـامي اتـهـل الجفون


ايـهـب الـهـوه ويـحـرك الـبـاب
ومـيّـت هـلـه اهـتـف يـغـيّـاب
وانـه زغـيـره والـگـلــب شـاب
لـمـن جفـاني ضـعـن الاحبـاب


تــركـن اثــر دمــعـات خـدي
دمـعـه تطيح ودمـعـه تـبـدي
بين الحـزن والـنـوح وحـدي
روحـي عـلـيلـه وزاد وجـدي


راحـو هـلـي الـطيبيـن كـلـهـم
صبـري خلص وتـني الشملهـم
مـحـد عـلى الـحـالي يـگلـهـم
مـوحش تـره اصـبـح نـزلـهـم


✍خادم العليله.(ع)
الشاعر رعد الجريخي

مقدمة ليلة الوحشه
.
.
.

الليله ابـلا ولـيان .. وحاطوني العدوان
حاطوني العدوان .. وانته اعله التربان

_

وعيونك / زينـب وحـيده اويه الحرم
وعيونك / والــگـوم ماعــدهــم رحــم
وعيونك / الصابوها عالشاطي ابسهم
وعيونك / هالــيلـه احــنه ابــلا خــيم

وجـوهـا ابنيـران .. وحاطوني العدوان
حاطوني العدوان .. وانته اعله التربان

_

شافوني / الـمـاشــفــو اخـيالـــي گــبل
شافوني / مـن شــدو اچفــوفي ابحبل
شافوني / ويــنك صــحــت يابالفــضل
شافوني / بـــاچــر اســيـــره ارتـــــحل

دالالـــك مــــالان .. وحاطوني العدوان
حاطوني العدوان .. وانته اعله التربان

_

ظربوني / ومــحد فــزع خـويــه إلــي
ظربوني / چــيه شـاهدوني ابـلا ولــي
ظربوني / وينــك صـحـــت ياكــافـلـي
ظربوني / شــو مـــاگلــتـلي اتـــدلـلــي

اعليك اعرف ماهـان .. وحاطوني العدوان
حاطــوني العــدوان .. وانــته اعله التربان

_

هالليله / جــفن ابــچــفــن ماينــطبگ
هالليله / شيصـبره گــلبــي المحــترگ
هالليله / مــتـونــي يبــو الـغــيره زرگ
هالليله / چيــف الشــمـر بـيــهن يــدگ

ومن الـدگ تعبان .. وحاطوني العدوان
حاطوني العدوان .. وانـته اعله التربان

_

ترضاها / يالـغــرگــتـنــي بــالخــدر
ترضاها / بـاچــر اروح اويــه الشمر
ترضاها / عالمــشــرعـه لــمــن امــر
ترضاها / گــــدام عــينــك انـســطر

وانظرلك جثـمان .. وحاطوني العدوان
حاطوني العدوان .. وانـته اعله التربان

_

مكسوره / وجــروحي يـتـبدن والم
مكسوره / لحــگ علــيـــه يــاشــهم
مكسوره / حيــلي احــسـه منـــهدم
مكسوره / أذتــنــي نظــرات الـــزلم

دهر اختك من خان .. وحاطوني العدوان
حاطوني الــعـدوان .. وانتــه اعله التربان
_
حيدر تركي الكربلائي

(تشعلك الشمعه)
رملــه تـــدوف بحـنـتــك جــــاســم
منتظــره بـاجر زفتــــك جــــاســم
وتشعلك الشمعــــــــه وتمسحلك الدمعــــــه
أمـــــــك تعـــــطـّر كلتــك جـــاســـم
**
حنتك جابتها رملــــه يجسّام اتعجن بـيــهـــا
تحني اديك تريد تحله وهيه هم اتحني اديهــا
من ترابك تحط كحله ودمــع من دم تهلّيــهــا

وتسوي عرسك بالعـلن هاي الوصيه من الحَســن
أمك يجاسم حضّـــــــرت كـــلّــه
بزفّت ابنها هلهلــــــــت رمّـلــه
صيوانك اتوسّعه وتشعلُك الشمعــه
منتضــره بـاجر زفتــــك جــــاســم
****
من تطب صيوان عرســـك يا شبــاب الغاضريــــه
يجســـام انتبـــــه لمّـــــــك وستمع هاي الوصيـــه
خلي سيفك يبني يـــــمـــك حتـه تذبحهــا المنــيــه

ولـــو اجت ليــك المنيــه آنــه أمـك ودهــا اليـــه
انــطيها عــمري واشتري عمـــرك
خلاني أوج وانطــفـــــــي جمـــرك
خل عرسك ابسرعه وتشعلـــك الشمعــــه
منتضره باجر زفتـــــــــك جــاســـم
****

رايده افــرح بـيك مــره وتدري عرسك منتضرته
وسط كَلبي بيك جـمـــره ذاب كَلبي من حـــركَــتـه
يبني اشوف الدنيه حمره والكَــمــر زادت حــمرته
حمره اطلعت حته الشمس ما ضن يتم هذا العــرس
خايف كَليبي مـــا يتــــم عــرسك
وآنه ادري طيّبها الحلم نفـســك
يبني الحزن ودعه وتشعــلــك الشمعــه
منتظره با جر زفتـــــك جــاســم
*
بالطفوف ايصير جاسم يـمّه عرسك ما حسبتــه
كَلبي منّ الفرح هــــايم وبالحــزن دكَت نبضــته
اجيت أكعّد أبني نــايــم بس شفـت دم بــركَــبتـه

حشّمت زينب عــمــتـه راحــت الجاسم شـافتـه
رجعتلي محنيه الظهــــــر زيـنـــب
رادت تموت من القهـــــر تـنـحـب
والحره منفجعـــه وتشعـلك الشــمعـــه
مـنــتــظـــره بــاجـــر زفــتــك جــــاســم
****
جيت اركض هــا يزينـب كَالت ابنج وخــري عـنّه
مـا كو كـلّه اليوم تنّصب وما كَو جف ايخلي حنّـه
رملــه ابنــج دم تخضـب روحي يمه وسمعي ونّه
آخ يمه يصيــح قـــاســم هــذا صـار اليوم حـاسـم
وصلـــو سلامي لعــمّتــي وعــمّــي
وكَلولــــه صارت حنتـــــي دمّــــــي
مالي بعد رجعه وتشعلك الشمعه
منتظره باجرزفتــــــك جـــاســم
خادم خدام الحســـــــــــين الشاعر الحسيني ناصر الطائي

بالزلم من سار محروس الظعن
بزود وبهيبة مشوا من الوطن
-----------------------------------------------
من وطن جدة طلع لرض العراق
الكاتبوا كلهم كفر واهل النفاق
بعد چم يوم ويحل وقت الفراق
ما كو مثل حسين بالدنيا امتحن
------------------------------------------------
ماكو مثل حسين بالدنيا صبر
الدنيا تمطر بالبلاء اعليه مطر
حايطينة اخوانة كلهم بالسفر
سيوف كلنة وللاشارة احنا رهن
-----------------------------------------------
سيوف كلنة وللاشارة حاظرين
خلهة تخذلنة العرب والمسلمين
بعنة حتى ارواحنة لجل الحسين
يستقام الدين ودمانة جرن
-----------------------------------------------
يستقام الدين ندري بالدماء
ظهرة محني ويشتكي لرب السماء
بينا اهل البيت معروف الوفاء
ندري لجلة اجسامنة يتكطعن
----------------------------------------
ندري لجلة اجسامنة اتظل بالتراب
عفنة حتى الوطن شياب وشباب
يبو اليمة وياك نقسم بالكتاب
ما نعوفك لا نعوف اخت الحسن
-----------------------------------------------
ما نعوفك لانعوف الطاهرة
وياك حد الموت خلة شما جرة
الموت كَاعد للظعن يتنطرة
ارواحنة بسجل المناية اتسجلن
-----------------------------------------------
ارواحنة بسجل المناية مسجلة
بس حرم واطفال تبقى القافلة
يخيم الموت ويلكَط كل هلة
الله شاء ايشوفهن من ينسبن
-------------------------------------------
أسالكم الدعاء رائد الاسدي

قصيدة بحق السيدة زينب عليها السلام تعاتب العباس عليه السلام جديد محرم ١٤٤٤ هـ


ما تگعد لفتنة الگوم يا عباس يا خوية
=====================
هجموا عالخيم هجمة ياعباس ياخوية
بالشر كلها متحزمة ياعباس ياخوية
يا هو اندبة ونحشمة ياعباس يا خوية
يالنايم جزاك اللوم ياعباس يا خوية
=========================
حرگوها الخيم بالنار يا عباس يا خوية
وصارت عيلتك طشار يا عباس يا خوية
والعسكر علينة اندار يا عباس يا خوية
گلبي يالاخَو مالوم يا عباس يا خوية
=========================
حاطتنة العدة الانذال يا عباس يا خوية
وشدوا عيلتك بحبال يا عباس يا خوية
وحادينا العدو الچتال يا عباس يا خوية
عدوانك علينة تحوم يا عباس يا خوية
========================
عزيزت گلبك ارقية يا عباس يا خوية
باگو منها ترچية يا عباس يا خوية
اشاگف عنها بيدية يا عباس يا خوية
يوم اسود صبح هاليوم يا عباس يا خوية
========================
النوكَ البالسبي هزلة يا عباس يا خوية
ومروا بيها عالقتلة يا عباس يا خوية
صعبة علينة مو سهلة يا عباس يا خوية
لاچن هالامر محتوم يا عباس يا خوية
========================
نودعكم يخوية شلون يا عباس يا خوية
وعدانة فلا يرضون يا عباس يا خوية
امشن للبسي ايصيحون يا عباس يا خوية
تمنيتك عدل وتگوم يا عباس يا خوية
========================
أسالكم الدعاء رائد الاسدي

شدوا الحزم شدوا الحيل نطلع مثل نجم سهيل
انصارك وتحت الامر انراويهم نجوم الظهر
شدوا الحزم شدوا الحيل
----------------------------------------------
كل فرد منهم سل حسامة ونادة
مـــــو مــــرة نُقتل لو الف وزيادة
كل احنه فدوة انروح لجل السادة
شان العبد مخلص يظل لسيادة
فدوة العمر لجل حسين امرك على الراس وعين
انشمر سواعدنا السمر انراويهم نجوم الظهر
--------------------------------------------------
اتحزم حبيــب وللحرب شال لواه
مـــــيدانه هذا وماكو زلمه اللاكاه
الاســـــدي چنه الاسد طب عداه
والجيش ما يعرف يمنته ويسراه
ما سامع ابطاري الخوف صف الزلم بيدة صفوف
ماينفع وياهم صبر انراويهم نجوم الظهر
----------------------------------------------------
كل الانصار اتحاشمـــوا اهل الزود
غيرة وشهامة وبالوفة ماكو حدود
نافع برير وعابس ابروحة ايجــود
ذب الدرع والطاس ما هاب حشود
مجنون اظل حد الموت خل تسمع عداي الصوت
شوگي الك يچوي الجمر انراويهم نجوم الظهر
----------------------------------------------
مسلم حمل واتوادع وي الخــوان
جون وزهير اتحاشموا للمـــــيدان
ما يملك اعصابة وهب طب غظبان
وامه وراه اتحمشة اعله العــدوان
لا ترجع وافدي الروح لبن النبي فدوة اتروح
يا يمه ابشري ابهالامر انراويهم نجوم الظهر
---------------------------------------------
الحر الرياحي بگومة فارس مقدام
واسلم التركي بيدة شال الصمصام
اتحزم زهـــير وظربتة اتطير الهام
شوذب تحظر للحـــرب شد احزام
ابدربك يبو اليمه انسير اعذرنا عن اي تقصير
يحسين الك فدوة العمر انراويهم نجوم الظهر
-------------------------------------------
گطعوا عهد ويه الحُسين الانصار
ما نـــــرضى بالذل لا ابد لا بالعار
ظربوا مثل باعـــظم صور للايثار
لا عن طمع بالجـنة لا خوف النار
نطي النفس لجل الله ودين النبي ايرف لواه
ما نرجع بغير النصر انراويهم نجوم الظهر
******
اسالكم الدعاء رائد الاسدي

جرح الحياة وكل مصايب باجر
والعمر يخلص وي صباح العاشر
ياليل طول ياليل باجر ضعن اهلي يشيل
بالعاشر بالعاشر
&&&&&&&&
دخلت بخوفي للخيمة بدليلي النار
شفت حسين اخوية وجهة شو محتار
كتلة شبيك حاجيني شنو الي صار
جابوبني ودموعة بعينة دم مدرار

باجر اطفالي يركضون مالومة
ومايرحم بيهم جتال بالحومة
واليركض اتشب النار بهدومة
يازينب وانتي تصيرين مهضومة

محتارة بطفالج لون بخوانج
لو هم تهمين بزمان الخانج
ياليل طول ياليل باجر ضعن اهلي يشيل
بالعاشر بالعاشر
&&&&&&&&
بجيت وكتلة سولفي بخوي شلون
نضر نضرة حزن والدمع صب عيون
شوفني سهم عباس صار جفون
والعامود مايحمل ضربتة الكون

وتوگع عالشاطي الحلوات زنودة
ويرگض يجيبلنة الماي بجودة
مامهتم بحالة يهم بوعودة
يتلگة سهم المسموم بجبودة

عباس اخونة ينغدر عالشاطي
ضهري يكسرة وانتي رهن الحادي
ياليل طول ياليل باجر ضعن اهلي يشيل
بالعاشر بالعاشر
&&&&&&&&
بعد احجيلي عالاكبر وعن جسام
خوية الدهر عن عيلتنة شنهو الضام
حاجاني علي الأكبر ترسني آلآاام
وعريس المنايا حنتة الضلآم

من دمة الگاع يترسون هالغبرة
ويتلگة سحگات الخيل بصدرة
وابني علي جرحة يصير شكبرة
مايرهم يحملة انسان ايكسرة

دمة عمت عين الفرس وتخثر
مارجع راح اعلة العدوا واطبّر
ياليل طول ياليل باجر ضعن اهلي يشيل
بالعاشر بالعاشر
&&&&&&&&
وصلت الحالة مصدومة وصحت يحنين
انتة شلون لو باجر افگدك وين
أشر عالرمح تلگين رأس حسين
وجسمي اتضعضعة الخيالة مو مرتين

أليسحگني بخيلة هناك وداني
واليرجع يردني بعيد خلاني
والداس صدري بحافرة وأذاني
بس آني بالي يم هلي وخواني

عالتل تصعدين بدمع محتارة
و هاية مصيبة هالحزن واسرارة
ياليل طول ياليل باجر ضعن اهلي يشيل
بالعاشر بالعاشر
&&&&&&&&
صبّح هالصباح وجايب المعلوم
وبفگد الاخوّة شفت كثرة هموم
مانامت عيوني و لايمرها النوم
عالگاع اخوتي وحسين صاير كوم

أجمع وذر من الگاع واوصالة
ومارحمتة ادوسة اعناد خيّالة
جم حافر بحافر داس بخيالة
ماواحد ادنّة لحسين أوشالة

ضل الرمل ياكل بجسمة العاري
واحترگت أخيامي وتهدم دآري
ياليل طول ياليل باجر ضعن اهلي يشيل
بالعاشر بالعاشر
&&&&&&&&



الشاعر عباس الكرغولي