ظاهرة خطيرة منتشرة الايام هادي على السوشيال ميديا بصفة عامة؛ نشر صور لبنات/ولاد عريانين،نشر ستوريات فيها موسيقى بجميع الاشكال،ناهيك عن الفسق الي تضمنه اغلب الموسيقى المنتشرة في وقتنا الحالي، نشر علاقات محرمة والتفاخر بيها على انها شي عادي.... الخ.
الجهل بعِظَم المجاهرة هو السبب في انتشار الظاهرة هادي للاسف،مفيش انسان معصوم من الخطأ و جلّ من لا يُخطئ،لكن طالما الله عز وجل ساتر عليك،حافظ على الستر هذا.
الشخص اللي ربي مُبتليه بذنب معين،سماع موسيقى،علاقة محرمة،ادمان على شي معين،وساتر نفسه ويجاهد شيطانه بينه وبين ربه ويتوب ويرجع ويتوب ويرجع مزال في نعمة والله عن اللي يجاهر بيها جهارا نهارا.
السيئة الوحدة تحولت لعشرة والآثام تضاعفت والتوبة ولت اصعب، كله؟ بسبب المجاهرة بالمعصية.
ياما ناس تابت من الموسيقى وسمعت ستوري سببلها انتكاسة وياما ناس تابت من مشاهدة الحرام وبسبب قناة او ستوري شخص رجعتله.
اتقوا الله عز وجل مزال في فرصة طالما في نفس، خلوا وراكم أثر طيب وصدقة جارية و امسحوا اي شي يمكن يعذبكم في قبركم ويخلي ناس متعرفوهاش توقف يوم القيامة وتاخد من حسناتكم وتذكروا إن (من ترك شيئا لله عوضه الله خيرا منه).
قال ﷺ ﴿كل أمتي معافى إلا المجاهرين ﴾ وقال تعالى ﴿وَاتَّقُوا يَوْمًا تُرْجَعُونَ فِيهِ إِلَى اللَّهِ﴾.
