قناة الشاعر ابو عقيل الناصري

موشح / في رثاء القاسم وذكر بطولته ونهضته للحق يوم عاشوراء علي صغر سنه ........................

القصيدة:
من برز شبل الحسن صنديدها
ضاگت الوسعه أعلَ جيش أيزيدها

شاب يوم الطف طلع من خيمته
بدر لاچن للحرايب لامته
بيه تتوسل سكينه وعمته
ورمله تشبح عينها أعلَ إوليدها

ركب وأرخه لغوجه جسّام الرسن
وشافه ابو السجاد وعيونه جَرَن
جرَن من شاف الشمايل للحسن
گله لمَّك عود مَنتَه إوحيدها

گله لمك رد ينَجل المجتبى
يلي فخرَك بيد مجدك كاسبَه
لاتعوف امك يجاسم ناحِبَـه
من تروح إعليك يكثر ويدها

گله امي اللبستني إعمامتي
وهيه شدتلي يعمي لامتي
بالعمر شلي بعدكم سـادتي
الدنيا بعدك يالسبط ماريدها

الدنيا بعدك شلّي بيها وبالعمر
مُنيتي گبــلك يواريني الگبر
ماني ماظل عندي ياعمي صبر
ضاگ صدري إرخصني ألحگ صيدها

ارخصاه وجال بأوساط العده
وخله كل ذيچ الصفوف أمبدده
دار قطب الرحى وشدها بساعده
بهمّته وشل حالها بتكبيدها

ليث صال بساحته وشد النزال
وكام سيفه يحودهم يمنه وشمال
شبل لاچن جَبَّن أحيود الرجال
وترس بالعدوان منهم بيدها

فرَّت من إمكاون الليث الغضوب
وعقدَت النية من المبارز تتوب
ودون ابو السجاد راواها الخطوب
منه تشرد كون طايح بيدها

مايُبالي شما أجت ليه من جموع
ضاعت إبعزمه العده وكامت تلوع
خلها تعلگ أمته أعليه الشموع
وتذكر ايام البطل وتعيدها

ضحه لجل حسين عمه بكربله
وزفّـتَه افعال المجد لَمُّ العَلَه
هذا منهل زود كلمَن ينهلَه
إنوجد بالطف يستحق تمجيدها

هذا قدوة كربله لكل الشباب
يظل شاهد للأبد رغم المصاب
هذا مانــايم ابد حدر التراب
هذا رمز لأمتَّــه وتوحيــدها
...........................................

نسألكم الدعاء
خادم اهل البيت عليهم السلام
الشاعر أبو عقيل الناصري
قناة الشاعر ابو عقيل الناصري
لاشيءَ يتركُه الزمانُ مقاوماً .. الا الذي حملَ الإباءَ شعارا
https://t.me/aa_ad9

قصيدة : بكاء المشاهد .. تتناول سبب البكاء لعظماء الطف مع ذكر رموز منهم حتى العقيلة زينب ع ومحنة الأسر ......................
* * *

تلطم على حسين المشاهد كلها
تبچي وتنوح وكربله تنـوح إلها

باصوات المظلومين / نهتف واحسينا
ولفـگد المياميـن / نصرخ واحســــينا
* * *
نلطـم على البيــه الأمم مفجـوعــه
الچـان العـدل للمجتـمـع مشــروعه
ويلطـم عليــه كل الزمــان إبـلوعـه
وحگ المحب يسچب عليه دموعه
ونبچي ونـنـوح وكربله إنواصلها
باصوات المفجوعين / نهتف وا ..

نلطم على حسين السبط واصحابه
الكلهـم گضـوا بالطف عطش لهّـابـه
حســـين الذي چانت تحب إتـرابــه
وتتـشـــرف أملاك الجـليــل إببابــه
لن داره چانت بالأرض منزلها
ونظل ليوم الدين / نهتف وا ..

نلـطم علَـه أچفـوف الفضل مگطوعه
الصـورتـها بـعيــون الزمن مـطبوعـــه
نلطـم على أعـلام الـوفـه المـرفوعــه
وعن حگها ياحيف اصبحت مدفوعه
ولَـم الخدر بت حيدر وكافلها
العباس وللچفين / نهتف وا....

نلطم على اليشـــبه شـــــمايل طـه
الما عـزت أعليـــه النفـس وإطـاهـا
البالطف نهض والموزمه إتخطاهــا
وبالتضحيه إدروس المجد خطاها
إمأصل حياته من الكرم باذلها
للخاض الميادين / نهتف وا ...

نلطم على الشاب الوسيم الأذفر
المثـــله نمـــوذج مابــعد يـتـكرر
العاف الزفـــاف وللحيـاة إتـنـكّر
وهام إبحبيبـه وبالسيوف اتوذر
للهام بحب حسين / نهتف وا ..

نلطم على اليرضع تســـيل إدمومه
الوقّع عطش گلبه بســهم مرسومه
ياگلب ابو اليـمه إشيـشيل إهمومه
ويوم الطفوف إشلون يفجع يومه
وگلبــك مصايب كربلــه شايلها
وبنهجك متمسكين / نهتف وا ..

اللـه ويايــوم الـطفـوف وحزنـــه
المحنة عذابه أعلَ الأكارم محنَـه
إنـفتـنت الدنيـا بذاك يومك فتنه
وسهم الطفل بالطف ذبح ذابحنه
وهاي النوايب نغرگ بســاحلها
للبالطف عطشانين / نهتف وا ..

ويامَصعب إفراگ السبط وانصاره
وطلعــة حبـيـب وبيـرغـه وابـراره
الواحـدهـم إيعــادل ألـف بالغـــاره
وماتدرك أوهــام الرجـال أســراره
إلا الجليل برحمتـــه إيعاملها
شيعة وللمحرومين / نهتف وا ..

نلطم على الفوگ الهِزِل ميســـوره
وبيـها تـدوُر أهـل الغدر مســـروره
الهاج الحزن بالطف عليها إبجـوره
وبس بالعليل وبالخدر مســـــتوره
وفوگ التراب سبعطعش ظل إلها
للبالطف مسلوبين / نهتف وا ...
* * ***
نسألكم الدعاء
خادم أهل البيت عليهم السلام
الشاعر ابو عقيل الناصري

قناة الشاعر ابو عقيل الناصري
لاشي يتركه الزمان مقاوما .. الا الذي حمل الإباء شعارا
https://t.me/aa_ad9

موشح في شجاعة العباس ع مجارة لما هو مأثور ...........................
القصيدة:

حي اخو زينب نزل ميدانها
وأرخه بالطف للمنايا إعنـانها
* * *
حي ابو فاضل نزل طف كربله
وخاض بيها ابن الصميده ام العلا
رمحه خطفه ، وسيفه مثل الزلزله
لكد مهره وخطف بيها ألوانها
* * *
لمهره أرخه إعنانها وشد وإنتخه
وگام يطعم بيها للسيف إبسَخَه
وهودج الموت بشملهم نوَّخه
وفرَّگ إمن الحومه كل شجعانها
* * *
فرَّگ الفرسان بيها إبصارمه
ونبَّه إبطعن الرماح النايمه
الچانت إتظن بحقدها إو حالِمَه
تنال منَّه بكيدها إو بضغانها
* * *
زعزع وهب ونسفها إبصولته
تگول صور ونفخه صارت هيبتَه
غيضه لجل حسين فارت فورته
وصعد لعنان السمه دخانها
* * *
نزل كَد المشرعه إبَرغم العِدَه
إو وفى للحره العقيله بموعده
وصل للماي السِبَگلَه أوشهّده
إعليه ميضوگه گيل عطشــانها
* * *
وصَدَّر الماهَمتَه لحتفَه المنون
وگال يحسين النفِس لجلك تهون
كظ المذَهَّب وجوده أعلَ المِتون
وگصد للنكرَت يشيعه إحسانها
* * *
إتلگته الماتصمد لملگه الجبيل
وراگت الجربه وغدى إبحيره الكفيل
حزن من شافه اليسر ملگه العليل
واليغيظ إبسطرته عدوانها
* * *
شَـمَّر وبيهم أخذ يسَره ويمين
وروَّع الكون إورعد بالمشركين
حال ملگاه ورموه من الكمين
وأگطعت يمناه الضاع إيمانها
* * *
صال والسيف إبيسرته اعلَ العده
ويومهم أسود عليهم نَكِّدَه
بانَوا اليسره إبغدرهم من بِدَه
الله يگطع نســــل كلمن بانها
* * *
ونزل عامود المنيـَّة بهامتــه
وطاح وسهام الغدر بيــه نابته
ريت ياحيدر تشاهد حالته
من وگع بالطف گمر عدنانها
::::::::::::::::::::::::::::::::::::::
نسألكم الدعاء
خادم أهل البيت عليهم السلام
الشاعر أبو عقيل الناصري
...................................

قناة الشاعر ابو عقيل الناصري
لاشي يتركه الزمان مقاوما .. الا الذي حمل الإباء شعارا
https://t.me/aa_ad9

گعدة / في الثورة الحسينية ودور الشعوب في مواجهة الطغيان وتغيير واقعها السياسي ....................
---------------------------------------------------
القصيدة:

ذوووب ................ ياگلبي بأحزانك
وسجّل حضورك هالشهر
لحسين مذبوح النحر
......... ياگلبي بأحزانك ..........

ذوب ياكلبي يجاسي ..للمصيبــة العالميـــة
الحلّت ببيت الرسالة .. والشريعة الاحمدية
غيرت مجرى العدالة .. بالتســــلط آل أمية
إو عِمدَت على بيت النبي
قتل وسجن سَمّ وسبي
يرفضها حتى الأجنبي
هالأفعال العنجهية
ثـااااار ....................... تطلبهم بثار
من عهد عدنان ومضر .. سرجت على أخيول الخطر
لحسين مذبوح النحر
...........................................

ظلي ياروحي حزينه وذوب ياگلبي وتفسَّر
ويافلَك خلي الكواكب .. تنتثر بيك وتفجّـر
وتنگلب هاي الفجيعة الهاشمية اليوم محشَر

ونحاسب إيزيد الوغِل
بميزان الأنصاف العدل
بيا حگ العتره تنچتل
وجيشك اعليهم تجسَّر
ديييييين ................. إشتطلبهم بدين
وخل نستمع ياهو النكر ... نهضة محمد وإبتدر
لحسين مذبوح النحر
............................................

وينكشف وجه الحقيقة الچانت مغطي عليها
وتتّفق كلهـا أعله نَبذَه .. وتتّبـِع منهـج وليـهـا
ومثل ماچانت عزيزة .. ترجع لشرعة نبيها

وتعود لله وتهتدي
وبمنهج الحق تقتدي
وماتظل تمشي اعلَ الجدي
وترجع الأمه لوعيها
وبــييين ................... كل الأمم كون
تنبذ الطاغوت الكُفَر . وإتبايع إبطول الدهر
لحسين مذبوح النهر
..........................................

تصبح الأمة منيعه .. بالتمســـــك بالعقيـده
وماتطـخ هامتـها للذل والمجد للحق تعيده
هناك عود أتقوم إلها .. قايمه وعزها تشيده

وتهابها كل الأمم
من تبتعد عن الصنَم
ومو كلمن وگام وحكَم
هي لتحَكْم التريده
هنااااك ....................... يعرفها الإيمان
والماضي بيه أشگد عبر . عندك محطه إبلا سفر
لحسين مذبوح النهر
...........................................

الأمة صح عالطاغي تصبر .. لاچن تراقب أداءه
ومن يمســها الظيم تضمر .. يوم ثورتها لعدائه
والشــــعب مهمـا تـقهـره .. القوة ماتقهـر ولاءه

إخـذ العبـر من كربلـه .. الرُفـعَـت مقـام المرجله
وأشرب عذب من منهله .. الشاد الإسلام بوفائه
المووووت .................. لأعداء الأحرار
إحذر العاقل لو صُبَر .. والعنده عزم المنتظر
لحسين مذبوح النحر

.............. ياگلبي بأحزانك ..........

نسألكم الدعاء
خادم أهل البيت
الشاعر أبو عقيل الناصري


----------------------------
قناة الشاعر ابو عقيل الناصري
لاشيَ يتركُهُ الزمانٌ مقاوماً .. الا الذي حمل الإباءَ شعارا
https://t.me/aa_ad9

في عزاء الزنجيل /بحر سريع
---------------------------------------
خليتك بعيني كحل ياسهر
زينب تنادي من وگع كافلي
وثوب الحزن مانزعه طول الدهر
بعد الحسين وصُحبته وكل هلي
.........................................

زينب تنادي وتندب بكربلـــه
وجه الغدر يهل الكرامه أنفضح
أخوتي اليوم أمطرحه بالفله
والشامت بهاي النوايب فرح
آنه الچنت بين أخوتي أمدلله
راحوا ودمعي اعلَ الطفوف إنسفح

بين الحسين بحشمتي والگمر
عباس الأزهر هيبتي كافلي

فرّاني دولاب الوكت بالخطر
وإنگلب عالي عزتي بسـافلي
.......................................

كعبه أصبحت بيّه المصايب تطوف
وآنه أطوف بكربـــله أعلَ إبحيرِتي
ياريت ماشفت إبحياتي الطفوف
ولاشِفت بيها أعلَ التراب أخوتي
وعالمشرعَه لاشفت ذيچ الچفوف
والهامه مرضوخه بعد هامتي

وياريت مايـَك لاجَـره يانهَـر
ولاشرب منك وإرتوى عاذلي

يجبال صبري ميدي إمن القهَر
وياگاع بوحوش العده إتزلزلي
...........................................

راواني وكتي بدنيتي الماجره
گبلي أعلَ حره بهالمصاب السِدَه
عفت أبو اليمه وصحبته إمطبَّره
سبعين ليث وبالعرى إموسده
وخليت سبع الگنطره إعلَ الثرى
ورحت ليزيد إميسره إمكبّده

والحزن حنَّه إضلوعي يومن عثر
بيّــه الدهـر ماخـلّــه عنـدي وِلي

وگلبي إنصدع ياشيعتي وإنفطر
وعالهزَّل الشـــامت نصب محملي
..........................................

من بعد ذيچ الحشمه وي الغُرب
أمشي يسيره أمكلفه بعايله
وأتحمل أسياط العِدَه بالدرب
ز التذري علينه أرماله الهايله
ومن مجلس لمجلس يشيعه أطب
وأطلع وأنه إجبال الهظم شايله

وماي عني الظالميــن النظر
وآنه الذي مابيَّن أخيال إلي

واللهب گلبي من الحزن وإنشجر
گيــد الحديـد البيه يعـالـج علي
...........................................

راودني وكتي إمراوَد إوصابِني
بگلبي وهدَم بيتي وطُفه ناظري
إو ويه اللي ماعدهم رحم عادِني
بعد أخوتي اتدولب لعد غادري
بمجلسه سَبني لمن شافِني
وگال أشتفه گلبي إونِلتْ واتري

ولا واحد الرد شتمته من جِسَر
وبعد أخوتي إيرد شتمته ياهو لي

ولا واحد إعليه إبتِدَر من كُفَر
بالوحي بأبياته ولطم حلگه لي
.........................................

والراس جابوه إبطشت من ذهَب
وحطوه يشيعه إگبالي بمحضره
وإنصدع من شفته الگلب وإنشعب
ينكث شفاه السبط بالمِخصَره
وعليه تهاوت فاطمه من العَجَب
من شافته وماتت على منحره

والشام عدهم عيد يوم الكِدَر
وآنه الحزن والنايبه بمحفلي

ياهو اللي مثلي بالدواهي صُبَر
وياهو اللي مثلي إببلوِتَه مبتلي
...........................................

وردّيت للدار إبطرگ لوعتي
إوجمت المناحه إعلَ أخوتي والعزه
دهري غزاني ولارَحَم عبرتي
ومايرحَم العبرَه الوكت لو غزى
فرهًد احبابي إوعافني بشوغتي
ورمحَه بحشا بيت النبي ركّزه

هذي عَمِلتَك ماجرَت يادهَر
يالوحَّشِـت بالنايبه منزلي

شنهي الذي من اهل الرساله بِدَر
يابين حتى من الأرض ينجلي
...........................................

نسألكم الدعاء
خادم أهل البيت عليهم السلام
أبو عقيل الناصري

---------------------------------
قناة الشاعر ابو عقيل الناصري
لاشي يتركه الزمان مقاوما .. الا الذي حمل الإباء شعارا
https://t.me/aa_ad9

عهد لأحياء شعائر الله في عشرة عاشوراء يهتف به الموالون كل عام معاهدين الحسين ع لأقامة مجالسه :

....... ((( عاهدناك))) .......

يايوم الطف عاهدنـــاك
لو للمحشر ماننســـاك
نقسملك بحسين نذكرك
يل بگلوب أحبابك جمرك
........ لو للمحشر ماننساك ........

عاهدناك ومانتراجع
يايوم الطف عن مبدأنـه
ونبقى أوياك بنفس المنهج
ويامنهج يدنـه لمنهجنـه
وبوجود المنبر والمجلس
ووجودك نصنع وحدتنـه
ومن نعرف شَي عن مضمونك
تـتـآلـف عالحق كلمـتْنـَه
( وإتحدينـه وبايعنـاك
عالموعد نجري بمجراك )
.... ونقسملك يايوم إبسِــفرك ....
لو للمحشر ماننســـاك ....................

ونبقى بثار إحسين نطالب
ومانتنازل عن إحسين
ومانترك عهده وميعاده
وياهو اليترك نور العين
وأحنه اهل الدين أويالغايب
الياخذ من عدوانه الدين
وهالمأتَم بالحگ مأتمنه
ولجله أنشيّب گلب البين
( يل مَركب حبنَه بمرساك
نحبك ونسير بمسراك )
.... أكتب ومن المنحر حبرَك .....
لو للمحشر ماننســـاك ...................

يحسين الغالي وحر چبدك
وچفوف الكافل عباس
نتحده الظالم لعيونك
لو تتكالب ضدنه الناس
ورغم المشهد نحيي أيامك
مادامت بينـه الأنفاس
والرادوا عنَّه إيمنعونك
والله إنطگهم راس براس
( يايوم الطف نتفدّاك
ومانتوالم وي أعداك )
.... شيعه إونستلهم من صبرك ....
ولو للمحشر ماننساك ...................

يايوم وموقف أبطالك
الكل موققف مازاد اعليه
يالمحَّد يوصل يم قدرَك
وصبرَك محَّد يوصل ليه
ولو ماقوة صرخة دمَّك
ياهو الأســلام يعلٍيــه
ياهو اليترك يومك يگدر
وبماي السكته إيبدّيــه
(ربك أيَّد لك مسعاك
يالوَي ربك هاك بهاك )
.... ياعَبره التهجَع وتعبرك .....
لو للمحشر ماننســاك ..................

يايوم وحَر چبد حسينك
وعبد الله الماضاگ الماي
وچفوف الكافل عباسك
وكل بايِع بيك وشرّاي
نبقى إبهذا المأتم مشعَل
شما يتباين عدنه الراي
وگول إشماتطلب نفديلك
ويرخصلك من هاي وهاي
( شما نبعِد عنك نلگاك
ونرجع نتمسَّـك بِحْماك )
.... يالمايخفَت بالحق جَمرَك ....
لو للمحشر ماننســـاك .................

يايوم الطف يومك بينه
خله أهواي أهواي أجروح
چم لهل البيت أعله أترابك
ظل يوم العاشر مذبـــوح
أويَل مِن عندك زينب ياهو
الگالاها وللشـــام وتروح
ويادَم بيك أو لهل الكَلفه
الله .. وِشبصرَك مســفوح
( يايوم أمنذكر طرواك
بالعالَم تهدر بَلواك )
..... يايوم وعند الله أشكبرك ....
........ لو للمحشر ماننساك .......

نسألكم الدعاء
خادم أهل البيت عليهم السلام
الشاعر أبو عقيل الناصري
...............................

قناة الشاعر ابو عقيل الناصري
لاشي يتركه الزمان مقاوما .. الا الذي حمل الإباء شعارا
https://t.me/aa_ad9

موشح / في مصيبة الطفلين المظلومين أولاد مسلم بن عقيل ( ع ).....................

بيا جريـمه أولاد مسلم تنـطلب

حتى يذبَـحُـهم يزيـــد بلا ذنب
.....................................................

بيا جريره أطفال أبو طاهر تهج
ونار الأحقاد بمخـــيمهم تــــوج
وليش خيل الشر وراهم تنسـرج
اطفــال والعسكر عليهم منگلب

*******************

من بعد حرك الخيـام بكربلــــــه
فرَّت أطفــــــال المخيَّم بالفَـــله
ومن ضمن من فروا بهالمعضلـه
لمسلم أثنين ومدامعهم تصـــب

*******************

أطفال بأعمـــار الزهـور ، ولاجُرُم
عدهم وفـــــروا يويلي من الظلم
ويا خصيم إلهم حِقِـد كامن يظم
حتى يتبع هاليتامــــه بكل درب

********************

ياهو يطلب مســــلم وأولاده ثـار
وطلع يتحرَّى ليتـاماه المســـــــار
ويارسول أعداه غل مشـتـعله نار
من خطب جابوه بهالدنيا لخطـب

********************

يا مصاب أطفال مسـلم بالزمان
الفروا من الحرب يردون الأمان
مادروا بالحـارث البـاع الجنـــان
ناصب الهم وين ماراحوا نصب

*******************

ناصب إلهم وين ماراحوا كمين
وبايـع آخرته بدنيـــــــاه اللعين
ظفَر بيهم ( آه ) ياللمســــلمين
مو گلب لا من صخر عنده گلب

******************

ليـش تـذبـحنــــه يهذا بلا نفــــع
وباجر إبدمنه تجي بيوم الجـمـع
أرحمنه للغربه وعمرنه وهالدمـع
وعوفنه ولاتدخل علينــه الرُعب

*******************

عوفنـــه لـو چـان عنـدك معرفـــه
بجـائزة جدنه الرسول المصطفى
وآحنه يالحـارث أهل بيت الوفــه
ليش مالك تعلن علينـــــه الحرب

********************

گال جائزتي وغده بســـيفه يشير
گبل جدكم بيها واعدني الأميــر
مسألتكم مســــألة حظـوه ومصير
وزادهم هذا النذل صفع وضرب

*********************

گـالوا انچـانـك عِزًمْت على الأمر
بيـعنــه وبيـها ألك ربح و أجـــــر
گال مأضيـّـع تـعـب كل العــــــمر
وأقرب إلكم هالمراد من السُحب

*******************

بيــا ذنب طاهـر وأحـمـد ينذبـــح
ومن گبل مسلم رموه من السـطح
حتى لو عدهـم جُـرُم هم ينصفـح
أطفال وبسنهم يشعبـــــون الكلب

نسألكم الدعاء
خادم أهل البيت عليهم السلام
الشاعر أبو عقيل الناصري
..........................................
قناة الشاعر ابو عقيل الناصري
لاشي يتركه الزمان مقاوما .. الا الذي حمل الإباء شعارا
https://t.me/aa_ad9

نصاري في لقاء العقيلة زينب ع يجابر بن عبد الله الإنصاري في أربعينية الحسين ع

((( يجابر ماألومك )))

يجابر ماألومـك ضيعتني
ياعمي المصايب غيرتني

يجابر زينب آنه وهذا حالي
بالطف ضيعت عزي ودلالي
خلاني زمـاني إبلايـه والي
حگك من شفتني مَعرَفتني

ياعمي الهظم فتت لي روحي
ونكبات الزمن لچمن جروحي
ومليت وجرِت من كثر نوحي
وبالطف المصايب گوّضتني

يجــابر روحي جارت من زمـاني
أورِگَد حيلي عله مصاب الدهاني
ألف وســـــفه الوكت وليه ولاني
ومُـرّات الليــــالي ومرمَرَتـني

وبالطف عالصعيد حسين عفتَه
ونايـم عالنهر عباس شـــــــفته
ياوســـفه الكفيل يفارگ أختـه
مصايب كربله إثگال وسِـبَنّي

ونكبـات الدهر طفَّن أشموعي
وعالوليـان مانشــفن إدموعي
يـاعـمي بـعـدهــم زاد روعـي
مدري منين هالمأساة إجتني

ياعمي وبعد عزنـــه يســـاره
رحنه ومدمـع العين يتجـاره
شـگد دار الزمن بينه بمـداره
مصايب مو مصايب عذّبَتني

نسألكم الدعاء
خادم أهل البيت عليهم السلام
الشاعر أبو عقيل الناصري
قناة الشاعر ابو عقيل الناصري
لاشي يتركه الزمان مقاوما .. الا الذي حمل الإباء شعارا
https://t.me/aa_ad9........................................

قصيدة في ذكر مآثر ومناقب إبي الفضل العباس عليه السلام ................

((( شيخ الوفَه العام )))

شيخ الوِفَه العام ... كظ حد الخيام

بالطف مشهوده أيامه
عباس الحر وإقدامه

أسمك بالأيام ..... شيخ الوفَه العام

:::::::::::::::::::::::::::::::::::::::::::::::::

عبـاس البَـطـل راعي العـلم والجــود
شـــاهد للبطـوله بكربلـه ومشــــهـود
دگ ساس الوفه وللخوه خله احدود
وگلب زينب هِدي مادام أهو موجود

ياهو اليوصل يم زوده
وياهو اليتحدى أحدوده
وبچفه صمصام ... گظ حد الخيام

شـــــيال العلم وگفـــاتــه معروفـــه
تتبـاهى العَزيـمــه بزوده وچفوفـــه
تعال أدخل حضرتَه بنفسك وشوفه
شموخ وكبرياء وغيره مرصـــــوفه

الغيره المابين أجروحه
للطف شايلها بروحه
تشهدله الأيام ... كظ حد الخيام

شــبل المرتـضى وتلميـذ أبو اليمَّـه
يكشــف لو تداعى الظيـم كل غُمَّـه
ولو صال وغضب ياهو اليصل يمّه
شهامه وتضحيه بكل موزمه وهِمَّه

والمشــهود لميـدانه
بعزمه وقوة إيمانه
عالذلَّه مانام ... كظ حد الخيام

بطل عن مكرماتـه تســولف علومه
لو طب للمعـاره إيضعضـع الحومـه
وگمر فوگ المناقب طلعت انجومه
وللكلفه الأســــــد عَنـوَة الملزومــه

وآيات العز مكنونـــه
تجدح مابين اعيونه
صمصام الأسلام ... كظ حد الخيام

أخو زينب كفيــل ام الـخدر يُـكفَه
إله بعاشــــر محـرَّم عالنَّـهر وگـفَـه
ظلت للوفَـه ليوم الحشــر وصـفَه
الكَتَب بيها سِفِر لأهل الوفَه ووفّه

خط أبدم نحره أكتابه
وماهم للموت وهابه
وأتحدى الأسهام .. كظ حد الخيام

وبعد موقف يظل بيه الورى أمتَيَّم
گطع نفس الحچي بعباس المشـيَّم
من جاب الشـــــريعه لحدّ المخيَّـم
وكســر حرّ الظِمَه اليم الخيَم خيَّم

من جاب الماي أبجودَه
وشرَّب كل الموجوده
مامثلَه مقدام ... كظ حد الخيام
***

نسألكم الدعاء
خادم أهل البيت عليهم السلام
الشاعر أبو عقيل الناصري

ملاحظة / انت بأختيارك ان يكون الربط على (كظ حد الخيام) أو (شيخ الوفَه العام)
............................................
قناة الشاعر ابو عقيل الناصري
لاشي يتركه الزمان مقاوما .. الا الذي حمل الإباء شعارا
https://t.me/aa_ad9

قصيدة في مآثر أبي الفضل العباس عليه السلام ............................

((( بيرغ شهامه )))

عباس البطل بيـرغ شهامـه
يبقى يرفرف ليوم القيامـه

ياعبـــاس ياتـاج العلى الراس
يالوجهـك بوجه الظيم نبراس
يانوماس كلمن عنـده نومـاس
ويـارب الندى ورب الكـرامـــه

**************

يارب الوفـــه البالكــون معـروف
عميه عيون كلمن يرفض يشوف
وفرع الطيب بالطيبــات معروف
بفعله ومشهده ومشــيه وكلامه

**************

عبـاس ونـِعـم من منبـع الجـــود
ماعنده بجهــاده وغيرتـه احدود
الكافل فارس الفرســــان معدود
وريشـــاته البطـل للصد علامـه

*************

وطب عباس للميــدان مســــرور
وبكون الحرب خاض الوفه بحور
نـفخ من صال بيهم نفخـة الصور
ومن ضهضـب حضر يوم القيامه

**************

وبالطف يوم إلـه الأزهر بالأكــرام
باع الروح بالطـف لجل الأســـلام
وجـف عبــاس ماصـافحله ظُـلّام
ماهـان أو بذل روحــــه لأمامــه

*************

عبــاس إنتـفـض لجــل العـقيـده
وأطه الســيف حگ السيف بيده
باســـــل ماتـرك نصرة عضيـــده
وغيظ من أشتعل شافوا ضرامه

*************

عرفــوا مـن برز عبـــاس معنــاه
يوم أعله النـهر ظل ثابت إلـــواه
لو شـَـد ، گـام شَـدّ الموت ويـاه
ويبرج لو برز بالحگ حســـامه

***************

وفٌـه إبيمـينه لدينه وشـــــمالـه
ورد الصـاع لجـيـوش الظـلالــه
الگمـر ياحيـف عالمگـدور غالَــه
الوين اليوصل لوصفَه ومقامـه

**************

حيد وظل يســـولف زود وأفعال
وعن الدين شـال حمـول الأثكـال
يكفيـك المواقـف شــان الأبـطال
وحيَّ الله الغطاريف النشــــامه

**************

نسألكم الدعاء
خادم أهل البيت عليهم السلام
الشاعر أبو عقيل الناصري
...................................
قناة الشاعر ابو عقيل الناصري
لاشي يتركه الزمان مقاوما .. الا الذي حمل الإباء شعارا
https://t.me/aa_ad9

((( ياللي تسـأل ليش نلطم )))

ياللي تسأل ليش نلطم على حسين ومقتله
حسين ريحانة الهـادي وراح مِنَّه بكربله


ياللي تســــأل ليش نلطم يوم عاشـــور ونون
وليش من دون البريــــه نعـلك أعــلام الحزن
وليش مدمعـنه يصب بهالشـــهر صب المزن
أســـــمع وأخذ الجواب الكامل لهالمســــــأله

*
أسمع وأخذ الجـواب الشـــافي من هذا الجمـع
وبالك تعـوف الحقيـقـه وتنكــر أحكــام الشرع
آنـه أرشــــدك عالطريق البيـــه وصلنه لهالنبــع
وانته بس تمشي اعلَ درب العدل حتماً توصله


وكونك تريد الشــريعه وماي منهلهـا الصُفَه
أحـنه مـنهلنـه الموقَّـــر منهـل آل المصطـفى
أتقرَّب وعوف الصـدود وأشـــرب بنهر الوفه
والله منـبـَعهم يعجبَــــك من تجـــرب منهله


والله منبعهـم يســــرَّك من تمت بيـه الـوصل
يســـتمد فكره ونظامه بهالوجود من الأصل
يربــط الروح بطريق الأسـتقـامه ويـه العقل
وعله مو سبعين محمل يحمل أكثـر مَحمَـله


وانتــه لوضايع عليــك بدنيتك هذا الســبيـل
اتمسك بآل الرسول وتشرب من السلســــبيل
وبالك تميل اويه كلمن وي هوه الموسم يميل
ولابـد اتحـدد مســــيرك بأتجـــــاه البَــوصله


البوصله عله الحق تشير لمنهج ابن المصطفى
الخاض ميـدان البطـولـه وكتب بالـدم مـوقفَـه
حسـين مصبـاح الهـدايــه وفكـره نهج المعرفه
حسـين غيّـر من تـوزم كل سـمــات المــــرحله

*
حسـين زلزل يوم عاشر من هتف دولة يزيــد
وثبّت الدين بثورته بواقع الأمه الجديـــــــــد
حسين للمؤمن يَسائل بالحشر أكبر رصيــــــد
وعون للشـــــــــده يسامع لليطيح بمعـضله

*
حســين گال الهادي عنه ونقلت أقـواله الصحاح
(حسين مني وآنـه منـه) حسـين مفتــاح الفلاح
(حسين سيد كل شباب الجنه) وبوجهه الصلاح
ويـرد كل سـنّة محمـــد أي بشــــــر مايِقبـَــلَه

*
أذن هذا أعلى الرسول وعله الأسلام العزه
ونعرف بقلب أبو القاســــم قدر سبطه ومركزه
ويـاهـو للمصطفى وآلـه ببخـتـك أيـرد الجِـــزه
وهُمــــه إلهـم عـد إلـه الكــون أعظــــم منـزلـه


نعــم بالمصطفى الهــادي وعتـرته الطيبه الأمل
والوصيه الوصّى بيهـــــا بمنـزله خيـر العمـــل
بيهم أنـوار العقيــــــده أزدهت والدين اكتمـــل
والعمـل كل قيمـــه مــاله بلا ولايـــــه اتكمـــله

**** * *
نسألكم الدعاء
خادم أهل البيت (ع)
الشاعر أبو عقيل الناصري

قناة الشاعر ابو عقيل الناصري
لاشي يتركه الزمان مقاوما .. الا الذي حمل الإباء شعارا
https://t.me/aa_ad9

لطمية نندب فيها مقتل الحسين :

(((واحسينا واحسين)))

ياسبط خير البريه ...... واحسينا واحسين
وياشبل حامي الحميه ..
وشمعة الدنيا الضويه ..
ونبعة الهادي الأمين ..

يلي أعظم يوم يومك ... واحسينا واحسين
الكَوم غير وجوه كَومك ..
من نشرتلهم اعلومك ..
بيّن الحقد الدفين ..

صاحوا بيوم المحربه .. واحسينا واحسين
الكَوم ياثارات عتبه ..
والوليد وثار شيبه ..
من أمير المؤمنين ..

شلون ريحانة الهادي ... واحسينا واحسين
أتحاشمت ضده الأعادي ..
شيعتك بأسمك تنادي ..
ياإمام الثقلين

ليش هذا الحقد والغل ... واحسينا واحسين
عالكريم اليرفض الذل ..
هيج ناس أضغان تحمل ..
وصوتك الحق المبين ..

ناس ماتهوى الكرامه .. واحسينا واحسين
هتكت الدين ونظامه ..
باعت العز والشهامه ..
بآل أميه المفسدين ..

باعت العز والرساله .... واحسينا واحسين
بناس ماعدعم عداله ..
وتبعت أذناب الضلاله ..
وما وفت للمهتدين ..

داروا أعله أحسين كلهم .. واحسينا واحسين
وأتضح مكنون غلهم ..
ماكو كل طغمه مثلهم ..
من العتاة المجرمين ..

الله وأكبر ياأمامي ..... واحسينا واحسين
طاح بالميدان ظامي ..
ليش هالمذبوح دامي ..
تصيح كل العالمين ..

وليش ظل أعلَ الشريعه .. واحسينا واحسين
صاحب العزة المنيعة ..
وياسبط بيده رضيعه ..
ماشرب ماي المعين ..

ويلي للحزوا ركَبته ...... واحسينا واحسين
ولأهل بيته أو صُحُبتَه ..
ويابطَل مثله أبغربته ..
أستوحدوه الظالمين ..

ويلي ويلي أعلَ أبو الغيره .. واحسينا واحسين
وعيلته الراحت يسيره ..
من يعز الحق نصيره ..
يطيح بين المعتدين ..

الله يلعن آل أميه ..... واحسينا واحسين
ماسكَوه شربة أميه ..
حاصروه بالغاضريه ..
وطاح مكطوع الوتين

واحسينا ......................................

خادم أهل البيت (ع)
الشاعر أبو عقيل الناصري

قناة الشاعر ابو عقيل الناصري
لاشي يتركه الزمان مقاوما .. الا الذي حمل الإباء شعارا
https://t.me/aa_ad9

في حب الحسين ع والثبات على إتباع نهجه المقدس

يحـسـين أوياك أوياك ... حـتى المنيه
وأنصيـح الثــار الثـــار ... مـن أل أميه

...........................
يحســـين وياك وياك
مو وي عدوَّك
عدوانك ينخفضــون
وانتـه أبعلـوَّك
يحسين وماننســـاك
ويتعب سـِـلوَّك
وماننسه البالطف صار .... ذيج المسيه

يحســـــين الما يفداك
يهلك حسافـه
وهاي أســنين التاريخ
بيها انعطافـه
ونتقـرَّب مـن معنــاك
رغم المسافـه
انحبك يبن الكرار ...... حامي الحميه

يحسين مصابك نــار
تلهب عجيبه
كل واحد بيـه مرتاب
هوَّه وحليبــــه
وتظل بوســط الروح
هـاي المـصيبه
الگطعت كل الأحرار ....... بالغاضريه

واويلاه أعلَ أحسين
هوَّه وعضيده
وأعلَ الطفل العطشان
الگطعـوا وريـده
وياويلي على السجاد
الماذينـه قيـده
وياويلي على الأنصار ... أهل الحميه

ويلي لسبط المختار
وروح ألنـبـوَّه
المـاتگدر تـتحــــــداه
بـالدنـيـــا قـوه
وكل طاغي أندگ أوياه
راح إبـعِـتــوَّه
قاهر كل الأشرار .......بهاي البريه

يحســين ودمك ثار
يجـري بدمانـه
واليهتف يامظلــــوم
يحجي بلســانـه
وبجمـرات الإحـــزان
فـگدك جوانـــه
بفگدك يبن الأطهار .... عظمى الرزيه

نواسي اليوم أهل البيت
وأهـل المَـودَّه
وندريها بفگد حســـــين
شـِـدَّتهـا شِـدَّه
راودهـم ســــــهم البيـن
وتعـده حـــده
علّتهم هالابرار .... تسري وخفيه

يابو الطف يامظلوم
نبقى على عهدك
ونجـددلك كل عــام
ذكرى على فگدك
ويامهظـوم المأسـاة
عشـــناها بعـدك
وصارت كل الأقدار ..... ضد الضحية
------------------------
نسألكم الدعاء
خادم أهل البيت عليهم السلام
الشاعر أبو عقيل الناصري

قناة الشاعر ابو عقيل الناصري
لاشي يتركه الزمان مقاوما .. الا الذي حمل الإباء شعارا
https://t.me/aa_ad9

قصيدة ولائية ( شعر فصيح) في القضية الحسينية .

((( كتب الحب ولائي )))

ياشهيدَ الطفِِّ من فيض دمائي
كتـبَ الحبُّ على الأرض ولائي

وعلى عهدي ------- لأولي المجدِ
كتب الحبُّ ......................

ياشهيدَ الطفِّ عهداً .. كتَبتهُ التضحيات
يتحدى الموتً قهراً .. رغمَ أذناب الطغاةْ
إنني شعبٌ عظيمٌ ..... قد تحلَّى بالثباتْ
لم أخَفْ خوضَ المنايـا . للمياميـن الأُباة

وعلى الوعدِ ----- لأولي المجدِ
قد تجلّى العزْمُ بيْ من كربلائي
********
قد ترَكتُ الكونَ طُراً ... لنداءآت الكفاحْ
وتوجهتُ بعزمي ..... نحوَ أبوابِ الفلاحْ
كيفَ أبقى في سكونٍ ... وبلادي تستباحْ
وأنا فوقَ جبيني .... لهوى السبطِ وشاح

فعلى بُعدي ----- لأولي المجدِ
رفعَ العشقُ الحسينيُّ ندائي
***********
قد تجلبَبتُ التحدي .. والمنى نيلُ الشهاده
وعلى وجهِ إنتمائي ... يزدهي زهوُ الإراده
لا أرى الموتَ أَمامي .. في الهدى إلاّ سعاده
إنما الإنسانُ يحيى .... في المعالي بجهاده

وعلى قصدي ---- لأولي المجدِ
ثائراً قد صنعَ الطفُّ وفائي
************
كربلاءَ المجدِ عهداً ........ بدماءِ الشــهداءِ
سوفَ نغدو بالأماني ... من ميادين الفداءِ
وسَــــتَجتازُ بلادي ..... منتـهى هذا العناءِ
وسَـيًبقى لأبي الفضلِ ... لِواءٌ في السماءِ

هذا جُهدي ------- لأولي المجدِ
فَبِهِمْ في ملتقى الحشرِ رجائي
***********
قد عَبَرتُ البحرَ نصراً ..... لإمامِ المتقينْ
وقطَعتُ البرَّ أشدو .... يالثارات الحسينْ
فدماءُ السبطِ ثأرٌ ..... ماثلٌ في كلِّ عين
سأنادي ياحبيبي ....... ياشهيدَ القبلتين

وعلى رُشدي ----- لأولي المجدِ
سوف يشتدُّ على الجَورِ بلائي
************
نسألكم الدعاء
خادم أهل البيت عليهم السلام
الشاعر أبو عقيل الناصري

قناة الشاعر ابو عقيل الناصري
لاشي يتركه الزمان مقاوما .. الا الذي حمل الإباء شعارا
https://t.me/aa_ad9

..... ((( شرف الخدمة ))) .....

شرف للنـاس هالخدمه الحســينيه

يحســـين اليحط ابخدمتـك روحه
بس يشــتم عبيـرك يبرن اجروحـه
وخسـران ، العنب طرواك ميلوحه
أنتَ البـالفـلَك يزهن محاچيَّـه

يابدر الكـرامــه اليـزهَـن أنجـومك
وبدم الشــــهاده أمعطره أهدومك
بأيـام الدهـر ، ماكـو مثـل يـومـك
يالبالطف طَلِعتَك طلعه قدسـيه

مـن أول لَحَـظ يالهاشـمي ونـظـره
ضگنه من المهَد حبك على الفطره
يبـن المصطـفى وريـحــانة الزهره
مانتـرك محَـبتـنـه الولائيــه

إنمـوت ومانبـدّل وي مَحَبْتَـك راي
ياماي الحيــاة الماشــــــرَبت الماي
حتى الحزن يعزِف من يذكرَك ناي
وناي الحزن يُعرف منهو راعيه

تـتـبـاهى العـوالـم وصـلَت المرّيـخ
وأحنه أبخدمتك نتباهى عالتاريخ
يلّي أبثورتـك آمنـت حتى السـيخ
أو عرفت نهضتـك نهضه إلهيــه

مدعـاة الشـــــرَف للناس هالخدمَــه
راعيــها إلـه بنشــــــر العلـم كِلْـمَــــه
وهَد عرش الظلم يوم أنتفض بِسْمَه
أو غيَّـر مجرى تاريـخ العبوديــه

روح بروح نتفادَه أو يبو الســــجاد
وبـْرَهن الأشـــاره أويـاه عالميـعــاد
لو نـفـرض زمانـك يجمَـع الأضـداد
نبقى أوياه أعلَ أعناد الظلاميه

نسألكم الدعاء
خادم أهل البيت عليهم السلام
الشاعر أبو عقيل الناصري

قناة الشاعر ابو عقيل الناصري
لاشي يتركه الزمان مقاوما .. الا الذي حمل الإباء شعارا
https://t.me/aa_ad9

في السير في نهج أبي الأحرار عليه السلام .................

((( تحلى الشهادة )))

بدربك يبو الأحرار تحلى الشــهاده
وبفضلك الأســلام شاف الســـعاده

بدربك يبو الأحرار نمشي بعقيــده
ولجـلك يعـز المـوت عنــه ونريـده
وعـهد اليحبك صاح من دم وريده
مايـقـهــر الطغيــــــــان دم الأراده

نمشي إبعهدنه إوياك رغم المخاطـر
ونتشــــرَّف بتعـظيم هاي الشــعائـر
هـاي المواكـب نــور لأهل البصـــاير
ولليدرك المعـروف حكمـه إو رِفاده

هاي المواكب نور ، وبهَدْيَك إتســــير
وكل القلوب إخلاص ولحبك إتشــير
ويالـخِدْمِتَـك تقديــر للـمـالــه تقديـر
وياهــو المثل معنــاك فـاز بجهــاده

يابو الكــرم ضحّيـت بالغـالي للناس
واختــارك التـاريـخ للأمـــة نبــراس
نور الوفـه أتطفيـه هيهات الأرجاس
وأنته الجليل أنطـــاك تاج القيـــاده

أوتضْحيتك أنته بيوم عاشـر محرم
محَّـد مثـلها إهنــــاك واحــد تقــدم
لاچَن وجـه ســــــفيان ضدك تِجهَّم
وذاك الوِفـَه الوَيّــــاه ضاع بحِماده

ضدَّك طغًت يحسـين گوم آل أميه
والتـِنـْكر المعـروف مـو آدميــــــــه
دمَّك حســــافه ايصير آخر قضيـه
للمايـقـدر الطيـب والعِنـــــده راده

لا ما تهـاب المـوت خـدّام الحســـين
وأعلَ العهد باقيــن بالعـزه ماشــــين
ومن جـود أبو السجاد لا مايخيـبون
وبالآخره يشـوفون حُسْــن الوفـاده
......................................

نسألكم الدعاء
خادم أهل البيت عليهم السلام
الشاعر أبو عقيل الناصري

قناة الشاعر ابو عقيل الناصري
لاشي يتركه الزمان مقاوما .. الا الذي حمل الإباء شعارا
https://t.me/aa_ad9