تۀ چې قربــــان شوې د کوم ملک په ازادۍ شهيده
هلته دې مور غواړي په سوال باندې ډوډۍ شهيده

ښه تــــا قيصه د شــــاه جهان د تــــاج محل کوله
قبر يې چرته دے را يــــاد شوه مېـــمونۍ شهيده

نن به د خـــان لور سيــاست کوي ايوان ته به ځي
پرون د دې خاورې پــــه ننــګ شوه ملالۍ شهيده

کشمير به هم ازاد شي ستا قدر هم دومره وو چې
مـــاشوم بچے دې ګــرځوي پکې بــــوجۍ شهيده

الله دې معاف کړه خو داجنګ دخداے په لارکې نۀ وو
پــــه دې اخيستې وې ملا او خـــان روپۍ شهيده

خلک دې اوس هم د عــــزت غل او بدنــامه ګڼي
اے مؤمن خــــانه د کمبختې شېــــرينۍ شهیده

کاروان مومنده د عسکرو شهــــادت کې شک دے
خو ځه بچو ته دې تــــمغې شولې ډالۍ شهيده
Khan🥀🖤