- تستاهلني
بس بعديش
لا مرخوصلي أشتم بيك
گدام الخلگ كلها
وأگلهم حضنك أفيّشي
ولا عشگي غلط، وأنساك
وأحسبنك ضمن طيشي
لو منك وجه ملگه
چا وصيتلك عيني
ولو تنباگ، چا بگتك
بس عطرك يسويها ويدليهم، مثل ما چان يدليني
علمني، شسويلي ؟
أروح ليا حضن لو بردن سنيني ؟
شگلك ؟
وانه گايلك
غيرك مو رزق عيني
علمني
أمد ليا ضوه، خيالي
علمني
أذا مر ليلي من دونك
شسوي وما تجي ببالي ؟
شسوي وما تفيض عيوني وأبچيلك ؟
علمني
منو اليندلّك بروحي ؟
خاطر من يزيد الشوگ وأتأذه
يشلع كل تفاصيلك
شسوي وغيبتك مستلمه عافيتي ؟
كون تشوفهم وتضوگ تاليتي
عفتني لناس
ما بيهم وجه يستاهل أحچيله
عفتني لناس
لون عيونهم ما يسوه أغنيله
عفتني وظال كل عقلي
أذا اشم صورتك حسبالي مشتمك
وألملم بالأخبار الجايبات أسمك
وأثث بيهن ظنوني
يتارسهم
بذمتك كل فراغ مگابل عيوني
يتارسهم
يالمفرغني من كلشي
رغم كلشي
أذا تحچيلي، ماچذبك
لگيت بوجهك الزهري
لهفتي لتكملة عمري
ولگيت الطايحات من العمر، بيدك
وراويتك الماراويته لعيوني
وأتشهنّك الما شبعن بزغري
وگلتلك كل مسامة بخاطري تريدك
اذا اسألك
شنو الضوالك وما گامن يعجبنّك عيوني ؟
أذا اسألك
شنو الما صابغه بلونك
حتى تضوج من لوني ؟
شتگلي ؟
تستاهلني !
چا بعديش ؟
هسه ومن غفت كل وينك بروحي
هسه ومن بديت أصحى
جاي تگلي بس سوالفي تفيدك !
چا والفرگة ؟
" زيد الهاجري "
