الشاعر رائد الناشي

اللهم صل على محمد وآل محمد وعجل فرجهم

وأثاري المايعرف حسين ماتوالم ويالله ...
,
الحسين .. تسبيحة الملائكة ❤❤❤

حتــه الضـوه يحسين مـات بعــاشـور
كلشي انطفه وبس انته وجهك يضوي
صليت لــ الله بنيـــة الشـــارب مـــــاي
وانت الهـــوه مــن يطب ريتك يــدوي 💔
,
صلى الله على عطشك ياحسين 💔💔

بخت يرادلي هوايه حته احظرلك قراية
المجــالس هاي تربيتي
بالقـراية نعرف صيتي
جنـت مــا اعــرف حجــايـة
,
العفو سيدي ابا عبدالله 💔

بس لا مأذيك الرمح عباس خويه شلــونك
ارد ابدي وياك العتب بس استحي منعيونك
وحده السهم طافيها
وحده الدمه مغطيها
يتعمدون شما نصد جدامنه يخلونك
ــــــــــــــــــــــــــــــــــــــ
يـل بيه عـايش مـن زغــر عبـاس يابعد آنــه
يــل جنت الوليلك لمن تغفه واضل سهـرانــه
شيسوي راسك ع الرمح موهاذه موش مجانه
شو صيح بسمي وخل افز بلكت صدكَ حلمانـه

عباس خويه مروتك
مشتاكَه اسمع صوتك
يل علمتني عللوفه لاتجفـي اليحبونك
ــــــــــــــــــــــــــــــــــــــ
ماصدكَت كَالـو صرت كَلبي اعلـى نــار متانيك
حسيت روحي منالجسد كَبل الجـدم ركَضت ليك
تغفـه اعلـه متنـي تعــودت حتـى بمهـد ماخليك
شــو بدلت متنــي برمـح معقــوله متني يـأذيـك

عبـاس ماترهم هـــاي
بخت الرمح تالي رباي
مـاغمض لزينب جفـن يل غمضيت جفونك
ــــــــــــــــــــــــــــــــــــــ
شلــونك يلمعزب السهم بعيـــونك وطفاها
يمســـوي واهس للرمــح محد كَبل سواها
متنومس براسك يهز طــول الدرب جاباها
اول رمــح يلبس كَمر مو حكَه من يتبـاها

والرمـح متنـومس بيك
يل مـاعرف بيـش ارثيك
حارسنــي راسك بالدرب يالماتعوف ضعونك
ــــــــــــــــــــــــــــــــــــــ
ماابجي خويه منالالم بالسوط لو ضربوني
بس خايفه يروح الاثر خدك الفوكَ متـونـي
بالكَوه اصدلك واستحي يابعد وجهي ولونـي
عباس ميته منالخجل جي سالمات عيـونـي

تمنيت كون اعميهن
ولاشوف راسك بيهن
مجسوم نصين بعمد والسهم غير لونك
ــــــــــــــــــــــــــــــــــــــ
كل شي اختلف لمن رحت والضحكه صارت دمعه
وحتى الكَمــر مابي ضــوه ويدايـن منـالشمعه
ماينسمــع صوت الدمع بس هسه كَمنـه نسمعه
عبــاس شـو حتى الشمس مـابيها ذيج اللمعـه

كل شي بغيابك صحره
والليـل مــابــي كَمــره
وحتى الهوا يضيج الخلك ياابالفضل من دونك
ــــــــــــــــــــــــــــــــــــــ
يالكَاعــد بكَلب الرمح عبــاس اريــد اشتَمّك
دنكَلي خــل آخــذ نفس مختنكَه جـي مويمك
اتمنـه اســويلك ضره خــافن الريــح تلجمك
بس بالعبايه شجم حركَ منضرها خاف يألمك

مـابيك لجمه انــوبه
وي عينك المصيوبه
وآنه ادري كل ما انضرب جدامك يلجمونك
ــــــــــــــــــــــــــــــــــــــ
هنياله نهر العلكَمي عباس غـافي بجـــرفه
يانهــر كَبله بهل بخت نامت الجنـــه بصفه
بس آه شيردني لكَبل من جنت اشبكَه بلهفه
يانهـر خل يجاوبك جــــان بحضنمن يغفـه

هنيـــالك بهـل قسمـه
جي تكَظي عمرك يمه
صبـــح ومسيــه مكــابلك آيا نهر خيعـــونك


رائد الناشي


#لك_الفداء_سيدي_اباعبدالله
#خدر_الفواطم_لنشر_القصائد_الحسينيه



____
لمن يجد صعوبة بالحن اطلبه من
@muatmed

يرجليه يرجليه باجر ع الجمر تمشن يرجليه
يرجليه يرجليه باجر راية العباس ماهيه
,,,
يرجليه الطريج بعيد شدن حيلجن باجر
باجر من بعد عباس زينب تكسر الخاطر
ركض من الخيم لحسين من ينداس بالحافر
ونركض للشريعه نروح يم الفاگد الناظر
بالحر والظهر  نطلع.    ركض من مصرع لمصرع
وباجر تنوخذ من عدنه ترجيه ,, وباجر ع الجمر تمشن يرجليه
,,,,,
باجر من تجيني الخيل اركض ع الجمر حافي
وعباس اليجيب الماي بــــاجر ع النهر غـــافي
باجر يهد حيلي الصوط من يلتف على جتافي
وجتـال اخوتـي الحداي يشتد لــوگلت كــافي
باجر شامت يسبني.      وكل ماحشم يطگني
وحماي الظعون عيونه مطفيه ,,, باجر ع الجمر تمشن رجليه
,,,,
يرجليه الصبح لو صار وين نروح ماادري
ونار البالخيام تگوم بذيال العباه تسري
ومابين الخيم وحسين باجر ينشده فكري
وايس من اخوي انوب اروحن للكفل خدري
باجر مايظل زلمه ,,, بيجن للركض همه
واركض حافيه وبالنار مجويه ,,, باجر ع الجمر تمشن يرجليه

,,,
باجر كل زلمنه تــروح راح نظل لوحــدنه
باجر يذبحون حسين والعباس مو يمنه
ونركض ع الجمر حفاي من تتفرهد خيمنه
باجر نطلع وننشاف بعيون الغرب كلنه
كلهم ع الرمل نومه ,,      نحشم مالهم گومه
باجر تنضرب بالسوط علويه ,,, باجر ع الجمر تمشن يرجليه
,,,
باجر من يطيح حسين اريدنجن تعينني
كون يصير بيجن حيل للمصرع توصلني
من نشوف اخوي يلوج خافن ماتشيلني
ومن يمه لعد عباس يــارجليه ودنــــي
من عباس لبن امي.     اركض والجدم مدمي
اگومن وانهطر ومتوني مدميه ,,, باجر ع الجمر تمشن يرجليه
,,,,
كون يطول بيه الليل ماريد الفجر ينطـر
يوم البي هلي يشيلون ياذاك الصباح اكشر
اودعمن بذاك اليوم جاسم لو علي الاكبر
ومابين الزلم والخيل چم علويه تتعثــر
يفترن خوات حسين ,, مايدرن يروحن وين
بيد اجناب والوليان ماهيه ,,, باجر ع الجمر تمشن يرجليه
,,,,
اوصيجن تشدن حيل مدري متوني اوصيهن
مثلجن ينولــن بــاجـــر وليــه وحيل مــابيهن
خولــه وحــرمله بالســوط يجرن دم يخليهن
وخواتــي ابين خيــل ونــار يتعثـرن بعبيهــن
هذا يطگني بمتوني.     وذاك اليسطر عيوني
متحيره بحرم والعين معميه ,,,    باجر ع الجمر تمشن يرجليه



#لك_الفداء_سيدي_اباعبدالله
#خدر_الفواطم_لنشر_القصائد_الحسينيه



____
لمن يجد صعوبة بالحن اطلبه من
@muatmed

لاتودعنـي وتسـولف ع الـرحيل
خويه محروس بعلي وعمرك طويل
خـويه كلبي تكَطعه
لاتكلــي مــودعــه
حملي من ترحل يبوفاضل يميل
ــــــــــــــــــــــــــــــــــــــ
اسم الله خــويه منالمفارك لاتسولف ع الهجر
خــويه من عمري اعله عمرك يابعد كل العمر
مــن تكَلـــي وداعت الله تكَطــع بكَلبــي وذر
العدهـا مثلك يــابـوفـاضل ماتسولف بالنهــر

خويه عوف الماي مالازم تروح
وانته تدري برايتك متعلكه روح
بالعطش من انجوي
من اشوفك ارتوي
انته ماي وشوفتك تشفي الغليل
ــــــــــــــــــــــــــــــــــــــ
جلمة الله ويـاج زينب يابــوفـاضل مــا اريـد
خويه هـاي الجلمه اهيس تكَطـع بكَلبي وريــد
كبل يومك يومي خويه ان شاءالله ويومك بعيد
اَنـه باليــوم الاشــوفك ينكتب عمــري الجــديـد

يوم زينب كبلك وعمرك يطول
موتي هجرك جا بعد شتريد اكول
بس نفس مابيه صوت
هسه بس تروح اموت
شلون اودعلي كمر والدنيه ليل
ــــــــــــــــــــــــــــــــــــــ
شلــون تقبلها بوجودك زينب اختك خـــايفـه
بس سمعتك كتلي رايح والضوه بعيني انطفه
اكَعد وياي ارد اشــوفك وانسه سالفت الجفــه
خــويـه يـل كلك محنــه منين ماشبكَك وفـــه

شلون اكظي الليل عباس بجفاك
وانته روحي وعايشه الدنيه بهواك
مــن جبت طــاري الوداع
تصورت جن خدري ضاع
روحي ماتحمل جفه وهجرك يعيل
ــــــــــــــــــــــــــــــــــــــ
خويه من شفتك كبالي خيم بكلبي الحزن
وارخصت دمعة عيوني وبللت خد الجفن
انته يمي وما امل لشوفتك كل ساعه احن
ومن كثر مابيه شوك تخيلت طولك حظن

انته هسه كبالي وتصور بعيد
شلون تكسر خاطري وترحل تريد
ياعباتي وشيلتي
لاتطيح خيمتي
خويه اسكت وارحم دموعي التسيل
ــــــــــــــــــــــــــــــــــــــ
عيني للرايه واسولف وحدي ودمعي يهمل
المثل ابوفاضل يروحي شلون فركَا ينحمل
واشهكَ ويبجن خواتك والكَلب منهن وجـل
وانه اكَلهن لاتخـافن بعده ابو فـاضل عـدل

بس يسكتن وارجع بصفناتي ليك
روحــي يتراوالـي مورايه البديك
افز مرات ارد اصيح
خــويه بــالك لاتطيح
خدري هايه وخدري عندك موقليل
ــــــــــــــــــــــــــــــــــــــ
اشبح عيوني اعله طولك خويه والهم ينجلي
يــابعـد مـاي البعينــي وخيمتي وبيــرغ هلــي
انــوب اكـل لروحــي امنــي مايعوفج كافلـــي
كبــالـي موعباس اشوفك جنـي اشوفنك علـي

بيك اشوفن امي والضلع الكسير
وجني اشوفنك المحسن بس جبير
تصورت كل اهلي بيك
وامي مرسومه اعلى اديك
ماكو بس انته وعلي لزينب كفيل


رائد الناشي



#لك_الفداء_سيدي_اباعبدالله
#خدر_الفواطم_لنشر_القصائد_الحسينيه



____
لمن يجد صعوبة بالحن اطلبه من
@muatmed

وينك يالمصفيها زينب لحكَ عليها
جهبتني الزلم والخيل ترضه اختك تلاكَيها
ــــــــــــــــــــــــــــــــــــــ
ضاكت يالتزيح الضيم غيرك محد يحلهه
عبــاس الزلــم والخيــل جهبتني بمشاعلهه
تحــركَ خيمتي العدوان هاي شلون تقبلهه
هاي الخيل زلمه تريد حرمه شلون اجابلهه

جفوفك لايعطلنك ماتسمعني احشمنك
انهض ولو بس زنود ياعباس لاويها
ــــــــــــــــــــــــــــــــــــــ
الماتعرف شني العباس كوم اليوم علمها
خل نهر الفرات اليوم يشحط من كثر دمها
نكّس روسها بيمناك واجتفها بعمـــايمهــا
طشت يالتلم الخيل غيرك محــد يلمهــــا

كوم ورايتك شدهه وصلت يالفحل حدهه
وصلت حدك العدوان وينك يالمبجيها
ــــــــــــــــــــــــــــــــــــــ
ماتفزع لفتني الكوم متحزمه برواياها
وينك يالمعكَـر الخيل خل تطيك مكفاها
تتراكض حرم واطفال ياعباس ترضاها
فرت ماتوجد وين من النار منواها

شي بالنار محتركه شي انسحك مالحكه
شي تصيح عمه الغوث سوط الشمر واليها
ــــــــــــــــــــــــــــــــــــــ
هاي تصيح عمه الخيل بالميدان سحكتني
وذيج البلخيم وتصيح عمه النار حركتني
شلون الحكها وانه السوط ياعباس هد متني
شمــا ادنه ليهـــا النــــار بالصيوان لهبتني

شلون اتلاحك عيالي وانه النار بذيالي
يبن الخلص ابراهيم غيرك مايطفيها
ــــــــــــــــــــــــــــــــــــــ
يبن الخلص ابراهيـــــم من النار نجينه
ماتدري الجمر عباس جوه اجدام رجلينه
يالغافي عللمسنات غيـــر اتكفلت بينـــه
ماتنهض تطفي النار لاتلحك على عبينه

يلي اتكفلت بيه منك موش مرجيه
اختك تشتكيلك ليش ماتكعد تشكيها
ــــــــــــــــــــــــــــــــــــــ
هايامن كلت بحماي كوم الخيل وصلتهه
صاحو بالخيم فرهود زينب ماهم اخوتهه
ماضل خدر ياعباس عدها بس عبــايتهه
خويه اسمعهم يصيحون زينب وين خيمتهه

وصلت نارهم ليه بيها انجوت رجليه
ترضه اختك يراعي الزود تجوي النار رجليها
ــــــــــــــــــــــــــــــــــــــ
اكعد موش ساعت نوم ماتحلالك النومـــه
كوم اسحك ظهور الخيل يبن الشايعه علومه
ماترهم يبو النوماس منك خاليه الحــــومــه
سلبونه واخوك حسين منه انسلبت هدومـــه

ماخلو علي خيمه ماتلحك يبو الشيمه
شمتاني ورقيه الكوم سلبوها تراجيها
ــــــــــــــــــــــــــــــــــــــ
ريته خلافكم لاطال خويه العمر ماريــــده
هضمني الشمر ياعباس هاي سوايته مجيده
شال ايده ويطكني يريد جيفن شافني وحيــده
كتله حشمت عباس كال المشرعه بعيــــــده

بطلي ولاتحشمينه اخوج انكطعت يمينه
هاي سوايته منالناس ماواحد مسويها

الخادم

رائد الناشي





#لك_الفداء_سيدي_اباعبدالله
#خدر_الفواطم_لنشر_القصائد_الحسينيه



____
لمن يجد صعوبة بالحن اطلبه من
@muatmed

يحسين العبايه النار لهبتها
بعد بيمن تلوذ الذبحو اخوتها
اختك بالخدر والخيل جهبتهـا
ماضل خدر عدها بس عبايتها
على الظيم الهـواشم مــامعلمتها
زينب بينت والناس شــافتها
صدك يرضه ابوفاضل هاي حالتها
نومتكـم يهلنا مــوش ساعتها
مصايبكم عمت عينـي وطفّتها
كظت رضعانكم والخيل سحكتها
عزيزتكم رقيه النــار حركتها
واختكم ونت الناكه اعله ونتها
تصعب ع الهزل يحسين رجبتها
غير يكوم منكم واحد يزتها
بلا عبـاس اروحن مــامحسبتها
اخته من تون ياهو اليسجتها


رائد الناشي

طب ليها ابوفاضل خويه طب ليهــا
هـــاي الخيـل محـد صايــح عليهـا
ــــــــــــــــــــــــــــــــــــــ
طب ليها يجف اليوجع صوابه
اخوي وشاده بزودك العصابـه
هاي الزلم جنها ادور اطلابــه
غبره وغير سيفك مــايحليها
ــــــــــــــــــــــــــــــــــــــ
كوم اسحك ركبها ومنها اخذ حكنه
المالحكت جــدمنـه تــريد تلحكنــه
كبــل جــانت ورانه شلـون تسبكنه
متيهــه ومــاتوجـــد كــوم دليهـــا
ــــــــــــــــــــــــــــــــــــــ
احنه اهل الكرم وحجاية الزينـه
نفرض دوم محد يفرض علينـه
احنه شيوخهــا ومحد يحــاجينـه
شــرايـة العفيه ونخســر عليهــــا
ــــــــــــــــــــــــــــــــــــــ
كوم الماتعرفك زامطت ردها
عكر خيولها وكسر سواعدها
الماتعدل حلكها كبالنه شعدها
شلون بكيفها تسولف مخليهـا
ــــــــــــــــــــــــــــــــــــــ
يــاعبــاس يــابعـــد اليــدلنـــي
هــذا الجيش للصيــوان متعنــي
خل ام البنين تصيح عفيه ابنـي
وخل يسمعها هسه الماسمع بيها
ــــــــــــــــــــــــــــــــــــــ
كسر خشومهــا ونكس رواياهــا
وجلل حيلهـــا وكثـــر منـاياهـــا
طكها منالوجه واسحك بمكفاها
وخلها تصير سوده بوجه راعيها
ــــــــــــــــــــــــــــــــــــــ
كـــوم ولاطــول سكتتك عنهـا
سل سيفك وفنها الوصلتك فنها
هــاي الشيله يمك راح اذبنهـــا
وهسه تكوم ياعباس تكضيهــا
ــــــــــــــــــــــــــــــــــــــ
فوك الروس خلها ترفرف الخضره
وراويها اخوزينب عينك الحمره
شك حلك التراب بحافر المهره
وطب بسدورها وهوس بتاليها
ــــــــــــــــــــــــــــــــــــــ
ها يربات حيدر والحرب عيده
يـادرواسهـا المايصطــر بهيـده
خل الماي هسه المـاي ماريده
اريد الثار يبــن المـــايثنيهــــا
ــــــــــــــــــــــــــــــــــــــ
يابيرغ عمامــي وياعباة امــي
هايعكال ابــوي وسالفت عمــي
اريد اليوم توصل روسهم يمـي
الشالت روسها ويالكاع ساويها
ــــــــــــــــــــــــــــــــــــــ
يبن المايذل بغير محرابه
الحك يبـن ابوي يريد طلابه
سيفك مــامعلمه ينام بكرابه
نيمه بروسها وحده بـركَـابيها
ــــــــــــــــــــــــــــــــــــــ
يـاحــر يـاشهــم والربتك حــره
اخوي اليوم خلـي ارياكَهـم مره
من شواربه اليوم الشمر جـره
هــد ورايتـــك للغيــــم عليـها
ــــــــــــــــــــــــــــــــــــــ
ضهضب والشــوارب يافحل كصها
كض بيرغ عمامك واعرض بنصها
صيح وهـــوستك بالشـام خلصها
شد حيلك وملكَه المــوت لاكيهــا

خادم الحسين ع
رائد الناشي


#لك_الفداء_سيدي_اباعبدالله
#خدر_الفواطم_لنشر_القصائد_الحسينيه



____
لمن يجد صعوبة بالحن اطلبه من
@muatmed

عبــاس عمـي بياكتـر صارتلك الرملـه وســاد
دليني ماشوف الدرب وعيوني متروسه رمـاد
ياعمي طايح ياصوب
خيلني اراويك الثوب
بنيران الخيــام احتـرك من يـم الجــدام وبــاد
ــــــــــــــــــــــــــــــــــــــ
عامينـي دخـان الخيم يـاصوب اركض ماشوف
مـن هجمت علينـه الزلـم تهيت دربي منالخوف
اركض واطيح عللجمر لوتسحكَ اجدامي سيوف
عبـاس جبت جفوفي الك كَالولي محتاز جفوف

ياعمــي هــاك الجفيــن
بس كَوم خ نغطي حسين
ياهـو اليفـييلـه الظهـرعـن شمس واحنـه بعـــاد
ــــــــــــــــــــــــــــــــــــــ
جيتك واريد اشكي الهضم وانه ادري حالي يبجيك
ياعمـي اشرلي بسهــم عينـك وخل اوصل ليك
الحك ترى انداس الخدر يل بيـه جدي موصيك
والشمـر شتم عمتي ويتبســم ويحجـي عليك

ويكَلهـــا ويـن العبــاس
خدرج يمصيونه انداس
غيــر لمثل هـــذا الــوكت كفــال ضعنج يـــــراد
ــــــــــــــــــــــــــــــــــــــ
يالعيشتنــي مدللــه مـــااريـد اكَــــول انــذليت
مهضومه بس احجي اختنكَ عباس عمي انطكَيت
بجدامي ياعمي الجمر من الخيم جبتـه وجيت
يــابعد ابـــوي شعطلك موكَتلــي ارد مـارديت

يابوالوفه شلون تنام
خلونه من غير خيام
والليل اجانه وبس حرم خليتــهن يبجـن غاد
ــــــــــــــــــــــــــــــــــــــ
عبــاس ياعمـي شعجب مــاكَتلــي ترجيتــج وين
وشبيــج لــونج منخطف وليــاسبب زركَه العيـن
مــاتدري جـاغير العصر فــزعت علينه الصوبين
ياعمـي هيج بلا ذنب طكَوني جـي بت حسيـن

السلبني تراجيي ادريه
تمشينــه ادليــك عليـه
كَـتلـــه يتيمـــه ولا سمــع سلبهن ولا نشــــاد
ــــــــــــــــــــــــــــــــــــــ
يـل نايــم بجـرف النهـر لاويـن نـومك تـاليـه
ماتدري ابوي بطيحتك جم حافر الداس عليـه
وجه وكَفه بخيل انسحكَ ماضل كتر سالم بيـه
بالحر يعمـي بلا غطه يـردون عــاري نخليه

من الصبح عنه نشيل
ونـودعه بـلا تغسيـل
يكسر الخاطر ع الثره مطروح عــود السجاد
ــــــــــــــــــــــــــــــــــــــ
ياعمي بخ جمر الخيم يجويته واحنه حفاي
رد طفي نار البالخدر بطلنــه مانشرب مـاي
ياعمي كتلنه الشمس سوي النه بالرايه فياي
جاوبني ماقبل عذر لوموت لوتمشي ويـــاي

ماعذرك وهسه تكَوم
لومـوت ويـاك اليــوم
يل ماترد لحد طلب وآنه ادري بيك ابن اجــواد
ــــــــــــــــــــــــــــــــــــــ
مـاتكعد تردني لهلـي جلجل يعبـاس الليـل
فكَدتنـي يمكن عمتــي وادور ابيـن الخيـل
لاشوف عدها ولاسمع لابيها للصايح حيل
ركَدة يعمي منالهضم لوجاسها الريح تميل

النوح ماخله عيون
وفراكَم مو بالهون
والكلفه جــدام الغرب بالحبل زينب تنكَــاد


خادم الحسين ع

#رائد_الناشي




#لك_الفداء_سيدي_اباعبدالله
#خدر_الفواطم_لنشر_القصائد_الحسينيه



________
لمن يجد صعوبة بالحن اطلبه من
@muatmed

عمت عيني الولد للموت زفيته

ســويت الكَبل محـــد مســويتـه
بســـاعة حنته وللحرب وديتــه
عدمت سنين عمري اعليه وربيته
هــــذا ربــاي ياجســام تاليتـــه
تعبني رباك يبني وحيلي هديته
وسهرني المهد وشكثر هــزيتــه
الموت الموت يبني وياك شاريته
يبعد امك على امك يــاهو وصيته
الوج عليك يبنــي الليــل كَضيته
وحيلــي للبواجــي عليك شـديتـــه
حــدر لكَــاع تعب سنيـن خليتــه
عفيــه شلــون اطبن واكَعـد ابيتــه
ويطب الهوى بريتي ومايطب ريته
......
هوسات
طلع من شاف خيل استوحدت عمه
لبس درعــه ويــريــد يناصره بدمه
عيـن عللمعاره وعــين صوب امه
موش ولام الحنه وياه بدمه اتحنه القاسم (خلاها مكسورة خاطر)
.....
طلع وجهه كَمر وينور بالحومه
جنه الحسن عوده ويشبه رسومه
سمع عنه يزيد اووصلته علومه
متعلم من عمه فنونه

خادم الحسين ع
رائد الناشي

ياليل سلملي على اهلي الماخذوني
كلهم كطع كلبي الهجر ليمت يجوني
كلهم ولا ليله
نامت هالعليله
لوحرك الباب الهوه يخيب ظنون
......................................
ياليل ذوبني السهر بنجومك شكد عديت
ومن كثر ما اصفن واحن ملّني حيطان البيت
ياليـل كــل لـوالدي مـن المناطـر مليت
مو كتلي يومين وترد شو راسي شاب وماجيت

يابويه موتدري الهجـر ياكـــل بالايام جاليش طيفك مايمر حته ويالاحلام
جافيني لوناسي
مـوشيبت راسي
ليمت يجون الحملو ماحملوني
......................................
شيبت ليلي منالنشد ياليل ماشفت احبــاب طولو ماردوالي وكلبي اعلى فركاهم شاب
طبعن جدامي عللدرب ليمت يجون الغياب عشرت يتيم ويالدمع هيج انه عاشرت الباب

ياباب مادگـك مـــحـــب بشـــرني ياباب موتدري كل لحظه انتظر جيه منالحباب
ليمت يــرد ليه
ظعن الكطع بيه
وشكد وراهم حشمت ماهيسوني
......................................
سالفتي صارت من رحت يابويه وي البيبان جي ضال بيهن من كبل من دكت ايدك نيشان
ذكرى مناليام المضت كمت اكتب اعللحيطان اهنـــا كــعدت ويــا سـوه وهنا يلاعبني جان

تجمعني وياهم صفت بس ذكرياتي
وابالي ظحكت والدي ولمت خواتي
ماتنفع الونه
راح اكطع الظنه
للخـــذو ويــاهم فــرحتي وعذبوني
......................................
تدري بجفاك شرافكَت ؟ يابويه نجمات الليل بويه بكثرهن من يمر طاريك دمعاتي تسيل
يانجم ليش منرحلو ليلك عَلَي صار اطويــل شو جنه صاير بيه طبع مايرحم المابي حيل

يانجم شـو ليلك علي اقـــوى منافـــراك
وانه بهجرهم انجوي وكل لحظه اشتاكَ
ماترحم بحـــالي
بيت وصبح خالي
يانجم خاف اهلي التهو عني ونسوني
......................................
حاجيني يايوم وترد موجفني شيب يحسين يابـويه هم ساـمع كَبل بالشيب يطلع بالعين
كــل الخلكَ ونـه تون بس انـه ونـاتي اثنين ونت فراكَك والمرض ماخلن بعمري سنين

ليله اعله ليله وخلصت كل عمري لوعات زادي بجفـــاكـــم ونتي واتــروه دمعـــات
اخفه اعله حسراتي وتروينــي دمعـــاتي
ماعايزه هموم بهجرهم جملوني
......................................
كل يوم اشد حيل الدمع واترس لملكَاك عيون واگعد عللباب العصرعيني اعله درب اليمشون
كل لحظه اكلن للـــدرب بلكت عليك يمــرون مــو كَالــو انردلج علي يادرب ينسون شلون

بويه ويهد حيل الصبر لوصـــار الغـــروب
هنوب صارت من رحت عشره ويالدروب
ماضل صبر بيه
يايوم الك جيه
عللباب من يوم الرحت ظلت عيوني
......................................
يايوم افك عيني الصبح والكاك يم باب الدار مـالازم لطـــول العمر مـر بيّه مـرت خطّار
عبدالله اريــدن شوفته يجــويني الفراكَ بنــار فركَنه يــابويه الزمـن واحنـه عللفراكَ زغار

يابويه اخوتي وكــل هلي عنو عليه
صار شكثر من فاركت ظحكت رقيه
ردهم ولو لحظه
حته بحلم ارضه
عافوني بجفاهم وحيده ولوعوني
......................................
ياليل هـــذا اخـــر عتب للعافـــي وراح بعيد وخلاني علباب انتظر ليمت يجي هلال العيد
للمالـــه نيه يرد الي كثـــر المعـــاتب شيفيد بس كبل لامــوتن ولو مــره بحلم عيني تريد

يابويه مـــر بيه بحــلـــم خليني اراويك
جم شوغه بضلوع الكَلب خلالي طاريك
ياليل مــرمـــرني
بحلامي ما مرني
حته ارسم لطوله الحلو صوره بجفوني




خادم الحسين ع
#رائد_الناشي


#لك_الفداء_سيدي_اباعبدالله
#خدر_الفواطم_لنشر_القصائد_الحسينيه



____________
لمن يجد صعوبة بالحن اطلبه من
@muatmed