وفاة ام البنين ع

ماتت الليله الحنينه الحره
سلها ضيم الشوگ لبن الزهره
………………………..…..
الليله غمضت للاجل عيناها
راحت ام عباس والله وياها
شوگ ابو اليمه شكثر اذاها
چان تحلم منه تاخذ نضره
………………………..…..
گام ليل انهار بس اتنادي
فدوه الك يحسين كل اولادي
ما اريدن كلشي انته مرادي
شوفتك بالروح ضلت حسره
………………………..…..
لمثل هذا اليوم چان امنيتي
حسين انته التگعد بنص بيتي
وانته التسويها الي تعزيتي
بصوتك الطيب عليه تقره
………………………..…..
راح اموت اني ومكانك خالي
عاد وديلي الگمر ينعالي
عاد اخوته للنعش تبرالي
چا منو يجهزلي ذيچ الحفره
………………………..…..
حسين ردتك انته تغمض عيني
بچفك الطيب تهدي ونيني
حسين هجرك فرهداها سنيني
هجرك بگلبي ترك چم جمره
………………………..…..
حسين غير تدري ماضل ليه
عاد وديلي ولو علويه
بكي زينب تجي تبچي عليه
وحشه الجنازه بلايه العبره
………………………..…..
حتلو ميته اضل انتظرك
ومن تجيني كون سالم نحرك
وكون ما كو حافر بنص صدرك
يمه مايحمل دليلي اتفطره
………………………..…..
كون سالم من تجيني براسك
بجبهتك ذاك الحجر ما جاسك
وبالرجل شمر الخنه ماداسك
وكون سالم بيك ما كوطبره

الشاعر عقيل الحسناوي..