رايح للماي الله وياك الله وياك
يالعشت وياي الله وياك الله وياك
تنتظرك يتامه // ترجع بالسلامه
*******
ودعتني وجدمي بالكوه نكلته
ومن رحت للماي كلبي وياك اخذته
انه ما ميته عطش بس الك ميته
يابو فاضل ياهو مثلك دلل اخته

عيني اعله الجود يا عباس يا عباس
جا يمته اتعود يا عباس يا عباس
ليلي اشلون انامه// ترجع بالسلامه
*******
بالخيم ضلت يبو جفوف الحنينه
كلها تصرخ عمه وينه الماي وينه
اتأخر العباس جا يمته يجينه
راح صوب المشرعه وطول علينه

اتنوح الاطفال بالخيمه بالخيمه
وتشوف الحال بالخيمه بالخيمه
كتلتني الملامه ترجع بالسلامه
******





يا جفيلي وحامي خدري عود اليه
لحضه ما احمل غيابك تدري بيه
عنك اشكد بالخيم نشدت رقيه
اتكول ليش اتأخر وما مر عليه

كلتلها بعيد محبوبج محبوبج
لا وين ايريد محبوبج محبوبج
وعالشاطي العلامه ترجع بالسلامه
******
انته خويه الكربله بيدك جبتني
وين اروحن يابو فاضل لو عفتني
تذكر امن الناكه لمن نزلتني
كتلي ما عوفج يخويه وطمنتني

خل امشي وياك تانيني تانيني
يصعب فركاك تانيني تانيني
يا راعي الشهامه ترجع بالسلامه
****









لا اكلك روح لا اكدر اعوفك
خاف تمشي وتنكطع خويه جفوفك
للشريعه اتروح متلهف اشوفك
انته جرحي ولو عفتني اشلون اروفك

لو ردت اتروح بالرايه بالرايه
تاخذ جم روح بالرايه بالرايه
وما تبقه ابتسامه ترجع بالسلامه
*****
فاركتني وحيرتي حيره جبيره
وناظري الصوب النهر كل ساع اديره
راح اصيرن لو رحت عكبك اسيره
وخويه يحدي بناكتي الما عنده غيره

والناس اتصيح زينب هاي زينب هاي
تركض وطيح زينب هاي زينب هاي
ضل كلبي بمرامه ترجع بالسلامه
*******
تمت
تحسين الخفاجي