قصيدة (علمتني ام البنين)

والله يا اهل العالمين علمتنـي ام البنيـــن
أختصرها بكلمتين گلت شُكراً ياحُسين
******************************

علمتني اعله الوفه والصـدق والعــاطفـة
روحي باسمه هاتفه أشما تمر بيه السنيــن
شارب امن العلگمي وللحُسين آنه انتمــي
آنــه عبد الهاشمــي اشما تمر بيـه السنين
سيرة الحب سيرتي والمجالــــس ديرتـــي
لجله تبگه دمعتــي اشمــا تمر بيه السنين
شگد قصص بعده أجن عيونــي ألهـن مــابجن
ولا يمسهــن الشجــن لايهزهن الحنين
******************************

آنـه والتحت السمـه فــدوه للضـاگ الظمة
كوني ارضي فاطمة يــاحبيبـي يـاحسيــــن
هالكــلام الذكــرتــه لابـــن حــذلــم گالتــه
وانه بروحي صبته يــاحبيبــي يــاحسيــن
ثوب الاســود ارتدي وبطــريقــــه اهتــــدي
واقره اله بطور الحدي يــاحبيبـي يــاحسيــــن
بــالمــواكــب ارتقـــي واصبــح الصافي النقي
يبگــه هـــذا منطقــي حبي واضح مو دفين
******************************

دمعه وحــده ابمأتمــه تطفــي نــار الحاطمة
بهالمدامــع مَكرمــه مــو مُغالــي بهاليقين
مو لمـن هــبَ ودَب دمعــي ياناس انسكب
بس لبن سيد العرب مــو مُغالــي بهاليقين
من أهيم بحبي الــه گلبــي يصبـــح قـافلـة
ويعتني الطف كربله مــو مُغالـــي بهاليقيـن
عودي ذابـل وارتـوه خدمتــه هيـــه الـــدوه
اي وحگ راعي اللوه بالحسين آنه استعين
******************************
والله مگــدر التفـــت لنــي مثلــه مــاشفـــت
بجاله عمري ماخفت أفتـــدي الحبـل الوتيــن
امنعلمت ظهره انكسر حيلــي كـالسيــل انحـدر
واستقــر يـــم النحــر أفتــدي الحبــل الوتيـن
گلبي لمصابــه التهب مــاردت مــآس وذهـب
عاشگ وعمره وهــب أفتــدي الحبــل الوتيــن
بوجهي سيماء العشگ تحجـي كلمــات الصدگ
سيـــدي مــــا نفتـــرگ هذا عهد المخلصين

الشايـــل بجفه علـــم واعتنـه الگبــره سلم
أسمه مكتـــوب بقلــم فــي جبيــن المشرقين
والتبره امـــن العـــده سالم بدربه سده
عمره ميظــل وحــــده فـي جبيــن المشرقيـن
عزمي بادي امن المهد إنَ مَـــــن جَـــدَ وجَـــد
العافــه حتمــاً يُفتــقــد فــي جبيــن المشرقين
لا خرابـــــه ولاقصــر للـــي عافــه بهالعصــر
وما يشوف ابداً نصر ولا يضوگ امن المَعين
******************************
سيد عمار الموسوي