TURONDarsxona. Koʻzoynak taqqan ustozu
Oʻn-oʻn besh ilmga chanqoq bolalar,
Tizzasiga yamoq tushmagan orzu,
Deraza ortida koʻm-koʻk dalalar,
Yanogʻida esa loyqa oqar suv
Ilonday choʻzilgan ufqqa qadar... –
Dunyoning eng goʻzal manzarasi shu!
(Ikki dunyoniki boʻlmasa agar?!)
Yurakni gʻash qilar ovozi boʻrning,
Koʻksin kerib turar yozuv taxtasi.
Ustoz der, “Avlodimiz Amir Temurning,
Sizlar esa buyuk Turon bolasi”.
Bir soʻzga boyidi lugʻatim shunda,
Buncha goʻzal ekan vatanim ismi.
«Turon» deb pichirlab yotardim tunda,
«Bobo, – derdim tagʻin. – Sogʻindim sizni!».
Derazadan sinib tushgan oy nurin
Xayolan qoshiqlab ichmaganmisiz?
Yoki tushingizda yuztuban boʻlib,
Qishlogʻingiz uzra uchmaganmisiz.
Nogahon koʻksingiz toʻlib gʻururga,
«Sohibqiron bobom!» demaganmisiz.
Maktabdan qaytishda «loy jang»laridan
Yuzingiz shilinib kelmaganmisiz.
U kunlar yodini avaylab-asrab,
Bu kunlar dodiga qoʻshib aytaman.
Boboga noloyiq nabira sabab
Zil-zambil qaygʻuga choʻkib qaytaman.
Men ojiz noshudni kechiring, bobo,
Orzular etagin tuta olmadim.
Choʻntakka pul kirsa, faqat kayf-safo,
Ayolga suyuldim, chopsa omadim.
Ajdodlarim qilich solishgan yerda,
Kun boʻyi yalpayib, pista sotaman.
Vatanni sotarman amalga minib,
Neki bor, qoʻlimga tushsa, sotaman.
Nohaqliklarga ham ketaman koʻnib,
Shoirman, bobojon, gap desa, qop-qop.
Turonni ham oldik, maydalab boʻlib,
Ruhingiz hurmati, qilmadik insof.
Kechiring, bobojon!
Yuragim yigʻlar,
Siyqa hayotimdan koʻnglim toʻlmaydi.
Yamoq tushdi Turon xaritasiga,
Choklaridan goho oʻtib boʻlmaydi!..
Darsxona. Koʻzoynak taqqan ustozu
Oʻn-oʻn besh ilmga chanqoq bolalar,
Ot sotib olishni qilardik orzu,
Minib yursak derdik, Turon oralab…
Minnatdorman bobom nomi tirkalgan
Koʻzoynakli tarix darsxonasidan.
Oʻpib qoʻygim kelar, tunda pichirlab
«Turon» degan bola peshonasidan!
Bek ALIKanalimiz: @AmirTemurtarixi
