AZAMAT KAMOLOV

Тошкент вилоятидаги умумтаълим мактаблари педагогик жамоалари ва ота-оналар диққатига!!!
Давлат Раҳбари раислигида ўтказилган видеоселектор мажлисида таъкидланганидек, кўплаб мамлакатларда, шу жумладан, юртимизда ҳам касаллик тарқалиши ҳолатлари кузатилаётганлигини инобатга олмасдан, кўп ҳолларда хотиржамликка берилиб, карантин қоидаларига, ўзимизни асраш, сақлаш бўйича мавжуд талаб ва айрим чекловларга риоя этмай қўйдик. Бунинг натижасида март ойида вилоятимизда 4 та тумандаги 4 та мактабда ўқитувчи ва ўқувчиларда коронавирус касаллигига чалиниш ҳолатлари тасдиқланиб, бу мактаблар тўлиқ онлайн тарзда таълим бериш ҳолатига ўтказилди.
(1 апрелдан бу мактаблар анъанавий таълим тизимига қайтди).
Шундан хулоса қилган ҳолда, куни кеча, 3 чорак ўқув жараёни бошланиши арафасида Ўзбекистон Республикаси Халқ таълими вазири Шерзод Хотамович Шерматовнинг ота-оналарга йўллаган мурожаатномасида айтилганидек, барча умумтаълим мактаблари ва муассасаларда, оила даврасида карантин талаблари (оммавий тадбирларни имкон борича чеклаш, масофа сақлаш, ниқоб тақиш, антисептик воситаларидан мунтазам фойдаланиш ва ҳ.к.)га қатъий риоя этилишини таъминлаш сўралади. Зеро, фарзандларимиз саломатлиги - энг катта бойлигимиз!
@azamatkamal81

Ўзбекистон Республикаси Президенти қарори билан тасдиқланган Инвестиция дастурига асосан 2021 йилда Тошкент вилоятида 5 та янги мактаб қуриш, 22 та мактабни реконструкция қилиш ва 13 та мактабда капитал таъмирлаш ишларини олиб бориш учун давлат бюджетидан 203,3 млрд сўм маблағ ажратилиши режалаштирилган.

Бугун юртимизда барча соҳалар, жумладан, таълим соҳасидаги олиб борилаётган ишларнинг натижадорлиги, қабул қилинаётган халқчил қарор ва фармонларнинг жойлардаги ижросини самарали ташкил этиш, бир сўз билан айтганда халққа нафи тегадиган, кундалик ҳаётимизда, ишлаётган меҳнат жамоамиз, истиқомат қилаётган маҳалламиз, хонадонимизда ижобий ўзгаришларни кўриб, сезиб, шундан фойдаланиб яшашимизга сабабчи бўладиган кадрлар, ўз ишининг устаси бўлган, билимли, шижоатли ва ватанпарвар, ҳалол, пок мутахассисларга боғлиқ, албатта. Бундай кадрларни топиш эса ҳар доим ҳам осон бўлмаган. Вилоятда халқ таълими тизимида ҳам кадрлар муаммоси, уларнинг қўнимсизлиги энг оғриқли масалалардан бири экан. Бугунги кунда 8 та шаҳар ва туман халқ таълими бўлими мудири лавозимлари ҳамда 103 та умумтаълим мактабларининг директори лавозимлари вакант бўлиб турибди. Мазкур лавозимларга энг муносиб номзодлар Давлат хизматини ривожлантириш агентлиги томонидан очиқлик, шаффофлик ва рақобат асосида ўтказиладиган танлов орқали қабул қилиниши режалаштирилган. Бугун вилоят халқ таълими бошқармасида танловнинг биринчи, тест босқичидан муваффақиятли ўтган Бекобод ва Оҳангарон шаҳарлари ҳамда Бўка, Қибрай туманлари халқ таълими бўлими мудирлигига номзодлар билан суҳбат ўтказилди. (Суҳбат жараёни тўлиқ видеотасвирга ёзиб олинди.) Суҳбатдан муваффақиятли ўтган номзодларнинг ҳужжатлари ЎЗбекистон Республикаси Халқ таълими вазирлигига тавсия этилди. 103 та умумтаълим мактаблари директорлигига номзодларнинг ҳужжатлари белгиланган тартибда Халқ депутатлари маҳаллий Кенгашларида кўриб чиқиш учун киритилган. Вилоятда халқ таълими тизимидаги вакант лавозимларда танловда иштирок этиш истагидаги малакали мутахассисларни танловга таклиф этамиз.

Вилоят халқ таълими бошқармасида шаҳар ва туман халқ таълими бўлими мудирлари вакант лавозимларига номзодлар билан суҳбат ўтказилмоқда. Батафсил сал кейинроқ...

Ассалому алайкум, мазкур канал Тошкент вилоятида халқ таълими соҳасида олиб борилаётган ишлар, янгиликлар билан кенг жамоатчиликни таништириб бориш, жамиятимиздаги воқеа-ҳодисаларга ўз нуқтаи-назаримиз, фуқаролик позициямизни билдириб бориш мақсадида ташкил этилди. Барчангизга каналга хуш келибсиз, дейман. Каналда сизларни зериктирмайдиган, фарзандларимизнинг таълим ва тарбияси, эртанги куни учун фойдали ахборотлар бериб боришга ҳаракат қиламиз. Барчангизга бошланган янги иш кунингиз хайрли бўлсин.