انا مابتعلمش، انا مش عايزة اعيش..
عايشة جنب الحيطة ماشية من غير مجازفة، مش عايزة اغلط، خايفة افشل، مش عايزة اخد قرار، مستنية الحاجات تجيلي لغاية عندي عشان امسكها..
يعني لو ماكنتيش انتي جبتيلي العقد بتاع برنامج التليفزيون تفتكري كنت هعمله؟ عمري ما كنت هعمل كده..
اول ما يبقي عندي قرار مهم في حياتي بروح جري علي ثائر واقوله اعمل ايه اعمل ايه اعمل ايه!!
وهو علطول يقولي فكري، انا مينفعش اخد قرارك عنك.. وبفضل ازنقه لغاية ما يقولي اي حاجة واروح اعملها عشان لو طلعت غلط اقوله انت السبب انت قولتلي اعملي كده..
بقف قدام ملك بقعد انظر ولا يا حببتي ماينفعش كده، اقفي علي رجلك واتصرفي وعيالك وخلي بالك من نفسك وماينفعش تبقي ضعيفة وانا اضعف منها!!
بقعد مع سلمي بفصل خاالص، ببقي بني ادم مبيفكرش ببقي مبهورة بطريقتها وانها مابتخافش انها تغلط مفيش اي نوع من انواع التفكير..
طب انا مين؟ انا مين ف كل دول خليكي صادقة..
انا كذابة، عارفة لو ماكنش عندي حجة عشان اسيب بيها عاصم كنت عمري في حياتي ما سيبته، حتي لو فضل يوجعني ١٠ سنين كمان، صدقيني وانا لاول مرة من سنين بجد بقول الحقيقة.. انا كدابة وماينفعش افضل كدابة..
انا لازم اتصرف صح، مرة ف حياتي لازم اقول الحقيقة.