🔴آمونیوز
🔴آنا دیلی

نه‌ییمیش‌سن آخی سن / حکیمه باباکیشی‌زاده «نغمه»


زیلله‌نیب کپه‌نک کؤنلۆم اوچوشا
اویوتماسا لالا باخیش‌لاری‌نا
هۏپاجاق بولود قانادیما

دۏغروسو باییلیرام کئفیم‌دن
نوش اۏلور گؤزلری پییالا
بیر باخیش
بیر دؤنۆش
همی ده یؤنۆمه بیر آددیم تله‌سیک اؤپۆش

آت‌دان سالدی داها زامانی
قانادلی ماجالی یاشاماق
دومان‌لی باش ایسته‌ییر
و نغمه‌لی کؤنۆل
من اوچورام
دلی دؤوران کۆچه‌لرین
گئجه عالمی بۏشالیب
من‌دن سونرا
بۆتۆن بوراخان‌لاردان

اوچورام
نه ده خوش گلیر منه ایلاهی
دۏندورمایان قیش
سۏلدورمایان پاییز
یاندیرمایان اۏد
ایسلاتمایان سو
و آغلاتمایان سئوگی

نه ده شئل‌لنیر أحوالیم ایلاهی

موراد آتیمین یئلکه‌سی آغ آپپاق
نالی پارلاق
و پۆرچۆم‌سۆز، جیب‌سیز گئییم‌لریم
رنگ‌لی بَزَک‌لی
اۏۏۏۏف گئجه
سنین یارادانیوا قوربان اۏلوم
نه‌ییمیش‌سن آخی سن
گۆنش‌سیز دۆنیام
اۆستۆن‌سۆز بۏیاسی‌نا
لکه‌لنمه‌ین بۏیاسی‌نا
گلین کؤچۆم سنین
سیغاللا
سیغاللا اۆره‌گیمین قیزلاری‌نین تئل‌لری‌نی
اؤز یاتیمی‌نا ساری
أل‌لرینه قوربان اۏلوم
نئجه ‌ده خوش گلیرسن منه
ایشیغین ایکی اۆزلۆلر اۆستۆنه قوسان دۆنیام.


@AMONEWS
🌐 WWW.AMONEWS.IR

http://amonews.ir/wp-content/uploads/2018/01/photo_2018-01-14_09-54-01-576x1024.jpg