عجيب الـ للنبي للمختــار عـاده
يصلي اعليه ليل انهـــار عــاده
و يرد يوميه سجب ادماه عاده
اذن لابد صلاته ضــاهريه


الفخر للدنيـــه مـن حبت عليهه*
كلام الشِـــين مـا اثــر عليهه*
المفاخــر يا من اتدور عليهه*
تلكَه الكل شريف اسمه هــويه


اجتي وشوكهه البــيهه وَمَـــلْــهَه
حزنهه ايفايض المدمع وَمَــلْــهَه
تِشـِــم اتراب واليهه وَمَـلْــهه
بعشرين ابصَفَر بالغـــــــاضريه


الشام ايزيد بفجـــوره وسمهه
وصــــار الكفر ديدنهه وسمهه
بسيوف الغدر والشر وسمهه
هدمــــت دين باريـنه و نبيه

انه الويــــه الدمع شبيت وكبار
ويضل دمعي بحر لحسين وكبار
يحــــز نحره و يصيح الله وكبار
وحسين الرســـاله الاحمـــديه


يــَـناكرنه بصريح البوح افـ ـلاك
وحنه ابضـــــلمة الايام افلاك
وكلنا بروج بحـر الفـــوز اَفلاك
و اسرعنه فُلك شبل الزجيه

رمـش عين الموالي الدمع بيـ ـبان
يكِت مهما طـويل الدرب بيـ ـبـــان
لأن للجــنه اهـــل البيت بيــبــان
و اوســــع باب باب حســين هيه


بلغنه اعله المراتب مِنــ ـدَرسنه
وذِكرنه بخُـلده خــالد مَندَرسـنه
دِرَسنه و مَنْ دَرَسنه مِن درّسنه
الحسين ابمدرسة حـــامي الحميه


لدفننه الفـرح يــا ناس فاطم
على الودهه بلضى النيران فاطم
تمــر لابد بيوم الــدين فاطم
و علــيهه اثار دم الغاضريه


يزي ضيم وقهر دهري يزي دا
دليــلي غم غدر طبعـك يــزيدا
تريـد الخير من دنيا يـزيدا
امير الهه و حُسين اعله الوطيه؟؟


يلحُبك جَبل يحســين راسي
فُلُك وبمرفأ الوجــدان راسي
يريت ابدال راسك جان راسي
يبن بنت النبي بدم الــرزيه


يادهري كف سهم الغدر ترمي له
رملت منهو ابكــربلا ترميــله
يا مكَصد بجتـــل السبــط ترمي له
تفجع محمد مكَصدك لو حيدر






عَليّ يارب جثيره اْهمـــــوم طَرّن
لَوَنْ صابن صخـر جلمـود طَرّن
عِفِت آنـه الخَلَـــك لِهـواك طٌرّن
وعفت أيتامي برضِ الغاضـــريه


مِتـــه يا فرحي تلفـــــيني وتيني
وروحي تقــــــطف اثمارك وتيني
لأمامي العـــــابد الساجد وتـيني
فده الكل دمعه من عينه سريه


نلطُـم علصـدر خَيلــوم لايم
و طـَبُر هامتنه للعـُـذال لايم
لان يومك يبو الاحرار لايُم
مثله يا ذبيــح الغاضـريه


سلام اعلى الكَبر ذاكه وَمَن بي
سَكينه و ملجه للخايف وَمِن بي
حبيبي و هذا كل ودي وَمِن بي
جِذَب مَن كَال هــاي تصير بيه

رسم جرح الفـده الينزف رساله
وفــُلــُك ياسين من مجده رساله
وابو سفيان ضل حـاير رس آله
فنى و نسل النبي ما يفـنه ضيه


يدهر اشلــــون للنخوه تبسم
ادينـــك تبّن و بيهــن تبسم
تشوف احسين لرماحك تبسم
يصيح اهلاً اذا لله المــــنيه


يلايمني حبيبي حســين جَنّي
بمحبته كل اماني الشوك جَنّي
دطب دوحة حبيبي حسين جني
ورود الخير من شبل الزجيه


حبيبي عشكَه بدمــومي ركبهه
سره الحد ما وصل حده ركبهه
الشيعه ابدربه من تنطي ركبهه
قليل اتصيح لبن الهاشميه


منو مثله الكرامه ابسيف حيهه
يصيح اعله الشباب الثار حيهه
لرض الطف شموس الدين حيهه
و بيت الله بدماهم يشع ضيه

اجيت الدارك احبي ونته داري
المدامع انته إمسَح ونته داري
اسيرك آنه ضامــي ونته داري
كـَسِر دلالي جَــــبْره الغاضريه


سيد زكي الياسري النجفي