DAVLAT TILIDA ISH YURITISH VA MALAKA OSHIRISH MARKAZI

O‘zga millat vakillari va o‘zbek tilini o‘rganuvchilar uchun “O‘zbek tili” kurslari an’anaviy va masofaviy shaklda alohida dastur asosida tashkil qilingan bo‘lib, davomiyligi 3 oy.
- 2021-yil mart, aprel, iyun, sentabr va noyabr oylarida 11 ta guruh tashkil qilinib, ularga 160 nafar tinglovchilar jalb qilingan. 3 oylik kurs yakunida ularning 136 nafari kursni muvaffaqiyatli tugatgan va o‘zbek tilini bilish bo‘yicha darajali sertifikatlarga ega bo‘lgan.
- 2022-yil yanvar oyida 2 ta guruh, fevral oyida 1 ta guruh tashkil qilingan. Ayni payda 2021-yil noyabr oyida tashkil etilgan guruh bilan birgalikda 60 nafar tinglovchilar tahsil olmoqda.
O‘zbekiston Respublikasi Prezidentining 2020-yil 20-oktabrdagi PF-6084-son Farmonining 3-ilovasi 11-bandi ijrosi bo‘yicha tasdiqlangan nazorat rejasining 24-bandida O‘zbekiston milliy teleradiokompaniyasi tizimidagi teleradiokanallarining suxandon va boshlovchilarini “O‘zbek adabiy tili me’yorlari va nutq madaniyati” kursi bo‘yicha o‘qitish belgilangan. Kursning davomiyligi 1 oy bo‘lib, dars mashg‘ulotlari an’anaviy shaklda olib boriladi. Bugungi kunga qadar mazkur kursga 48 nafar tinglovchilar jalb qilinib, ularning 44 nafari kursni muvaffaqiyatli yakunladi va sertifikatga ega bo‘ldi.

Markazda “O‘zbek tili va adabiyoti” va “O‘zga tilli guruhlarda o‘zbek tili” ta’lim yo‘nalishlari bo‘yicha kasbiy qayta tayyorlash o‘quv kurslari tashkil qilingan. Mazkur kasbiy qayta tayyorlov kurslari turdosh ta’lim yo‘nalishlarini tamomlab, pedagogik faoliyat bilan shug‘ullanayotganlar uchun mo‘ljallangan bo‘lib, o‘quv jarayoni 972 soatga mo‘ljallangan o‘quv reja asosida amalga oshiriladi.
- 2021-yilning yanvar-avgust oylarida “O‘zga tilli guruhlarda o‘zbek tili” ta’lim yo‘nalishi bo‘yicha qayta tayyorlov kursi tashkil qilinib, 29 nafar tinglovchi mazkur kursni muvaffaqiyatli yakunladi. Iyun oyida Samarqand viloyati hududiy bo‘linmasida “O‘zbek tili va adabiyoti” ta’lim yo‘nalishi bo‘yicha qayta tayyorlov kursi tashkil qilingan bo‘lib, joriy yilning fevral oyida mazkur kursni 22 nafar tinglovchi muvaffaqiyatli yakunladi.
Shuningdek, “O‘zbek tili va adabiyoti” talim yo‘nalishi bo‘yicha qayta tayyorlov kursi sentabr oyida Markazda, noyabr oyida Samarqand viloyati hududiy bo‘linmasida tashkil qilingan. Ayni paytda ta’lim jarayoni davom etmoqda.
- O‘zbekiston Respublikasi Vazirlar Mahkamasining 2020-yil 28-sentabrdagi 592-son Qarori ijrosini ta’minlash maqsadida fuqaroligi bo‘lmagan shaxslar uchun davlat tilini bilish darajasini aniqlash va sertifikat berish tizimi joriy etilgan. Markaz va uning hududiy bo‘linmalarida 2021-yil davomida qaror ijrosi bo‘yicha oylar kesimida imtihonlar tashkil etildi va 930 nafar talabgorlarga davlat namunasidagi sertifikat taqdim etildi. 2022-yil I choragida 123 nafar talabgorlarga davlat namunasidagi sertifikat berildi.

2021-yil 5-noyabr kuni “Davlat tili taraqqiyoti: muammo va yechimlar” mavzusida respublika ilmiy-amaliy anjumani o‘tkazildi.
O‘zbekiston Respublikasi Vazirlar Mahkamasining 2021-yil 16-martdagi “Savdo, ishlab chiqarish va xizmat ko‘rsatish obyektlariga nom berishni takomillashtirish chora-tadbirlari to‘g‘risida”gi 144-son Qaroriga ko‘ra Markaz va uning hududiy bo‘linmalari tomonidan savdo, ishlab chiqarish va xizmat ko‘rsatish obyektlariga davlat tilida nom berish (neyming) xizmati ko‘rsatiladi.
Markaz faoliyatini yoritish va targ‘ibot ishlarini olib borish bo‘yicha ommaviy axborot vositalarida chiqishlar, davra suhbatlari, seminarlar o‘tkazildi. Jumladan, “O‘zbekiston 24” kanalida 6 marta, “Sevimli” kanalida 4 marta, “Madaniyat va ma’rifat” kanalida 4 marta, “Mening yurtim” kanalida 2 marta, “Toshkent” kanalida 2 marta, “O‘zbekiston 24” radiosida 7 marta, “Ma’rifat” gazetasida 5 marta, “Yangi O‘zbekiston” gazetasida 3 marta chiqish qilindi. Ijtimoiy tarmoqlarda ovozli yozuv (ovozli chat)lar 7 marta tashkil qilindi. Shuningdek, vazirlik va davlat tashkilotlarida 70 dan ortiq tadbir, seminar va davra suhbatlari o‘tkazildi.

Alisher Navoiy nomidagi Toshkent davlat o‘zbek tili va adabiyoti universiteti huzuridagi Davlat tilida ish yuritish asoslarini o‘qitish va malaka oshirish markazi faoliyati

Markaz O‘zbekiston Respublikasi Prezidentining 2019-yil 21-oktabrdagi “O‘zbek tilining davlat tili sifatidagi nufuzi va mavqeyini tubdan oshirish chora-tadbirlari to‘g‘risida”gi PF-5850-son Farmoni ijrosini ta’minlash maqsadida Vazirlar Mahkamasining 2020-yil 3-martdagi 117-son Qarori bilan Alisher Navoiy nomidagi Toshkent davlat o‘zbek tili va adabiyoti universiteti huzuridagi Davlat tilida ish yuritish asoslarini o‘qitish va malaka oshirish markazi va uning hududiy bo‘linmalari tashkil qilingan.

Markazning hududiy bo‘linmalari
1. Qoraqalpog‘iston Respublikasi bo‘linmasi - Qoraqalpoq davlat universiteti
2. Buxoro viloyati bo‘linmasi - Buxoro davlat universiteti
3. Farg‘ona viloyati bo‘linmasi - Farg‘ona davlat universiteti
4. Jizzax viloyati bo‘linmasi - Jizzax davlat pedagogika instituti
5. Namangan viloyati bo‘linmasi - Namangan davlat universiteti
6. Navoiy viloyati bo‘linmasi - Navoiy davlat pedagogika institute
7. Qashqadaryo viloyati bo‘linmasi - Qarshi davlat universiteti
8. Samarqand viloyati bo‘linmasi - Samarqand davlat universiteti
9. Sirdaryo viloyati bo‘linmasi - Guliston davlat universiteti
10. Surxondaryo viloyati bo‘linmasi - Termiz davlat universiteti
11. Toshkent viloyati bo‘linmasi - Chirchiq davlat pedagogika instituti
12. Xorazm viloyati bo‘linmasi - Urganch davlat universiteti
Markaz va uning hududiy bo‘linmalarida davlat tashkilotlari xodimlari uchun “O‘zbek adabiy tili me’yorlari va davlat tilida ish yuritish” o‘quv kursi ishdan ajralgan holda an’anaviy shaklda, ishdan ajralmagan holda masofaviy shaklda tashkil etilgan bo‘lib, davomiyligi 1 oy.
- 2021-yil davomida “O‘zbek adabiy tili me’yorlari va davlat tilida ish yuritish” kursini vazirlik va idoralar, mahalliy ijro etuvchi hokimiyat organlari va xoʻjalik birlashmalarining 9033 nafar xodimlari muvaffaqiyatli yakunlab, davlat namunasidagi malaka sertifikatlariga ega bo‘ldi. 2152 nafar tinglovchilar darslarda qatnashmaganligi, dars materiallarini o‘zlashtirila olmaganligi, imtihonlardan o‘ta olmaganligi sababli tinglovchilar safidan chetlashtirildi.
- 2022-yil I choragida vazirlik va idoralar, mahalliy ijro etuvchi hokimiyat organlari va xoʻjalik birlashmalarining 3199 nafar xodimlari tinglovchilar safiga qabul qilinib, ularning 2531 nafari kursni muvaffaqiyatli yakunlab, davlat namunasidagi malaka sertifikatlariga ega bo‘ldi.

Uyushmagan aholi qatlami uchun “O‘zbek adabiy tilining yozma nutq me’yorlari” o‘quv kursi an’anaviy shaklda tashkil etilgan bo‘lib, davomiyligi 1 oy.
- 2021-yilning aprel va may oylarida Buxoro viloyati hududiy bo‘linmasiga 50 nafar, iyul va oktabr oylarida esa Samarqand viloyati hududiy bo‘linmasiga 25 nafar tinglovchilar jalb qilindi. Samarqand viloyati hududiy bo‘linmasi tinglovchilari safiga jalb qilingan aholi qatlamining barchasi, Buxoro viloyati hududiy bo‘linmasi tinglovchilari safiga jalb qilingan aholi qatlamining 23 nafari kursni muvaffaqiyatli tugatdi.
- joriy yilning yanvar oyida Namangan viloyati hududiy bo‘linmasida mazkur kurs bo‘yicha 22 nafar tinglovchilardan iborat 1 ta guruh tashkil qilingan bo‘lib, unda tinglovchilarning 21 nafari kursni muvaffaqiyatli yakunladi. Fevral oyida Qashqadaryo viloyati hududiy bo‘linmasida 2 ta guruh tashkil etilib, uyushmagan aholi qatlamining 50 nafar fuqarolar jalb qilindi va ularning barchasi kursni muvaffaqiyatli yakunlab, sertifikatga ega bo‘ldi.