* * *

баҳор такрорланмас – ҳар йили ўзга,
севилган кўнгилдай инжиқ ва сарсар.
атиргул бошқача гуллайди. кўзга
бошқача кўринар бинафша, сафсар.

бултурги сайроғин ўғирламайди –
янгитдан басталар булбул навосин.
япроқлар шитирин тўғриламайди –
борича эсади кўклам ҳавоси.

ўтган йил бодомнинг шохида келган
ялпиз ҳиди билан киради баҳор
отамнинг боғига – ташрифин элга
сандувоч жория қилади наҳор.

майсадан наф олар ҳар каснинг жони,
умид алмаштирар жомакорини.
фақат янгиланмас гулнинг армони,
фақат кураб бўлмас сочнинг қорини…

2017 йил 20 март


Каналга обуна бўлинг👇
https://t.me/fahriyor_poet