الشاعر حسين الحمّامي

يارقيه بابه بابه بابه مشتاقلچ
.
.
.
محمد الظالمي
اسم الله بويه اشلونچ..وشلون بويه امتونچ
احچيلي يامكسوره..ليش الدمه بسنونچ

احچيلي يامهضومه..ليش الاذن مشرومه
كلساعة اباوع اذنچ..منفوخه لو ملچومه

بالله اليبوگ ابنيه..شيسوي بالترچيه
من الگصايب فشله..شفته يجر ارقيه

يارقيه بابه بابه بابه مشتاقلچ
.
.
.
حسين الحمامي
يا بابه مابيه احچي..مكسور سني و فچي
حتى الدمع يحرگني..ارد ابچي مابيه ابچي

مادام رمحي عالي..متطمن انتي گبالي
عيني تصد لعيونچ..غالي يشابگ غالي

بابه اشوف دمايه..برجلچ اضن سلايه
تعرج رقيه گبالي..وحسين ماله حچايه

يا رقيه بابه بابه بابه مشتاقلچ
.
.
.
محمد الظالمي
زلم ابزلم مشتركه..وبنيتي مو للعركه
گدام عينچ بويه..بالرمح راسي يفركه

هول وحرب رمايه..ناس التخوف هايه
والماتلوحه احجاره..لازم تلوحه احچايه

يبنيتي يا مشتاگه..باقرب حلم نتلاگه
تفرحين بويه ابراسي..وملاگه احله املاگه

يارقيه بابه بابه بابه مشتاقلچ
.
.
.
حسين الحمامي
يبنيتي اريد اوصلّچ..رجلين ماكو انزلّچ
و الدم جمد بعيوني..خاف اعمى ما اندلّچ

خايف عباتچ تلعب..بالريح بويه وتنذب
و تركض عليچ بحرگه..تلفچ عباية زينب

انضر سنان بسيفه..من بنيتي ياخذ حيفه
يثلم عباة بنيتي..و الشگ يلم بكيفه

يا رقيه بابه بابه بابه مشتاقلچ
.
.
.
محمد الظالمي
عطشان لو عطشانه..هاي انتي لو هذا انه
جيتي بحلم محتومه..وترحين بويه ويانه

بالشام اشوفچ خايفه..احچيلي شنهي السالفه
الديوان من طبيتي..هم گاعده لو واگفه

مشكولة ذمته الزاني..براس العصه آذاني
والخزرانه بحلگي..كسر يبويه اسناني

يارقيه بابه بابه بابه مشتاقلچ
.
.
.
حسين الحمامي
ماابطي بويه انتضري..من يمي ذابل صبري
خاف ابطي امشي بهيده..العباس كاسر ضهري

بس إغفي اجيلچ دامي..دمي وصل لجدامي
ماضل مسافة عثره..وجهچ يطش بحلامي

ها بابا شفتي حسينچ..شمروني يم رجلينچ
وخري الغطه عن راسي..وحدها تغمض عينچ

يارقيه بابه بابه بابه مشتاقلچ
.
.
.
.
.
الشاعر محمد الظالمي
الشاعر حسين الحمّامي

ماخطر ع البال..الجبل خيّال
يبو فاضل يبو فاضل

ماشفت لا..قبل دوم..جبل ع المهره
ايدوخه عامين..اليلوح..يمينه يسطره

من يفزع..علي چنه و فازع
من يطلع..الگمر يسجد خاشع

صاحت ارجوك..عِله الموت..تهده شويه
گال افا و صال..ع الرجال..ابن بدويه

ما يضل رجال..الگمر خيّال
يبو فاضل يبو فاضل
___________________________
سوه ميدان..يهوس..رگاب و جثه
صعد بيهم..اكلهم..ك اكل العثه

لقنهم..درس ما ينسونه
زلمتهم..يشرد من عيونه

البيرغ يحوم..ع الزلام..يفشل الغيمه
صارت اتلال..جثثهم..و لا چن هيمه

و هم قره نزال..الجبل خيّال
يبو فاضل يبو فاضل
_______________________
الشارد يروح..نعم بس..بلايه اهدومه
بطرف عينا..اعله مهله..يركض الحومه

مستعجل..بس حذر بالطگه
من ينزل..هاشمي يطگ عرگه

توارث الحيل..مُحمد..مسحله اچتافه
گطن نداف..عصاته..خبير اندافه

لو زعل زلزال..الجبل خيّال
يبو فاضل يبو فاضل
_________________________
لو زعل كون..ترضي..بدمه عدوانه
تهد ويا..مهرته..ويهد صيوانه

صيوانه..على اليمنه يقاتل
سبحانه..انخلق حتى يقاتل

مارضه بعطوه..لا مشيه..چفه ادلالهم
الشردو لكوكب..الزُهره..عت الجامهم

للعگد حلّال..الجبل خيّال
يبو فاضل يبو فاضل
_________________________
حتى من طاح..تخوف..بقايه اعضامه
يخزر بسيفه..بالجود..عيون بهامه

من يخزر..تجفل الخياله
تتفاحط..ما تضل رجاله

ايفحط الخيل..العلى الخيل..تهد خيولها
التشرد بعيد..من بعيد..عصاته تنولها

بالحرب محچال..الجبل خيّال
يبو فاضل يبو فاضل
.
.
.
.
.
حسين الحمّامي

#موشح_نجفي



بالسبي ضعن الدلال بلا دلال
التنهي و التامر گصت بيها الحبال
و الرجال التحدي ماضنهم رجال
اليامر اعله الحرمه حرمه بذاتها

اليامر و يشلع عثگ روح البتول
افلان يشفعله يضن جنه ينول
ماسمع من النبي حين اليگول
الهدايه حسين اهو ربانها

حسين فوگ الرمح يتنوع حسين
يشوف كل اطفاله مچتوفه الادين
يصيح فدوه الدين يستاهل الدين
الگاع تتشيم بدگ مسحاتها

و فوگ ضيم العطش سوط ابن الخنه
كون ابو فاضل عدل يوم الدنه
سنه يخلي الجيش يتراكض سنه
و ابد ما يفحط ابن خيالها

يفحّط الينوي يجيب اسم العفاف
يردهم ليوسف و لسنينه العجاف
يرتجز إني انه ابن الاشراف
رمق لو بيه اطر حيتانها

لو نفس بيه اسويل المستحيل
اطر جيش العده و يتنومس عقيل
مااجيبن جربه اجي ساحل النيل
و ادعس خشوم العده بميدانها
.
.
.
.
.
حسين الحمّامي

دفنتك ما دفنتك بس دفنتك
مدري ادفنت غيرك ما عرفتك

دفنت اوصال من جسمك
ابطىء دفنه صارت من دفنتك

شگد شايف بشر ميته..تطب اللحد رمشة عين
ما شايف بشر مثلك..ادور خنصرك يومين
گمت الگط ذره التراب..ادور على رموشك وين

لميتك ترد تنطش
گطن بالصحره تتنفش
تريد تگلي عبدالله
بنحره السهم يتحرش

انمتن حيلي و انه المك
ابطىء دفنه صارت من دفنتك
"""""""""""""""""""""""""""""""""
گول الله نطاني الحيل..دبرت الحمل گوه
لگيت الخنصر بلا شوف..و اسأل هوه مو هوه
من السحگ ما سالم..بچفي الخنصر اتلوه

ثغرك ضل يناديني
بالرملاء غطيني
اريد اسمع صدى صوتك
شفت عينك تحاچيني

متوذر لگيت اسمك
ابطىء دفنه صارت من دفنتك
""""""""""""""""""""""""""""""""
لميت الوذر بحساب..وذره بصف اثر وذره
و بديت احفرلك بچفي..و اسمعك قل هوَ تقره
تراب الصحره كلش حار..ودي احفرلك بشجره

حتى بماي تتروه
و تجسدلك تضل حوى
يا سلوة الزهره گوم
گوم انهضلي يا سلوه

و ترد فاطم تشمك
ابطىء دفنه صارت من دفنتك
""""""""""""""""""""""""""""""""
رادوا ادفن احساسك..ما گدورا يدفنونه
ضليت بگلب ناسك..الگمر يطلع من عيونه
الشوچ ينشز وي الياس..ماگدروا يخلونه

جسمك مات بس روحك
بقت تتلوه بجروحك
روحك ذابله من الآه
بسابع ارض دگ نوحك

رادوا ينخرب رسمك
ابطىء دفنه صارت من دفنتك
""""""""""""""""""""""""""""""""
گامه الگبر معروفه..و كفت مصرعك شبرين
الچان اليرفع عيونه..تطخ بسمه عليّن
حسين التجذب عيونه..مو هذا الوصل الحسين

و عبدالله اندفن بس راس
جسمه شابگ العباس
من خوف الذبح مرعوب
ما يدنه الذبح للياس

دورت اعله اثر هدمك
ابطىء دفنه صارت من دفنتك
.
.
.
.
.
حسين الحمّامي

طيف يريت العاشر و آلامه
طيف يرد الكافل و ايامه
طيف ترد تلعب كل ايتامه
طيف

ريت ب اذن كل طفله ترچيه
ريت العليل ابلايه عوچيه
ريت شكو حرمه ترد علويه
ريت

يا حلمي صعب يتحقق شيرجع الفات
يا حلمي يضل الحافر وسط الوجنات
يا حلمي حسين الضامي و عباسي مات
___________________________
مات حلم كل طفله بالهيمه
مات حلمهن رايه بنص خيمه
مات حلم زينب الله يديمه
مات

طاح الحلم وي طيحة صيوانه
طاح بگت تتلفت نسوانه
طاح وكت شِبث ايمد لسانه
طاح

يا وكتي ابد ما تنصف بس گلي شلون
يا وكتي تريد العون السموها ام عون
يا وكتي حجاب الكعبه تنضرله عيون
_____________________________
كون..خيامك مشتل تتحول
كون..نرد نضحك مثل الاول
كون..و ابد ماانضر ذاك التل
كون

هاي..اماني العيله المحرومه
هاي..ازيدك اكثر معلومه
هاي..الشمس غيرت كل رسومه
هاي

شنسوي..الحلم من اسمه شما نعمل طيف
شنسوي..الحلم آماله مطره بعز صيف
شنسوي..يحيف ابن الانزع ينذل حيف
____________________________
حيف..اخيتك تصعد ع الهزل
حيف..تطيح مدافع من التل
حيف..تريد لجسمك ماتندل
حيف

كيف..تصل يم جسمك يمهندم
كيف..بقت تتبع جروان الدم
كيف..لچن من توصل تتندم
كيف

ماتدري..اخوها امربع لاجف لاساگ
ماتدري..قبل لحضات لزينب مشتاگ
ماتدري..السهم طب صدره ولضهره شاگ
_________________________
ماي..اصيح ومامش لعيونج
ماي..ولاواحد گلي شلونچ
ماي..يخويه حنينات متونچ
ماي

ليش..سبيل الدنيا يگطعونه
ليش..يعذبوني گبال عيونه
ليش..بفعلهم هذا يتعبونه
ليش

انضرلك..رغم جرحك مابارد لليوم
انضرلك..لحد هاللحضه مسلوب هدوم
انضرلك..تصد لعيوني الماشافت نوم
.
.
.
.
.
حسين الحمّامي

زرتلك بالنيابه
قبل ليسده بابه
يا مهدي

دعيتك بويه ليله...محلفك بالعقيله
ترد و تزور اليه....الحسين و كفيله
يا مهدي
______________________
چان الدرب..لا مو صعب..وصوله
هسا صفت..الزار البخت..ينوله

زرتلك كلش هواي..يا دمعات يا ماي
اكثر من الفياي...زرتلك

اريدك ساعه وحده..تزور الضال وحده
و دمعك خيتبده..اريدك

انقلبت بويه آيه
محلفك بالعبايه
يا مهدي

نيابه تزور عني...ضهر دمعاتي محني
اضل رافع اديه...الحسين و كفيله
يا مهدي
________________________
احلم گمت..بحلمي شفت..مناره
وفزيت اون..يبن الحسن..زياره

ادعيلي ارد كون..زاير و ابقه ممنون
غرگت دم العيون..زاير

گِلّه تگول خدام..شني ترتيب هالعام
محرم قام ما قام..ازورك

السنه امحرم مُحرم
احس حروفه من دم
يا مهدي

إدعي يم حبيبك...اريد اسمع نحيبك
بس حلفه برقيه...الحسين و كفيله
يا مهدي
________________________
يابو الصدگ..يالمحترگ..اندبك
يل كلشي الي..وداعت علي..احبك

احبك بالچذب ليش...اريد بداخلي تعيش
وي كل نفس افيش...اشهگك

تعتب و العتب مات...صوچي تجر الآهات
اريدن حض حمامات...اعله زندك

احب روحك ابيه
يل كسرك سبيه
يا مهدي

اضل انحب عليها...انسبت بت ام ابيها
بس انه شبديه......الحسين و كفيله
__________________________
اطلب طلب..امحرم گرب..نقيمه؟
نواسي الحسن..و ام الحسن..هضيمه

هضيمه الغالي ينعاف...تشم جرحه و مينشاف
المن رايد اچتاف...هضيمه

نسمع كل الحچي الناس...سوالف تشلع الراس
السابع يوم عباس...نريده

نريد انواسي اخيته
دخيل الله و حميته
يا مهدي

تنقام المجالس...وتجي وياك عابس
وتعاين عليه......الحسين و كفيله
________________________
بيوم النهب..يوم السلب..يعاشر
نريد العزه..بلايه جزه..حوافر

حوافر تاكل عيون...حوافر تكسر سنون
حوافر تخمش متون...حوافر

اوادم موش اوادم...التمت هالعوالم
هوان الدنيا خادم...يضربه

يضربه گبال اهله
سهله هواي سهله
يا مهدي

الصعبه زينب شلون...تترس بيها العيون
الاميره تصح سبيه؟...الحسين و كفيله
.
.
.
.
.
حسين الحمّامي

رچب الخيل اعله متن ازلامها
و ضحك من ركضت زلم جدامها

صاح بيهم صوت چن صوت الرعيد
بيد كامش جربه و البيرغ اب ايد
بلايه سيف يخزره و يطيح العنيد
خزرته تجيس البصفه و البعيد

نَكَس ارگاب الزلم و اعلامها
و ضحك من ركضت زلم جدامها
_______________________
رجفاها الحومه من طبها الثجيل
و صاح اول زلمه انه بخاله يعيل
ما تميز الصايح و صوت الصهيل
شنهي جربه زينب اشمرلچ النيل

گام يطلع للعده بحلامها
و ضحك من ركضت زلم جدامها
_______________________
طشر رگاب و يلمها بسيفه
يحوش يزرع هوه ضل بكيفه
موش الابره الرمش بان ارجيفه
كمش خاله حسين گله تعيفه

ذوله نسوه و لا يغر هندامها
و ضحك من ركضت زلم جدامها
______________________
صاعد المهره و تخط رجلينه
الگابله من ابعيد الله يعينه
هذا ابن حيدر و گرت عينه
هد عليهم هدة الشاهينه

اهتزت الحومه و دخل ضرغامها
و ضحك من ركضت زلم جدامها
______________________
وينه هذا الصاح احرگها الخيم
ما يميز رفة ايدي امن العلم
حنه هاشم حنه النشيم الشيم
وينه مو هوه هذاكه النهزم

عامره بزوده تضل خيامها
و ضحك من ركضت زلم جدامها
.
.
.
.
.
حسين الحمّامي

راچب الگاع المهر ما تحمله
من جثثهم سوه سرج لكربله

سوه سرج اعله الارض من الرجاب
و يلبس المغرب و يدرع لَوَن يحلاله النگاب
بالارض يدبچ دبيچ و ما تأثر بِه نشاب
الحين فهمو شنهو يعني الزلزله بفحوى الكتاب

زلزل الارض عليهم زلزله
من جثثهم سوه سرج لكربله
دخيلـــــــك دخيلــــــــك

فارسٍ تربات حيدر ما يچل و لا يمل
يرتجز وسط المعسكر و الجحافل تختتل
الما يلوحه السيف يذبح روحه يدري ينكتل
لو يشوفون الشجاعه هالفوارس تعتزل

بغيرته تشهدله كل هاي المله
من جثثهم سوه سرج لكربله
دخيلــــــك دخيلـــــــك

دورة الرحه عليهم دار صحرة نينوى
ارتعبوا من الخوف گام الفارس يعثره الهَوه
صاح واحد كلنه نهجم على ابو فاضل سوه
سوه هدو سوه ماتو بس جثثهم مو سوه

طشر رگاب الفوارس بالفله
من جثثهم سوه سرج لكربله
دخيلــــــك دخيلـــــــك

بروسهم ينقش على الصحره و يفكر للبعيد
سوه گبه بصف مناره و كتب فل يسقط يزيد
كتب ع الصحره مقوله تخلدت بالطف اكيد
الخادم العد ابو اليمه يفتخر يصبح عبيد

و ضحك من شاف السوالف حرمله
من جثثهم سوه سرج لكربله
دخيلــــــك دخيلـــــــك

ضحك الجانت الرايه الحمره فوك اسطوحهم
و خل اوضح اكثر و اخبركم اعله علومهم
الخمره واجب وي اذان الفجر عد بيوتهم
يومهم يخلص ثماله و يبدي كفرٌ يومهم

و بالسلف ماتلگه الهم منزله
من جثثهم سوه سرج لكربله
.
.
.
.
.
حسين الحمّامي

ياحيدر تره حدر الجذع مات..محسن
من دفعوا الباب اسمعت ونات..محسن
و فاطم گامت اتلم بيدها افتات..محسن

من جور السقيفه
تنرض العفيفه

من هجمو عليه و دفعوا الباب و ولوني
شال ايده و سطرني دمي يگطر من جفوني
ياحيدر تره چعب الرمح بي هزروني
كسرولي الضلع عگبك يحيدر شتموني

مو همي الضلع بس چان همي..محسن
على التربان طايح ابني يمي..محسن
دم محسن تخالط وي دمي..محسن

بالعصره العنيفه
تنرض العفيفه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
ماگتلك يحيدر ياهو دافع باب بيتك
خوفي اعله الوصيه اهم من ضلعي وصيتك
ياحيدر زحفت زحوف ليك آنه اجيتك
ادري بهذا كسري مو منيتي بل منيتك

ادري صعبه كسر ضلوعي و يطيح..محسن
اول مره كض اصفاحه و يصيح..محسن
عگب فگدك اميلن من تهب ريح..محسن

اميل اويه الهفيفه
تنرض العفيفه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
اويه كل جرة نفس اتنفسه يلچمني ضلعي
بس ماخلي زينب لو اجتني تشوف دمعي
اصبّر روحي من تجبل عليه بهذا وضعي
اگللها يزينب هل وصيه يمه اسمعي

باجر بالطفوف يموت سبعين..محسن
كسر ضلعي يرد الضلع الحسين..محسن
و ابو فاضل كفيلج باقي تك عين..محسن

بلا چفين سيفه
تنرض العفيفه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
أحسّن يا علي گربت منيتي و الله يدري
الي يمك وصيه لخاطري سهلي امري
اريدك بيدك اتچفني و تنزلني گبري
و اريدن گبري ماينضرله واحد مثل ستري

من تدفني اريدن يمي مدفون..محسن
انضلم من زغره هذا وليدي خيعون..محسن
وماريد الگبر تنضرله العيون..محسن

ضلموها الشريفه
تنرض العفيفه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
اريد اجنازتي بالليل تدفني اعله مهلك
تتيهني و لا يندلني اريدن حته ضلك
صعبه يا علي ادريها صعبه تعوف خلك
و اوصيك بحسين ابكربله محتاجه اكلك

ابو فاضل يعوض باچر هناك..محسن
محسن يعني بعده عدل وياك..محسن
يروح لكربله كبلك تلگاك..محسن

اخو يصبح حليفه
تنرض العفيفه
.
.
.
.
.
حسين الحمّامي

كربلاء ما تنوصف
كربلاء يوم الصلف
كربلاء طعنه بألف
حُسينا

بضهر عاشر..بشمس تصهر..شفته نايم ع الترب
شسوه ابونه..وتلتم الناس..بيهم اليحجي ضرب

بيهم الحچيه رفس
و من رفس صدر الشمس
تذكرت موقف امس
حُسينا

رفس باب..ضلع محني..وطفل طاح
صاح صيحه..واعلياً..حيل صاح

كربلاء لمت شمل
كربلاء باب و هزل
كربلاء طاح الترف
حُسينا
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
بويه هانت..لا ترافس..هسه ترتاح بذبح
تعوف اخيتك..مااضنك..حتلو تشبخ رمح

شلون رهمت يا تره
و راحت اتقاتل مره
وهاي لا مو اي مره
حُسينا

هايه زينب..امنه زينب..بلا اخوها
تباوع الهم..موش اوادم..وين ابوها

كربلاء يعني الزجر
كربلاء حرمه بشمر
كربلاء ماكو عِرف
حُسينا
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
ها يبويه..شلونه نحرك..حرك اشفافك الي
لا لتسكت..خل اسمعك..احضرلنه يا علي

احچي لا يگوه الهوه
بويه رتل القل هوَ
سولف من الترقوه
حُسينا

انچان شفتك..بويه خشبه..احجي بعضامك
مدلي ايدك..وينه اصبعك..اشبگني ببهامك

كربلاء ضد الخدر
كربلاء صحرة جمر
كربلاء وادي النزف
حُسينا
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
ها يبويه..شدلي حيلك..إصعد براس الرمح
يلا امشنه..ع الهزيله..و نلتقي بآخر صبح

نلتقي بسوگ الفِشل
نلتقي راس بأهل
ضعن ردد مستهل
حُسينا

كربلائك..موش هينه..طيحت خلگي
هايخوي..ها يخلي..ها يعشگي


كربلاء ضيعة طفل
كربلاء صَعدت هزل
كربلائك تختلف
حُسينا
________________________
بالخرابه..يصير ملگه..ملگه تربه للمطر
يا حضنها..يا رقيه..عافتك صاير شهر

عافتك من شافتك
نززتها شفتك
تالي ردت ضمتك
حُسينا

ماتت اعليك..صار ملگه..طعمه موت
صاحت شلون..طفله ميته..منين صوت

كربلاء نرجع نگول
كربلاء جرح البتول
كربلاء ماتنعرف
حُسينا
.
.
.
.
.
حسين الحمّامي

شو ذبل عودي..........و ماتت النبره
طيحتك طيحة.......عش من الشجره
________________________
بسمك....لو بسم الذبيح ابدي البدايه
ارسمك....مسلم بس اشوفن رسمي آيه
اشمك.....هاي الشمه عندي بيها غايه


ادري دربك الموت
بعد ميفيد كل صوت
صرت يونس خلافك
أ َصبح و امسي بالحوت

الَعبره چتاله..............تخنگ ال َعبره
طيحتك طيحة.....عش من الشجره
______________________
اعاني....اذا شفت الابو يدلل بناته
اتاني....اشوفن عمي دللهن خواته
اجاني...ابوي حسين ضماني بعباته

سوالي گصيبه
وانه العب ابشيبه
عوضني الابوه
ُرغم يخنگ نحيبه

الغيره مو گوه...........تنوخذ َشمره
طيحتك طيحة.....عش من الشجره
_______________________
أخبرك....وين الگتلي بيهن و الوعد وين
أذكرك.... گتلي نروح نخدم عمي الحسين
أعذرك.... بس يبقه برگبتك هالوعد دين

ماقصر يغالي
و لا اهتم الحالي
ابرقيه و اذنها
يضل مشغول بالي

وعدك ابالي.........و ابقه اتذكره
طيحتك طيحة....عش من الشجره
____________________________
كرهته.....ذاك ال ع السطح دافع احلامي
ندهته.....قبل لتدفعه بس لاحض كلامي
شفته.....ماصدلي و لا داره اهتمامي

ردت اشبك حنانه
منو اليملي مكانه
شما اغفه اعله التراب
افز حسبالي اجانه

هسه من تالي ......احضن بگبره
طيحتك طيحة.....عش من الشجره
————————————-
احاچيج....يعمه من بعد هاي المئاسي
اوصيچ.....تلوليلي و تمسحيلي اعله راسي
الاگيج...... امل ينبض يحرك كل حواسي

عمه انتي ادره
انتي مضيعه زهره
گضه عمرچ مصايب
طبره فوگ طبره

الفضه ما تسوه........بطيحة الشذره
طيحتك طيحة.....عش من الشجره
.
.
.
.
.
حسين الحمّامي

ضلعي فدوه لـ فاء فاطم
گبل وين بهيمه نايم
فاهي لو نادوني بسمي
هسه هيبه و اسمي خادم

گبل كلشي جان فاهي
مخربط و دربك هداني

شسوه و لعشگك حذتني
انته انته و ياهو اني

خفت بس لا يگضي وكتي
و عطف كلبك ما جزاني

يا حنية امي و احن
يابعد الراحن و الاجن
من انضك بس اتسولك
انسه شنهي معنى المحن
___________________
شنهي عمري بلا وجودك
الله خالقني اعله مودك
عايش اعله الله و ذكركم
رزقي من ينبوع جودك

يا سوالف حمره من دم
بسبب شيبك صار احمر

و يا صفار الصحره بويه
چي وجها سكينه اصفر

و يا دلال اختك علينه
لخاطري بالهيمه تعثر

بالهيمه انهطرت يم زلم
مابيهم كل واحد يهم
و الغيره انباعت و انشرت
غنيمة الحرب المهم
_______________
ابدي وياك بندامه
شنهي دمعه و شنهي قامه
عبدك فقط لا لغيرك
منا ليوم القيامه

ماعفتني شكد تركتك
و ابقه عبدك للنهايه

الچم جروحك و اكلك
اعتذر و اقبلي هايه

و مااتوب ارجع الچمك
و تحتضني بفي عبايه

يا في عشك الجامع خدم
سنيني بلايه عيونك عدم
ما عايش گبلك لا ابد
من شفتك ماشفت النِقم
__________________
راسك رفع راس الشمس
ليش بحوافر تنرفس
كون ابجي لضعونك بحر
اكثر من دموع الامس

ابجي لحد ما اشوفك
محني ضهرك من ذنوبي

شما اگل للروح كافي
والله تعبنا دتوبي

تعاند و للطيش ترجع
و ارجع لتيهة دروبي

و تكض ايدي لدرب الصدگ
اعرف يمك معنى العشگ
بنار الخيمه كون اشتعل
الرادك لجلك خل يحترگ
____________________
من الشمس للنجمه ادعي
ربي لا تحرمني دمعي
و على ضلع الي تهشم
كون اقدم اني ضلعي

شما اقدم ما اجازي
لا دمعتي و لا لطمتي

شمنطي لجلك يا حبيبي
قابل مطلعلك اختي

و هيه دمعاتي شيرجعن
ماترد زينب دمعتي

يا عشگي الماصح بالعشگ
يابو دمعي و رب الصدگ
سواني زلمه مجلسك
مثل الخيمه گمت احترگ


حسين الحمامي

خويه حرگوا خيمتي
خويه ضاعت هيبتي
يخويه


آنه زينب....هيچ تالي بلايه خيمه
من بعد عينك كفلت اشكم يتيمه
انته اعله الترب غافي
و سوط الشمر بچتافي
كافي من السحگ كافي
مردو حضنك الدافي
يخويه

خويه ردني لديرتي
خويه ضاعت هيبتي
يخويه
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
شو اشوفن خيل تدبچ فوگ صدرك
من السحگ خويه شفت ضلعك ابضهرك
خويه الحافر ابراسك
تتمضحك غدت ناسك
وين إخوتك حراسك
بلا چفين عباسك
يخويه


ضلمه بعدك دنيتي
خويه ضاعت هيبتي
يخويه
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
ارد اجيلك خويه مااندل مكانك
فوح خل اتبع عطر ريحة حنانك
دخان الخيام و ليل
الدلتني سنابك خيل
بعدك انسه شنهي الحيل
احفض چلمة اليا ويل
يخويه


حيره بعدك حيرتي
خويه ضاعت هيبتي
يخويه
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
و آنه امشي تعثرت خويه ابحجر
انشلع ضفري صحت وين الگمر
ماهمتني رجليه
بس التصعب اعليه
عگب هيبة العلويه
ابنص السوگ مسبيه
يخويه


خويه تخنگ عبرتي
خويه ضاعت هيبتي
يخويه
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
اي وصلتك بس اضن مو هذا انته
حسين لابس هدمه اذكر من تركته
حافر ساحك الهامه
طاحت منه العمامه
ماخلوله هندامه
تطشر چن كسر جامه
يخويه

خويه طَشروا سلوتي
خويه ضاعت هيبتي
يخويه
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
شلون المك ارد احضنك حته اسافر
كمت المن لحم من تحت الحوافر
اليوم مدللة بجالك
سِد باجر على اطفالك
اتماشه اويه چتالك
و انته الرمح يحلالك
يخويه


شنهي عگبك عيشتي
خويه ضاعت هيبتي
يخويه
.
.
.
.
.
.
حسين الحمّامي

الماي الماي نشف ريج ارقيه
______________________
بالطف انفاس تصعد بس ما تنزل
متني من السوط على يا ساعه و يهدل
جابو هزلات النشطه البيهن تگزل
ضعني بلياك يتفرهد ليليه
______________________
الحادي يعيل بالراسه الگدامه
راس العباس راس بلايه اعمامه
برجلين الخيل يتسحول هندامه
شيحمل لوعات يا گلب العلويه
______________________
اباب الساعات خَدرت رجلي الوگفه
صرنه حجايات ع طارف كل شفه
و تراب النوگ غطانه و ما يخفه
و اسمع جرو سنسلة المسبيه
______________________
الاكبر من هاي من السوگ ادخلنه
شدنه بحبلين و يجر بينه يعتنه
ساعه يرخي و يا ساعه يوگعنه
و تصب دموم لو عتهن رجليه
______________________
شلعان گلوب ديره اتذبنه بديره
التكتل هاي آخ التچوي الغيره
تدخل ديوان وسفه الچانت اميره
وينك عباس عاين و انضر ليه
______________________
ياخويه ايزيد مامش ماي ابگصته
بالعصه يعيل يحفر بيها بشفته
يأشر و يكول للكافل هاي اخته؟
طگوها گبال راس ابن البدويه
.
.
.
.
.
حسين الحمّامي