-بهداك اليوم كنت عم قلها شبك.. بس الشبكة كانت ضعيفة و الصوت عم يقطع و هي سمعتها بحبك.. و لهلأ ما صلحتلا الغلطة.. و كانت فعلاً أحلى غلطة.. تزوجنا و صار عنا ولدين..

-من فترة شفت رفيقتي وخطيبا عم يتخانقو صرخ ب وجها و قلا خلص متل ما قلت أنا حيصير، و هي قالتلو خلص أمرك.. أنا تفاجأت فيها! و بعد يومين قلتلا كيف هيك عم تقليلو أمرك قالتلي أنا صح قلتلو أمرك بس لما هدي و فهم وجهة نظري صار متل ما بدي.. لو بوقتا جادلتو كنت يمكن خسرتو..

-جارتنا الختيارة ما بعمري سمعتا عم تتخانق مع جوزا.. بمرة سألت جوزا انو يا عمو كيف انتو هيك! شلون كل هالعمر و لسا بتحبو بعض و ما بتتخانقو.. قلي يا ابني وقت تغلط انت قلا معك حق و وقت تغلط هي كمان قلا معك حق..

-أخو رفيقتي عمرو 7 سنين و أخوها التاني عمرو 4 سنين كل ما الصغير ضرب الكبير بشوف رفيقتي عم تطلع بالكبير و يعملو لبعض حركة ب ايدهن و يهزو راسهن و بعدين بيضحكو و بتمرق السيرة.. اجاني فضول سألتا شو عم تحكو.. قالتلي كل ما اختلفو مع بعض بعملو هالحركة لذكرو انو هاد صغير و لازم نتحملو و نسايرو.. من وقت ما طلعنا بهالطريقة ما بقا تقاتلو..

المسايرة مرات.. و التغاضي.. و الرواق.. و ترك الجدال.. بيفرقو معنا كتير.. و بيغيرو كتير تفاصيل للأفضل.. الهدوء و الصبر ممكن يحلو المشاكل يلي مستحيل الصد و الرد و التعصيب يحلوها.. 😍💙

- هلا الطيب 🌸
#fafa🌸