ميته كون بكربله ويه الغوالي
ولابقيت أمعذبه ومشلوله حالي
عزيز الروح من مات
عمر أكضيه حسرات
ميته ميته
 
* * *
 
كلمن يفارك عزيزه لا يسولف عالسعـــاده
لازم يعد روحه ميت كل شخص ميت وداده
المنجرح حكه يلوج الصفنه تلجمـــه بفؤاده
أشما نوه يغفاله ساعه مدمعه ينكع الوساده
 
لوعـــة اليفكد إنه بروحي شفتها
من رحل جاسم دموعي عاشرتها
صفنتي تجيب لوعات
عمر أكضيــه حسرات
 
* * *
 
فركة الغالي التعزه عالبشر لاماهي سهلــه
والهجر لوساعه وحده ضيمه ماواحد يحمله
وآنه فاركني عزيزي العايشه بهالدنيه لأجله
شلون تبقى روح بيه وما أشوفه عمري كله
 
مني راح الماجنت أبتعد عنـــه
حتى ما لحكت أشبع شوف منه
 
دوم بصدري عبرات
عمر أكضيه حسرات
 
* * *
 
الناس تترجه تعمر وآنه اترجــه مماتي
وماعرف شيصير بيه من أكلب ذكرياتي
كربله شسويتي بيـه من أخذتي أمنياتي
كربله خلاني ضيمـج كعده أديها صلاتي
 
التحبه هواي وتعيش أعلى موده
راحتك بالدنيـــه مرتبطه بوجوده
 
ماكو راحـــه هيهات
عمر أكضيه حسرات
 
* * *
 
أشاف من الدنيه جاسم موته صار بعز شبابه
الدنيـــه ماتنراد بعده وحشـــه هالدنيـه بغيابه
ذبل عودي وركد حيلي وأنتهيت آنه بمصابـه
كون يم كبـــــره أضلن دوم أشتم بترابــــــه
 
عمري جبته آنه عليــــه آمال أبني
وتالي حال الضيم حالي ومات ابني
 
رمتني الدنيه رميات
عمر أكضيه حسرات
 
* * *
 
جان من يكعد اكبالي ويحجي ويقبل اديــــه
تنتعش روحي بحنانه وتنسعد كل ذره بيــــه
جان جسام شحلاته لمّن يسولف عليـــــــــــه
ينشرح صدري امن اشوفه كل صباح وكل مسيه
 
أبني مافاركني ساعه طول عمره
كون أموت وياه واتمدد بكبــــــره
 
شبعت هموم وآهات
عمر أكضيه حسرات
 
* * *
                                 سلام المشعل