ميمر للجواد عليه السلام

بسم الجواد المسموم الليله انعقد مأتمنه
....

شبل الرضا ياناس تاسع معصوم
بعمر الشباب يموت بالسم مسموم
عالسطح مرمي بلادفن ظل مظلوم
احنا بمصابه انعزّيــه احبابه وتألّمنــه
.....

سمّه اللعين المعتصم واويلاه
بيد اللعينه امّ الفضل ما تخشاه
بالدار ظلّ يلوج محّـد ويّــاه
چبد الجواد المسموم. ينزف دمه ويلچمنه
......

مثل غريب حسين عطشان ومات
وبلا دفن ظل عالسطح بالآهــــات
هيهات ننسه مصيبته لا هيهات
كلما يمر يومه نصيح مصابك جرح يهضمنه
........

لكن تشيّع ما بقه عله التربان
مو مثل ابواليمّه الذبيح العطشان
مطروح داست صدره خيل العدوان
عالمنذبح والمسموم بصوت ودمع سلّمنه
.......

ما ننسه جرحك يالجواد شما صار
كل وكت نتعنّه لضريحك زوّار
خطارك احنا وماتردّ الخطار
صحنك يبوالهادي بشوگ اباب المراد يلمنه
......

خدامك احنا عله العهد نبقه وياك
نحيي المصيبه بحضرتك ما ننساك.
نبچي عله حالك يالجواد وننعاك
ندعي الاله المعبود منك فلا يحرمنه

سيد زيد الفحام
__________________________