ا🕊💫الرادود حيدر الخفاجي 💫🕊

قصيدة قوم لينا بالسلامه لشهادة أمير المؤمنين عليه السلام حوار بين الإمام والعقيله زينب عليهما السلام


زينب إعله المرتضى تجري دمعها
وانـفـطـر گلب الوصي لمن سِمَعْها

اتصيح يا كَهْفْ اليتامه
گـوم لـيـنـا بـالـسـلامـة
ـــــــــ
هِوَتْ فوگه اتصيح بالونه الآليمه
طَبْرِتَكْ يابا الحسن كلش عظيمه
بـويـا گوم اولا تِـخَـلِّـيـنـي يتيمه
باچر الناس ابفرح وانه ابهضيمه

الـعـيـد بـاچـر يـا علي وانه ابرزيه
لابـسـه ثوب الحزن وانصب عزيه

أون ونَّــاتْ الـحـمـامـه
گـوم لـيـنـا بـالـسـلامـة
ـــــــــ
اتگله بويا چانك ابهالليله راحل
أَسْأَلَكْ بالباري يا كَـهْـفْ الأرامل
ياأخو الوصِّيت بِيَّه وياهو كافل
للخدر لو بـاچـر إِنْـشِـدْ المحامل

أَسْأَلَكْ لـو جـار مـن بـعـدك زماني
يـا هـو يِكْفَلْ محملي زينب تراني

عـنـدي من أمي علامه
گـوم لـيـنـا بـالـسـلامـة
ـــــــــ
عندي ياحيدر عن الزهره روايه
عـن قضية كربله اوطف الرزايه
حدثتني فـاطمه ابضيم اوبلايه
خوتي تتذبح وظل ويه السبايه

فـوگ نـاگـه امـهزله ذايـب فؤادي
وأنــده الــكــرار صَــگَّــارْ الأعادي

بويا يـا راعي الشهامه
گـوم لـيـنـا بـالـسـلامـة
ـــــــــ
فَـتَحْ عـيـنـه ابْوَنَّه متفطر دِليله
گـال فِعْلَتْ كربله كَلْفه اوثچيله
صاح بالآهات والـمـدمـع يسيله
بَسَّچْ امن النوح يا بنتي العقيله

طـبـرتـي هانت يزينب مـن ذكرتي
كربله اوناگه اوسبي ذابت مُهِجْتِي

والــذبــايـح والأيـامـى
گـوم لـيـنـا بـالـسـلامـة
ـــــــــ
نادى باللوعات حـيـدر وابحنينه
چـنـي بيچ اتردي للكوفه حزينه
يالغريبه ايذوب گلبچ من ونينه
بـاچـر الـديـوان بـالـذِّلْ تدخلينه

الـشـام والكوفه مصايبهم فجيعه
ايعينچ الله إعـلـه الأذيه يالوديعه

من تموت اهل الزعامه
گـوم لـيـنـا بـالـسـلامـة
ـــــــــ
هاي اهله المرجله واهل المعالي
بـالـشـدد كـلـهـا يزينب ما تبالي
إختاري منهم للخدر يابويا والي
گـالـت العباس غـيـره ما حلالي

مـنـهـم الـعـبـاس أخـتـاره ابقناعه
كل اخوتي مرجله اوكلهم شجاعه

كـلـهـم إخـواني نشامه
گـوم لـيـنـا بـالـسـلامـة
ـــــــــ
صاح بالعباس يـا شـايـل لوانه
ابذِمِّتَكْ زينب يبو فاضل أمانه
ضـمـها بعيونك يعباس الدِّيانه
لا تشـوف الذله بعدي والإهانه

صاح ابو فاضل قسم بالرايه والجود
والله مـا تـنـضـام زينب وانه موجود

هـاي خـدمـتـهـا كرامه
گـوم لـيـنـا بـالـسـلامـة
ـــــــــ

يامن هي منك إجعلها إليك
المتوسل بأمير المؤمنين عليه السلام
السيد موسى السلمان الأحسائي

اليله كل مسجد ينوح آذانه
بيوم طبرو هامتك مولانه
يا امامي يا علي
يا امامي يا علي
ــــــــــــــــ
ذاع جبريل ابحزن هذا الخبر
من سمع صوته الحسن ظهره انكسر
حسين للمسجد ركض كلبه انفطر
زينب اشضل بيها راسك وانطبر
واليتيم اشعنده غير ادموعه
الناس كلها يا علي مفجوعه
يا امامي يا علي
يا امامي يا علي
ـــــــــــــــــ
يا علي ايتجون لك ولدك خضيب
جرحك اكبر جرح ينزف ما يطيب
بيوم عاين راسك اشكال الطبيب
نسمع ابيتك يا حيدر بس نحيب
الكوفه ظلمه بطبرتك هالليلة
الشيعه وي زينب دمعها اتسيله
يا امامي يا علي
يا امامي يا علي
ــــــــــــــــــــ
انفصمت العروة الوثيقة ابطيحتك
تنحب آياته الكتاب اتعنتك
طبرو الدين وأصوله بطبرتك
اشحال زينب يا علي من شافتك
يا علي تسمع ونين ايتامك
راحت بساع وكضت ايامك
وا إماماه واعلياه
ــــــــــــــــــــــ
طاحت اركان الهدايه ابطيحته
وصاب كلب الدين سهم امصيبته
ظلمو الهادي الرسول وعترته
ظلت اعلى الراس تلطم شيعته
دمعة الزهره جرت لمصابك
اتخضب ابدم هامتك محرابك
وا إماماه واعلياه
ــــــــــــــــــــ
الليلة نصبولك عزى ابسابع سماء
واعتنت تنعاك كل الانبياء
واحنه يا حيدر نصبنالك عزاء
وحزن ممدود المصيبه كربلاء
واحنه جينه انجدد اليوم العهد
ننتظر طلعة شمسنه ابها الوعد
وا إماماه واعلياه
ــــــــــــــــ
نعيم ابو باقر الساعدي

شوط كربلائي
كلام بين الامام علي وزينب والعباس (عليهم السلام)



زينب بالدمع والنوح گعدت يمه تتحسر
تعاين مره للعباس ومره اتعاين الحيدر

١

حيدر يمها ويعاين گوه يلفظ انفاسه
عرفت راح ابوها اليوم يودع دنيته وناسه
تعاين طبرته شافت چبيره الطبره البراسه
لبوها حارت بأمره
چبيره شافت الطبره
اختنگت زينب بعبره
المنظر قاسي ياهالناس شلون اتحملت المنظر

٢

زينب گربت يمه تشمه گامت بصدره
يبويه اتگله احچي وياي اموتن خاف بالحسره
امشي اعليك اعز الناس الحبيبه فاطمه الزهره
صد يابويه حاچيني
وارحم كل دمع عيني
بعذابي لا تخليني
وحيدر گوه شال الراس ولون الوجه صار اصفر

٣

برفيع الصوت حاچاها يگلها يابعد روحي
الكلام وياچ يابويه يزينب بلسم جروحي
وگام يعاين العباس ويگلها كل سبب نوحي
راح الوحدچ اتضلين
وكلشي بعمرچ اتشوفين
اوصيچ واسمعي زين
المصايب من تشوفيها صيري للصبر مصدر

٤

صد حيدر لعد عباس وگام الروحه يسألها
اي عباس بس عباس لعد زينب كفو الها
واهنا كلم العباس وگله انته كافلها
رد عباس خادمها
وشحده اليكلمها
كون الزهره ترضه امها
اصيرن خادم الزينب وتجازي الزهره بالمحشر

٥

زينب بعد ماعرفت اشوصه بيها واليها
گامت تنظر العباس وخلت ايده بيديها
تگله كفو ادري بيك واختك ماتخليها
وزينب تنظر ابدمعه
لبوها وگامت اتودعه
ياعباس ارد انعه
زينب تنعه والعباس يمها يبچي واتصور

٦

وهنا ودعت زينب ابوها بدمعه سچابه
والعباس يمها ينوح ويبچي بنار لهابه
حيدر غمض عيونه بأخر لحظة امصابه
وزينب صاحت بأحساس
بحضني جيب خلي الراس
وخلي انشمه ياعباس
هذا اخر وداع النه بعد للضيم نتحضر

الشاعر السيد رياض الرسل الجابري
سيف الطبر راس الدين صاب النبي وقرانه
وكل مسجد بهذا اليوم يعلن حزن باذانه
********************* (ميمر)
لوحة مصابك بالعرش مرسومه وكل الجروح الغيبتك ملجومه
وفاض الدمع حسره وغرك بهمومه بمصابك اركان العدل مهدومه
يابا الحسن من صابوك دين الله ينعى اركانه
****************
حبك عقيده وبالدمه انرويها مو فكره من شاعر عبث يحجيها
صوت المنابر ياعلي اليرويها ودم المناحر كل وكت يفديها
ويوم الغبت يابو حسين ظلمه اصبحت دنيانه
**************
ابشهر الصيام ابطبرتك فجعونه حتى العرش لاجلك تفيض اعيونه
وي هامك بسيف الغدر صابونه جي لن نحبك صارو ايذبحونه
ما ننسه حبك هيهات والخالفت خسرانه
**************
لوعتنه بجروح الكلب مكتوبه نصبغها من شيبة علي المخضوبه
ندري الحزن بس النه فصل ثوبه مو هامتك هام النبي مصيوبه
فجر المصايب من لاح لا حت شمس احزانه
*********
وي زينب ادموع ا لحزن سجابه بيت الكرم لمصيبتك سد بابه
وشمس العداله امخضبه من اخضابه ويه اليتامه ايفيض دمع احبابه
صحنه ويه دمعات احسين راح العدل ميزانه
*********
ماتوصف احروف القصيده مصابك يامن عليك ابدم بجه محرابك
والشيعه كلها اتيتمت بغيابك ياجف الي اينشف دموع احبابك
صاحت يتاماك اليوم ياهو البعد يرعانه
**********
خادم اهل البيت
ابو باقر الساعدي

🏴تهدمت والله أركان الهدى🏴
ــــــــــــــــــــــــــــــــــــــــــــــــــــــــ


كان صوتي  بالهجير
ينطوي درب المسير

...........انهو  الموت  الاخير
*************
انه حيدر  من دموعي  اتيتمت دار الامامه
شاهدت حسره  الكواكب بينت جرحي  علامه
ارتدي  ثوب  المنيه  والاجل كرب هيامه
چانت السجده الاخيره ينتهي عمري وختامه

ها هنا كان  النداء
يا علي من السماء

للردى كيف تسير
************
هذا ابن ملجم اشوفه مرتدي ثوب الرزايا
نايم وسيفه عله بطنه مطوك بحبل المنايا
لكن ادري بهايه تحكم مايصير اله بجنايه
سجدتي تشهد خلودي وضحت حد النهايه

قاصدا درب الصلاة
ارتدي ثوب  الممات

  أنهو جرح الامير
*************
اتوجهت محرابي وانه كبرت كل الجوامع
والملك اصبح ينادي ياعلي بصوت المدامع
هذا ابن ملجم يتاني الصبح يحسب يطالع
كبرت وبصوتي انعه انطبر سيف الله راجع

 ساجدا بين القنوت
لا ارى  كيف  اموت

هكذا أمر القدير
************ اسمع بصوت المنادي شد حيازيمك يحيدر
جارت ايامي عجيبه الطبر مرحب تصور
فزت رب الكعبه اردد مشهد العالم تغير
والأذان  بصوتي  ناده والجرح الله أكبر

 سجدتي كان الخلود
هاتفا....بين السجود
   
       والى الله المصير
*************
راجع الداري عجيبه  والدمه  بثوب الامامه
والسحب لملم نجومه اتغير الكون بنظامه
معصب وانه شفتهه طبرتي مثلومه هامه
انه قتال الاشاوس   والدهر يرمي بسهامه

هكذا  كان  الختام
 انظرو حال اليتام    

بالاسى كان النظير
*************
خادمكم
يوسف الفتلاوي

ابو ذيات لشهادة مولى الموحدين وامير المؤمنين سيدي ومولاي علي ابن ابي طالب عليه السلام

ابكثر ما الله ودّك ........ وانعم اعليك
بچيت وشوفي رايح ... وانعمه اعليك
يبويه حضني دافي ... وانعم اعليك
من اتراب الگبر . نام اعله اديه ........

سمعت الصايحه صاحت ........ علي ضاع
گمت . والفكر تيهته .............. علي ضاع
صحت ويلاه واحس شوفي ... عليه ضاع
الدرب . والگاع چنها اتروط بيه .....

طحت ع الگاع من گالو ..... علي طاح
ويچن البيت واركانه ......... علي طاح
سيف الي فطر راسه او ..... علي طاح
يريته ابراسي وافديه المنيه ......

يون اليوم ابوي الگبل ......... ما ون
وصرت مدري اروحن وين ... ما وين
الدهر ما رحم بيه اوعلي ...... ما ون
فجعني وخله نوحي ابكل مسيه .......

تون الروح چيف اليوم ............ ما تان
عبن نعش العزيز انشال ......... ماتان
صحت يحسين كل اعضاي ... ماتان
ادفنونه يبعد اهلي سويه .........

چنت مهيوبه بوجودك ..... وانه آمن ( احس بالامان )
يمن عافنّي اعيونك ....... ونامن
اجاها العيد هالوادم ......... ونا من
يعيدني ويحن گلبه عليه .......

الحزن ما تم عله الوادم .... ولي تام
يصايم ويلي واصيامه .... ولا تام
اون امگابله اخواني .......... واليتام
تون واتصيح من هاي الرزيه .......

.........................:
الشاعر ابو فاطمة الطائي :
.........................

احنه خدام ونرفع الهام
ويا علي نصيح طول الايام
************
علي عنوان الكرامه ويسري ويه دمانه
احنه ما ننسه الصميده وهوه ما ينسانه
علي ميثاق العداله وعالوفه ربانه
علي لجل الدين ضحه وثبتاها اركانه

راية الدين بيد ابو حسين
وحطماها بجف الاصنام
**********
احنه خدام ابو الحمله وللمنيه نعاهد
ويا علي قائدنه انته وماكو غيرك قائد
بالخدامه وفقتنه ودللتنه وزايد
واحنه ما نترك خدمتك جينه ليك نعاهد

واليخدمون ما يتعبون
والمجالس تبقه كل عام
************
علي انته الدنيه كلها واليعوفك يخسر
واحنه واحدنه بخدمتك مثل جون وقنبر
احنه نقسم ما نعوفك لحد كطع المنحر
وصرخة الاحرار تبقه بكل زمن تتكرر

لجل ابو اتراب نفدي الاركاب
والوفه اليوم صعبه ينسام
*************
يا علي انته فخرنه وبسمك تباهينه
نحيه ونموت اعله دربك تدري يا والينه
سيدي بيوم القيامه رايح تنجينه
وعالسراط انته يحيدر باجر تمشينه

كلنه بحماك يا علي اهناك
وتشفع النه يبن الاكرام
*************
احنه من نخدم يحيدر نخدم اعله النيه
ويا علي هاي المجالس قمة الروحيه
اسود اتعلمنه نلبس واللطم يوميه
ويا علي تعشك لطمنه حته الحسينيه

وهالعزائات يعني ثورات
والها يراد شدت احزام
**********
انته سر الله ونبيه وانته خيمة جفوفك
ونقسم بنور الولايه يا علي منعوفك
من تضيك الدنيه بينه وننتخي بحروفك
اول الناس انته تحضر يا ولينه نشوفك

وانته مولاي امجرب اهواي
ومن نذكرك ننسه الالام
***************
تمت
تحسين الخفاجي

صعبه يا كلبي الحبايب من يروحون
والتكتلك بالمكابر من ينامون
بويه عاين حالي // الموت والله اشوالي
************
انه زينب يالعفتني بداري حزنانه
صرت بغيابك يحيدر ورده ذبلانه
بيمن انعيد يغالي العيد لو جانه
جنت كل عيد انته بويه اتعيد ويانه

العيد اجه وهاي السنه لا ما اريده
شله بالعيد اليفارك بويه عيده
الف حسبه ابالي // الموت والله اشوالي
*************
شيبت راسي المصايب ونكطع ضني
بويه حته البويه ماتت من رحت عني
سالت دموعي اعله خدري وزيدت وني
وتدري بفراكك يبويه اهواي اخذ مني

اوياك اموتن يالعفتني اشكد تمنيت
بويه كمت اكره بدونك طبت البيت
خيبيت امالي // الموت والله اشوالي
*************





هيه مو كلمه وكولن تنسي العشره
احله شي بالدنيه بويه ضلت الذكره
كالو اليفكدله غالي ينكسر ضهره
وانه مو بس ضهري بويه اضلوعي متكسره

صحت يا دهري دخيلك وين الاحباب
اشلون سلوت عمري نايم حدر التراب
مني ضاع اهلالي // الموت والله اشولي
************
مدري شبسرعه يبويه غمضت عيونك
كلشي ما يسوه وغلاتك عمري من دونك
الفاتحه اقراها اعله روحي من يدفنونك
واليتامه اشراح اكلهم من يفكدونك

كلها تدعي يا علي اتكوم ابسلامه
ياهو من بعدك يحن اعله اليتامه
ضلت ابلا والي // الموت والله اشوالي
***********









يا علي شخبار جرحك وانته شخبارك
اتجمعت كل اليتامه وتنحب بدارك
بويه من يوم العفتني ما طفت نارك
بالسمه يابو المحنه انحجبت انوارك

الليله محرابك يون والفكدك اينوح
انته جرحك يا علي مو مثل الجروح
امجانك اصبح خالي // الموت والله اشوالي
*************
ضلت ابدلالي تسعر جمرت احزاني
ليش بويه وياك كلي الموت ما جاني
افرك براحات اديه دهري خلاني
ياهو يمسحلي دمعتي ودمعة اخواني

حاير الليله الحسن ودموعه بالعين
وشابك اهدومك يبويه ويبجي الحسين
بغيبتك يالغالي // الموت والله اشوالي
*************
تمت
تحسين الخفاجي

جمعه مباركه على الجميع يارب❤️🌹

اللهـم طهر قلوبنا
حتى نلقـى أمام زماننا وهو راضي عنا♥️

اللهم صل على محمد وال محمد