مرني الخيال وتوني متوسط ليل
ساعة عطاء وهمة تدفع همه
باول حرف من زينب اصبح زلزال
وشعر مو كادر يواطئ جدمه
جمجمتي ثكلت والعناوين تدور
وأفكاري جن صمة دخن منغمه
شي يمنه راحت شي يسار احتاريت
شي علأرض شي صعدت اعلى القمه
حاولت الملم وضعي وأرجع خيال
وأسرج مهرتي ابيت كلش زحمه
بتلث حزم حزمته قلمي ومافاد
ينهدل جان شمااشد الحزمه
كلت استشير يجوز احصل برهان
وربك يسهل واحد يحل ازمه
بهلصدفه عاينت الطفل كتله ارجوك
كتله ارد أطلعك سري كون تكتمه
كال اعلى بختك والعقيله اعلى الراس
أمرني كال بداخلك جن هظمه
كتله الحجي يم زينب شبي مقفول
ليش امنريد اوصفهه عقلي تصدمه
تتشاقه گلي لو شفتني ابلا راي
زينب لغز والباري بس يفهمه
اشلون افسرلك اسلوب الاعجاب
واشلون افتحلك ابواب الحكمه
خل ابدي بيك وارفع انا المرسات
نبحر سويه ابهلبحر وبعلمه
شاعر تريد تصير يم الزهراء
ابذمتك متحسهه صعبه الذمه
انت الله حبك من سئلت اهلا بيك
لو غيري يسمع ينسبك للغشمه
احذر كلامك يسمعه الراح وجاي
احد يسامح بلغلط يم امه
موقف اريد اذكرلك اوقيس ابعاد
تفهم اكون المعنى لا لتحجمه
لو نفترض من حرب جاي العباس
ومن التعب متعيني مدد جدمه
وبلصدفة مرت زينب ومن ابعيد
ينفظهه روحه ويوكف بكل همه
بلمعركه ايقيسون بعض الابعاد
وتنجمع قيمت ازلام بزلمه
عباس ينعد بألف بلتقييم
وبعد الطفوف الالف ماضل اسمه
بس بضميرك زينب اشجم عباس
جم نعمه لو نكدر نعد النعمه
لونبدي من ادم لحدماالله يكول
يوم القيامه ابهالزمن ويحسمه
اوكل الخلايق تكتب اعله الحوراء
ماضن توفي اوللفضل متقيمه
روح اكتب اشرايد تسطر ديوان
حاجيلي باليل الكمر والنجمه
اولمن تكمل عود الي احجايه وياك
وفرح ابديوانك ابيوم أتمه
بس انتبه احسب احساب العباس
تحط زينب ابديوان كلش زحمه
توصفلي زينب ونته عقلك محدود
زينب الحرمه الماتعرف الحرمه
المهدي حاير بالكلام اويه ام عون
شيكلهه جده ايكلهه يمه العمه
ددعي تقبلك خادم اوترفع راس
والكعبه يامحلاته ثوب الخدمه