#عظم_الله_لك_الاجر_يامولاي_ياصاحب_الزمان

گضه عمره وشبابه ابين السجون
من سجن لسجن ما شاف راحة
خمس سجون شاف انواع تعذيب
وگضه عمره ايتلوه من جراحه
تعمة عيونة لو شافت ضوه نهار
لأن ضي الشمس ما مره لآحة
بظلام السجن مطبوعات العيون
مايدري شوكت ليله و صباحه
أثنعش عام الحديد مشابگ عليه
لحد ما ورمت چفوفه وصفاحه
الگيد و ايده عشرة وعافه مسموم
عافه الگيد بس السم اجتاحه
كيان الدولة ذلة وهو مسجون
تربة و مسبحة جانت  سلاحة
علمنة العبادة من الطوامير
مو شرط الصلاة تحتاج ساحة
خذه كل حيله آخر سجن بغداد
بطامورة السندي طفه نياحه
و أجاه ابن السويد وگله مولاي
ضاگت و الفرج ننطر رياحه
گله ياعلي قربت الأجل حآن
يوم الجمعة من يطر صباحه
جنازة بلا اهل والغربة للموت
محد ورى نعشه علة صياحه ,
وآخر غربة ظل ع الجسر ذآك
يصيح الناعي وين اهل الجنازة
صح وحيد بس مو مثل الحسين
جده هنآك رآد الچفن عازة
فرق بالغربة هاية مو مثل ذيچ
حصيرة حسين صارتله جنازة