" دقلم توره "

د کندهار د اطلاعات او کلتور ریاست مقام څخه دوې(۲) غوښتني

(1) ددیني علماء او طالب العلمانو لپاره د ژورنالیزم،انګلېسي او کمپیوټر د زده کړي مناسب چاپیریال

دا تر لمر سپینه ده چي عصري علوم په ځانګړي ډول د انګلېسي، کمپیوټر او ژورنالېزم په برخو کي زده کړي د وخت جدي تقاضا او اړتیا ده او په کندهار کي د دې زده کړو لپاره د ښه کیفیت او کافي کمیت څخه برخمن مراکز موجود او فعالیت کوي
خو یوه نیمګړتیا سته هغه دا چي یاد مراکزو شل کاله د امریکایې اشغال تر سیوري لاندي فعالیت کړی دی ځکه یې د شاګردانو لباس،اخلاق،سیرت او صورت لکه څنګه چي مناسبه ده د اسلام له اصولو سره ندي برابر او نه هم اسلامي او افغاني دود او کلتور پکښي رائج دی
نو بناءً ډېر علماء او طالبان وه او سته چي د عصري علومو زده کړي ته به لېوال وه خو د مناسب ماحول او چاپیریال د نه شتون په وجه یې همدا هیله تر اوسه نېمګړې پاته ده لهذا موږ غوښتنه کوو چي یاد ریاست د بشپړ اسلامي چاپېریال په رامنځته کولو د ټولني دینداره قِشر ته د عصري علومو په ځانګړي ډول دانګلېسي او کمپیوټر د زده کړي لنډ مهاله او اوږد مهاله کورسونو ته زمینه برابره کړي.

(2) د شاعرانو، مبارزینو او لیکوالانو یوه ټولنه او اتحادیه

دا هم تر لمر سپینه ده چي د اسلامي فکر د اشاعت، جهادي مبارزې، او د کفر د نظامي او فکري یرغل په مقابل کي مسلمان غیرتي شاعرانو او لیکوالانو مهم او مؤثر رول ادا کړی او په هر ډول سختو شرائطو کي د خپل مجاهدینو وروڼو تر څنګ درېدلي هغوی ته یې روحیه ورکړې او خلګ یې هم د دوی بشپړ ملاتړ ته جلب کړي دي د قلم د کمان څخه یې پر دښمن داسي غشي وار کړي د مقابلې او جګړې لورئ یې ترې ورک کړی او د تېريګري نړۍ زورور تبلیغاتي ماشین یې ننګولی دی
اوس چي جهاد کامیاب سو دښمن په نظامي ډګر کي بې ساري ماتي وخوړل د دوو لسیزو اشغال پای ته ورسېد پر مسلمان او ګران هیواد مو اسلامي نظام حاکم سو چي د حمد او شکر ځای دی
خو د دښمن د فکري اشغال او استعمار تاثیرات لا هم پاته او په دې برخه کي یې نوي هڅي او فعالت هم دوام لري چي د افغان ملت ذهنیت یې یرغمل کړی
نو بناءً د شاعرانو لیکوالانو مبارزې ته زیات ضرورت او اړتیا ده او پدې حساس پړاو کي یې مسؤلیت خورا دروند دی چي د خپل قلم توره نوره هم تېره کړي او د خپل دین، وطن او کلتور څخه په کلکه دفاع وکړي
او دا مبارزه هلته لا مؤثره او ګړندۍ کېدای سي چي یاد ریاست د دوی لپاره یو اتحادیه او ټولنه جوړه کړي تر څو شاعران ټول په یو معلوم وخت کي سره یو ځای کیږي پر هغه مواردو د نظر تبادله وکړي چي مبارزې ته پکښي اړتیا وي او د یاد ریاست لخوا تشویق هم سي او د مبارزې امکانات هم ورته برابر سي
او په څنګ کي یې د هغه شاعرانو چي د دښمن له تبلیغاتو متأثر سوي او شعر یې سل سلنه د اسلام د اصولو سره ندی برابر د هغو او د عامه ذهنیت تنویر هم وسي،

په درنښت: ورور او خادم مو احمد "خاطِري"