KO'CHA SSENARISTI ©

Bu kichik film mening ssenarist va prodyuserlikdagi navbatdagi ishim...

Ijodiy guruh aʼzolari bilan tanishing:

Ssenariy muallifi
Sirojiddin RUSTAMOV

Postanovkachi operatorlar
Xurshidbek ZAYNALOBIDINOV
Ibrohimjon GʻOFUROV

Montaj ustasi
Xurshidbek ZAYNALOBIDINOV

Muharrir
Sirojiddin RUSTAMOV

Gʻoya muallifi va badiiy rahbar
HILOLA UMAROVA

@kochassenaristi

#Hammanarsahaqida

DAVOMI...

5

O‘z imkoniyatlarimdan to‘liq foydalana olmayapman, sizlarga ham bu his tanishmi? Aslida hammasi nasiba bilan bog‘liq bo‘lsa ham atrofimdagilarning yutuqlariga va maqsadlariga erishishini ko‘rib, havas qilaman. Albatta, noshukrlik qilmoqchi emasman, lekin o‘z-o‘zimdan va natijalarimdan qoniqmaslik, ancha yillardan beri menga tinchlik bermaydi.

Har doim yil oxirlayotganda kayfiyat takrorlanadi: rejalar va maqsadlar yomg‘irdan keyin ko‘paygan qo‘ziqorindek bosh chiqarib turadi. Hozirda ko‘p ishni boshlash uchun 13 kundan keyin kirib keladigan yangi yilga o‘zimni sozlab turibman. Niyatlarimizga O‘zi yetkazsin.

6

Niyatlar haqida gap ketganda, aytishim o‘rinli, shu yil o‘z hayotimda ikkita keys bo‘ldi. Oilamizning ko‘p yillik orzularidan biri ushaldi: ota-onam muqaddas umra ziyoratini ado etdilar. Men bir yillar oldin umra bilan bog‘liq videolarni ko‘ra olmasdim, ko‘zlarim yoshlanardi: sababi, onamlar juda qattiq orzu qilganlar (ularning hamma orzulari farzandlari bilan bog‘liq bo‘lgan, bu faqatgina o‘zlari bilan bog‘liq bo‘lgan yagona orzu edi, balki)…

Keyingi niyatim o‘z ofisim bo‘lishi va faoliyatimni to‘la erkinlashtirish bilan bog‘liq edi. Bu niyat ham ushaldi (bilmaysizki, ko‘cha ssenaristi bo‘lish ham oson bo‘lmagan, ko‘chalarda yozib yurish ham ancha charchatgandi, ayniqsa, ovqatlanish ijod yoki ilmdan ustun bo‘lgan jamiyatda noutbukni “tiqirlatib”, joyni band qilib o‘tirish koʻpchilikning gʻashini keltirardi)… Shukr!

7

Odamlar boshqalarga noqulay savollarni berishni yoki tashqi ko‘rinishdagi nuqsonlarni yuzingizga aytishni yaxshi ko‘rishadi. Deylik, men ortiqcha vazn bilan bog‘liq savollardan shu qadar charchagan edimki, o‘zgarishdan boshqa variantim qolmadi. Yoshligimda burnim biroz kattaroq bo‘lgani uchun 7 yoshdan 70 yoshgacha hamma “nega burning katta, singanmi yoki o‘zi shundaymi?”, deya savol berishardi. “Xudo yaratgan burunda” deb qo‘yish, o‘sha vaqtlarda menga tasalli bermasdi. Yillar o‘tib, savol mazmuni o‘zgardi, lekin savolning ta’sir etish kuchi o‘zgarmagan.

Xo‘p, men bu haqida gapirmoqchi emasdim, men inson xohlasa, har qanday yashash tarziga irodasi yetarkan demoqchiman, hozirgi ratsionimdan shirinlik, gazli va energetik ichimliklar, fast-fud va hamir ovqatlar chiqib ketdi. Yashab yuribman.

8

Kecha bir guruh ijodkorlar ssenaristlarning gonorarlari haqida gaplashdik. Tan olib aytganda, ko‘plab loyihalar imkon qadar ssenarist og‘zini arzonroqqa yopish haqida o‘ylashadi. Masalan, qariyb 5 yildan beri telenovellalar uchun 800 000 so‘m pul to‘lashadi. 45 daqiqali material, prodyuserlarning o‘ziga yarasha talablari va rejissorlarning qarichlariga qarab uni tahrir qilib berish bu summaga arzimaydi, ochig‘i. Men anchadan beri novella yozmayotganimning sababi shu. Lekin ssenaristlar “sen yozmasang boshqasi yozadi” qabilidagi iddaodan cho‘chib, bergan gonorariga boshi yerga tekkuncha ta’zim qilib yuraveradi. Qiymat masalasi qadr bilan bog‘liq, hammamizga insof bersin…

Bu hayotimdagi ba’zi lavhalar va mulohazalar edi, hozircha tugadi.

@kochassenaristi

#Hammanarsahaqida

1

Qandaydir senzuralar (yoki andishaning o‘zi) meni ham chegaralab qo‘yganini his qildim. Shundanmi, juda ko‘p hayotiy vaziyatlarni post sifatida yoza olmadim. “Odamlarga faqat baxtli ko‘rinish kerak”, deydi atrofimdagilar. Va aminmanki, sizning baxtli yoki baxtsizligingiz bir nechta yaqiningizdan boshqa hech kimga qiziq emas.

Ijtimoiy tarmoqlardagi info-bosimlar sabab 2 haftaga yaqin Instagram, Facebook va boshqa ijtimoiy tarmoqlarni blokladim. To‘g‘ri, men bloger emasman, lekin 2 hafta davomida hech kim mendagi nofaollikni sezmadi, shunda tushunib yetdimki, biz ommadan katta e’tibor kutishimiz to‘g‘ri emas.

2

O‘ylaymanki, ijodda eng qimmati G‘OYA. U xuddi homashyoga o‘xshaydi, istalgan ustaning qo‘liga tushsa, qandaydir binoni paydo qiladi. Hayotimda ko‘p bora g‘oyalarimni boshqalarga qo‘sh qo‘llab topshirganman. Oxirgi vaqtlarda bunday vaziyatlar qayta-qayta sodir bo‘lganini va bu meni xursand qilmaganini tan olaman (kulguli tarafi, bir kuni mana shu “o‘g‘ri”larning biri menga tasalli beryapti… Men esa doimgidek, uning yuziga gapira olmadim). Meni TV sohasidan sovutgan va “Kulrang xona”ga olib kelgan asosiy sabab shu.

Bir necha kun oldin yangi faoliyatini boshlayotgan telekanallarning biriga yuqori lavozimga taklif qilishdi, men chamasi 6-7 oy oldin bu taklifdan osmonga sakragan bo‘lardim, bugun esa sovuqqonlik bilan rad etdim, suhbatdoshim “qattiq sovutishibdi” sizni deya, mendagi tanlovni to‘g‘ri qabul qildi.

3

Odamlar va vaziyatlar o‘zgarishi haqida ham ba’zi keyslar bor. Men avvalroq “qirpichoq” bo‘lgan bir tanishim bilan ijodiy hamkorlikda ishladim. Ish sabab bu insonni boshqa rakursdan ko‘rdim, ochig‘i, qayta kashf qildim. Farishtalarni yerdan topish qiyin, qandaydir minuslar bir inson haqidagi hukmga nuqta qo‘ya olmas ekan. Xullas, yaxshi ishladik va o‘ylaymanki, men ham ana shu insonning hurmatini qozona oldim…

Va aksincha, yurakka yaqin insonlarning tuzli palovlarini ham ta’tib ko‘rdik… 2-3 yil oldin birga ishlaylik deya jon-jahdi bilan tirishgan, sendan foydalanib bo‘lgach, pullari ko‘paygani hisobiga o‘zini sendan ustun qo‘yganlarni ham ko‘rdik… Mana insonda ishonchsizlik qanday paydo bo‘ladi!?

4

“Kulrang xona”gacha men oxirgi 4 oyda 20 dan ortiq roliklarga mualliflik qildim, ba’zilarida prodyuser, ba’zilarida rejissor ham o‘zim bo‘ldim. Katta tajribalar uchun rahmat aytadigan odamlarim ko‘p. Lekin mustaqil faoliyatning yana bir “qoida”sini eslatib o‘tmoqchiman. Agar sizning mas’ullingizdagi ijodiy ish buyurtmachiga ma’qul bo‘lmasa yoki kutilgan natijani bermasa, siz foyda evaziga zarar ham ko‘rishingiz mumkin ekan. Deylik, menga katta pul va’da qilib, qandaydir omillar sabab “ketmoni uchmaganlar” zararga ham kirgizib ketishdi. Men oldindan sezgandek, bu vaziyatni juda xotirjamlik bilan qabul qildim. Har bir tajribaning qiymati bor…


DAVOMI BOR…

@kochassenaristi

Dramaturglarga

✅2025-2030-yillarda teatrlarda “Milliy qahramon” va “Inson qadri uchun” mavzularida 32 ta turkum spektakllar yaratiladi;

✅Teatr dramaturglari uchun "Mahmudxo‘ja Behbudiy" nomidagi davlat mukofoti ta'sis etiladi;

✅Teatr tanqidchilari va dramaturglar klubi tashkil etilib, ularning faoliyati qo‘llab-quvvatlanadi.

@kochassenaristi

Oʻchirilgan post, oʻqish shart emas...

Men taʼsirchanman va ssenarist uchun boshqacha boʻlish ham mumkin emas. Shu sabab, men bilan bogʻliq yana bir kulguli va lekin qiziq holat haqida aytmoqchiman. Agar yaxshi film tomosha qilsam, undagi qahramonlarga maʼlum vaqt bogʻlanib qolaman. Masalan, "Qogʻoz bino" serialidagi Nairobi va Tokio oʻlimi shu qadar xafa qilganki, oʻzimni tinchlantirish uchun ularning instagram profillariga kirib, ularning "tirik" ekanliklarini oʻzimga "isbotlaganman".

Bugun bir filmdagi qahramon xarakteri va filmdagi haqiqati menga yoqdi, unga nisbatan menda hurmat paydo boʻlganidan keyin u salbiy qahramon boʻlib chiqdi va juda tuban ishlarni qilgan ekan. Bu vaqtda men undan nafratlanishga shoshilmadim va instagramiga kirib oʻz-oʻzimga aytdim: "binoyidek odam, u shunchaki rol oʻynadi"...

E, bu ijodkor deganlari ja qiziq boʻladida...

Yozgim keldi, yozdim va tasavvur qiling, men bu postni oʻchirdim...

@kochassenaristi

Bugungi kun haqida qisqacha)

Yuqoridagi roliklarda muallif va prodyuser sifatida ishladim. Operativ jamoalar bilan bir kunda 3 ta rolikni tasvirga olib, tayyor holatda topshira oldik.

Mintaqaviy va xalqaro fan olimpiadalari gʻoliblarini taqdirlash marosimiga ijodiy ishlarimiz "fayz berdi", deya eʼtirof etildi.

(Oʻzimga ishonishni boshlaganimdan keyin hayotim oʻzgara boshladi)

Bugungi kun emotsiyalari:
🤪🤯🥹😍☹️🥶😎😳😡🤬🥵😨🫠☺️

@kochassenaristi

OʻQIB QOʻYAVERING!

Xoʻsh, xoʻsh, oʻzidan koʻpayib, oʻzidan kamayib ketaveradigan kanalcham ahli, yaxshimisizlar? Yangi aʼzolarimiz bilan-ku deyarli gaplasha olmadik...

Keling, shu kanalni ham qarovsiz qoldirmaymiz, aytingchi, bu yerda qanday kontentlar yoki postlar boʻlishini xohlaysiz? Ikki ogʻiz boʻlsa ham yozib qoldiring, shu tariqa, manfaat keltirishga harakat qilamiz... Nima dedilaringiz?!

@kochassenaristi