الشاعر كرار حسين الكربلائي

تدرينه وادم فقره
ونخدمكم اعله الفطره
لمجلس عزانه اتفضلي يالزهره

مجلس حسينچ عله الدمعه يلمنه
الخدم ويلادچ يزهره وانتي أمنه
عدنه هالليله عزاء اتفضلي يمنه
انتي التهمينه كل شي مايهمنه

مولاتي لا تنسينه
وبخيمتج لمينه
وفقينه خل نبچي لقتيل العبره
لمجلس عزانه اتفضلي يالزهره

وين ماگالو عزه يافاطمه انروح
ومجلس الفطره يصير اهوايه مملوح
الكل شي مانشتاگ بس نشتاگ للنوح
السالفه كلش چبيره احسين مذبوح

تسوه العمر هالشهرين
كلهن بواچي اعله حسين
نلطم صدرنه عله الهشمو صدره
المجلس عزانه اتحضري يالزهره

فاطمه بهاي الليالي وين ماوين
اعيونه اعله الباب يا ساعه تطبين
بجانب المنبر گعدتچ يم الحسين
والذبيحچ انتي التعلمينه الونين

هوه اللطم شيوافي
وعالرمل ابنچ غافي
داره اعله وجهه الشمر ويحز نحره
المجلس عزانه اتفضلي يالزهره

حاضره بس ماتشوف عيون هالناس
اتخاطبين الناعي بس ابصوت الاحساس
الخاطر أم الاربعه اقره اعله عباس
اوليد عندي بالعمود امهشم الراس

يالزهره هاي ابالي
العباس عندچ غالي
الخاطر يمينه الطايحه واليسره
المجلس عزانه اتفضلي يالزهره

فاطمه وبكل سنه ننصب عزيه
من الهلال وتنتهي بمقتل رقيه
نواعدچ يوم اربعينه يالزچيه
الكربله وي زينبچ نمشي سويه

بيت اليطبله زاير
يگعد ابيتچ باچر
تنمد السُفره الكربله من البصره
المجلس عزانه اتفضلي يالزهره

فاطمه خادمچ حاير ماتخليه
والصرف دينار الف دينار تنطيه
البي مرض انتي التحضرينه وتشافيه
بالخلك سلطان يالزهره تسويه

بس أهم حاجه البينه
يعجل فرج مهدينه
خل نندعي للمهدي يسهل أمره
المجلس عزانه اتفضلي يالزهره

خادم الحسين ( عليه السلام)
كرار حسين الكربلائي
( ابو كميل)