***
Kuzda kelin bo'ldi kuzgulim,
Kungli yarim, kungli muz gulim.
Ishqsizlarning ermagi bo'lgan
Ko'ylagi oq, sariq yuz gulim.

Yor yor aytdi yorsiz yangalar,
Yuragi yo'q orsiz yangalar.
Shu go'zalning alamlarida
Endi ming yil borsiz yangalar.

Oyni etak bilan yopgan kim,
Kim yo'qotgan, bunda topgan kim?!
Erta kelgan kuzning yo'lidan
Yuragiga mushtlab chopgan kim?!

U ham sevmasmidi birovni,
Bilmasmidi ishqiy olovni?!
Taqdir o'zi tanladi ammo
Kuyov degan arzanda yovni.

Endi kuzning ko'ylaklarida
Dunyo to'yib tinglaydi yor yor.
Muhabbatning ertaklarida
Endi baxt yo'q, endi hijron bor.

Sim-sim yig'lar mayda yomg'irlar,
Yerda yomg'ir, oyda yomg'irlar.
Ming yilda ham tinmaydi endi
Yurak degan joyda yomg'irlar.
Yurak degan joyda yomg'irlar.

Majnuna