غزل
ـــــــــــــــــــــــــــــــــــــــــــــــــــــــــ
ستا کرم به وي کۀ شومه مسلمان، مړ
په سپېڅلې عقیده او سپین ایمان مړ
زما قتل دې کړو پېټی د محشر دروند
ګوره زه دې شومه څومره پۀ تاوان مړ
څوک پښتون به وي حتماً چې لاوارث دی
دا چې پوځ غورځولی لۀ زندان مړ
لۀ کلو ورکه د کوم زندان خوراک شوې
راشه تا حسابوي دلته یاران مړ
امکان نۀ لري چې تۀ بېرته راګرځې
دا امکان لري چې شمه له خفګان مړ
پۀ خوږه مسکۍ خبره دې زه پایم
لۀ کږو کږو خبرو دې قربان! مړ
کۀ د دین په سر کې مړ دی خو شهید دی
د رواج په ننګ کۀ مړ دی نو ارزان مړ
غړېدلې سترګې ستا پۀ لورې پاتې
یو زاهد دې دی د وصل په ارمان مړ
ـــــــــــــــــــــــــــــــــــــــــــــــــــــــــ
مهاجر زاهد ساپی
👇👇👇👇
╭•┅══❁✿✿❁══┅•╮
👉
@MohajirZahid 👈
╰•┅══❁✿✿❁══┅•╯
