بسم الله الرحمن الرحيم

[ ياصاحبي ]

ياصاحبي ومو بس اخوي انته
حتّه الرِمِش عبّاس شيّبته

عبّاس نور عيوني ... بغيابك يذبحوني
ياصاحبي ياصاحبي
_

إكَعد اكَعد لا تسافر خوية مو وكت السَفَر
يعني ترضه حسين بالطَف يبقه وحده بلا كَُمَر
يالجنت نايّم بكَلبي شو نمت يَم النَهَر
يا بو فاضل فدوة إكَعد راح اموت من القهر

من جيشهم أسمع حجي العاذل
يا شمر أفرح مات ابو فاضل

بهذا الحجي يسمّعوني ... بغيابك يذبحوني
ياصاحبي ياصاحبي
_

شيبة شيبة اتبدّه يَمَّك بس ردت مِنّك حجي
عيوني حمرة وراح توكَع خويه مِن كثر البجي
ظهري مكسور بغيابك بيش بَعدَك أنتجي
الخاصرة اوّل مَرّة اكظها بَعَد ما بيك ارتجي

حجي الشماتة بكَلبي ظَل يمرِد
يكَلّولي مات الكَُمَر ما يكَعد

إكَعد وفرح ظنوني ... بغيابك يذبحوني
ياصاحبي ياصاحبي
_

إمن الشِريعة للمُخَيّم صوتك لإذني وصل
صحت [ أدركني يخويه ] واشعِر براسي انفصل
جي ورا كَطعوا جفوفك خويه كرهيت النخل
مِثِل جَرحَك يا بو فاضل بالكَلب لا ما حصل

كسرتك كسرة وما لكَت جَبرة
إمن الجَنّة نشغت أمّك الزهرة

وهدلت يخويه متوني ... بغيابك يذبحوني
ياصاحبي ياصاحبي
_

شرد اكَل لزينب اختك لو أردّن للخيّم
وبَعَد يا كافل اخلافك يرفَع بجفّه العَلَم
إنعمت عيني بسبب عينك مِن شفتها تجري دم
وخاف اجر السهم منها وتجي بايدي وي السهم

تحيّرت حيرة ويا عَفَه كَلبي
وارفعت صوتي ادركني ياربّي

إتغَيْرَت نبضتي ولوني ... بغيابك يذبحوني
ياصاحبي ياصاحبي
_

إستوحدوني اخلاف عينك لإن صرت بلا أخو
واليطيح حزام ظهره ينولي مِن العِدو
عطّشيت الماي بَعَدَك صار كلّش مو حلو
إنته اخوي وإنته روحي وللمُخَيّم إنته ابو

يا أبو الخيمة طاحت الخيمة
واختك بعدنا تنولي بهيمة

وبَعدَكك أنَه يولوني ... بغيابك يذبحوني
ياصاحبي ياصاحبي
_

راح اردّن والله يستر لَوَن عرفوا منجتل
بيا عِذِر أقنعهم اكَدر غير إنته ابو الفضل
مِن اموتن بَعَد موتك راح يرحن عالهزل
وابّدال جفوف اديك يصير بايديهن حبل

والشام آخ الشام يا ويلي
كل ما أذكره ينهدم حيلي

الله اليعين ضعوني ... بغيابك يذبحوني
ياصاحبي ياصاحبي

_ملاحظة: في النص الثالث
تكون اللّام مُفَخَمّة في هذهِ القوافي
[ وصل ، انفصل ، نخل ، حصل ] .

الحَمدُ لله والشكر والفضل والمنّة
[ هَذَا مِنْ فَضْلِ رَبِّي ]
بركات الكفيل سلام الله عليه
#رزقهم_سلام_الله_عليهم