بسم الله الرحمن الرحيم
#ثگيل

[ يُمّه يُمّه ]

يُمّه يُمّه ... عينك اعله حسين باجر بالطفوف
يُمّه يُمّه ... يُمّه لطيّح العَلَم طيّح الجفوف

إسمع امن ام البنين ... خلّي عينك عالحُسين
يُمّه يُمّه
_

أرد اوصيك بوصيّة استمع مضمون الكلام
بعالَم الذَر ونذرتك يابني خادم للإمام
وجنت وانته ابّطني واذكر تبعث لزينب سلام
وجي ردتها بعينك تظل باني بعيونك خيام

يابني اريدك ... كَبل لا تعطش تمد روحك نهر
يابني اريدك ... تضوّي الها بليلة الحادي عَشَر

يا ضياء الله المُبين ... خلّي عينك عالحُسين
يُمّه يُمّه
_

لو يشح نهر الفرات لسكنة حِط روحك سبيل
لجل بنت حسين اخيّك يُمّه سوّي المستحيل
وبسَفركم تدري يابني يسافر وياكم عِليل
ما أريده اهواي يتعب طفل ماريده يشيل

هاك حظني ... أخذه بدروب السَفر يا ابو الفضل
هاك حظني ... حتّه بي تغفه شكو طفلة وطفل

باري زَين العَابدين ... خلّي عينك عالحُسين
يُمّه يُمّه
_

يا كَمر ليل الفواطم يابني يا راعي العَلَم
ليش مِن اذكرلك الطف دمعك يخضّر خيّم ؟!
ويُمّه حاذر مِن تقاتل لا يصل عينك سهم
لإن زينب وسط عينك لا تحس يُمّه بألم

أحذر أحذر ... براسك حسين ويطكَ راسك عمود
أحذر أحذر ... ترجع لخيمة رُقيّة بلايه جود

حتّه لو مكَطوع ادين ... خلّي عينك عالحُسين
يُمّه يُمّه
_

يا حلم غافي اعله عيني وفركَتك جنها سراب
مِثِل هيئة مهد يُمّه أوكَف اكَبال الرباب
وصير شمعة اكَبال رملة وحقّق احلام الشباب
هَيج اريدك مِن وفائك تلغي قانون العتاب

مِن وفائك ... رايده تعجّزهم ارباب السيّر
مِن وفائك ... تسكَي كَاع الطف مواقف يالكَمر

راح اخط فوكَ الجبين ... خلّي عينك عالحُسين
يُمّه يُمّه
_

ولو وكَع جسمك يكافل عالشِريعة بلايه أيد
لا تقصّر مِن نصرتك للعقيلة وللشهيد
حتّه مِن تموت اريدك هَم تِحارُب مِن جديد
وخلّي جرحك ماي ينزف يا كَمر مِن الوريد

أنزف أنزف ... ماي زمزم كون مِن جرحك يصب
أنزف أنزف ... واكسر عيون العطش بارض الحرب

وحقّق احلام السنين ... خلّي عينك عالحُسين
يُمّه يُمّه


الحَمدُ لله والشكر والفضل والمنّة
[ هَذَا مِنْ فَضْلِ رَبِّي ]
بركات الكفيل سلام الله عليه
#رزقهم_سلام_الله_عليهم
حيدر الموسّوي