Multimedia Contents

Ang kinaroroonan ng kaligtasan
| Pasugo: God's Message

www.pasugo.com.ph


Katutubong gawi ng tao (human instinct) na magtungo agad sa ligtas na dako kapag nabibingit sa panganib. Sa gitna ng kapighatian, humahanap siya ng mapagkakanlungan. Sa Araw ng Paghuhukom, hindi maiiwasan ng tao na harapin ang pinakamalaking panganib sa kaniyang buhay dahil sa araw na yaon ay ipapataw ng Panginoon ang Kaniyang hatol sa sangkatauhan—lilipulin sa pamamagitan ng apoy ang masasama (II Ped. 3:5-7) at ibubulid sa dagat-dagatang apoy o ang ikalawang kamatayan na siyang ganap na kabayaran ng kasalanan (Apoc. 20:14; Roma 6:23). Itinuturo ng Biblia na maliban sa Panginoong Jesucristo, lahat ng tao ay nagkasala (Roma 5:12; I Ped. 2:21-22), kaya, lahat ng tao ay nangangailangan ng kaligtasan sa Araw ng Paghuhukom.

Sa panahong Cristiano, inihayag ng Diyos ang Kaniyang pag-ibig at habag sa tao sa pamamagitan ng Kaniyang pangunahing panukala para sa kaligtasan nito—na ang tao ay umanib sa Iglesia na katawan ni Cristo:

“Nawa siya ay mabigyan ng kaluwalhatian magpakailanman at kailanman sa walang hanggang mga panahon dahil sa kanyang pangunahing panukala ng kaligtasan para sa iglesia sa pamamagitan ni Jesucristo.” (Efe. 3:21 Living Bible, Isinalin mula sa Ingles)

“Sapagka’t ang lalake ay pangulo ng kaniyang asawa, gaya naman ni Cristo na pangulo ng Iglesia, na siya rin ang tagapagligtas ng katawan.” (Efe. 5:23)

“At siya ang ulo ng katawan, sa makatuwid baga'y ng iglesia.” (Col. 1:18)

Ang Iglesia na ililigtas ni Cristo ay ang binili o tinubos Niya ng Kaniyang dugo—ang Iglesia Ni Cristo:

“Ingatan ninyo kung gayon ang inyong sarili at ang buong kawan na rito’y hinirang kayo ng Espiritu Santo na mga katiwala, upang pakanin ang iglesia ni Cristo na binili niya ng kaniyang dugo.” (Gawa 20:28 Lamsa Translation, Isinalin mula sa Ingles)

Kung gayon, ang Iglesia Ni Cristo ang kinaroroonan ng kaligtasan. Dito makasusumpong ang tao ng kanlungan sa araw ng kapootan ng Diyos sapagkat ito ang ililigtas ng Panginoong Jesucristo.

Kaya, kapag ang isang tao ay naging kaanib ng Iglesia Ni Cristo, dapat siyang manatiling matatag sa kaniyang kahalalan, tumupad ng lahat ng kaniyang tungkulin, at ingatan ang kaniyang pagka-Iglesia Ni Cristo hanggang wakas.

Ang kapalaran Ng Matuwid
| Pasugo: God's Message

www.pasugo.com.ph


Napakalaki ng kinalaman ng pamumuhay nang matuwid sa harap ng Diyos upang matanggap ng Kaniyang mga lingkod ang Kaniyang mga pagpapala. Ganito ang isinasaad sa Biblia:

“Ang sumpa ng PANGINOON ay inilalapat sa tahanan ng masama, ngunit pinagpapala niya ang sambahayan ng matuwid.” (Kaw. 3:33 New Pilipino Version)

Nais ng Diyos na tayo’y maging matuwid upang makamtan natin at ng ating sambahayan ang Kaniyang mga pagpapala. Ano pa ang handang gawin ng Diyos sa mga matuwid?

“Kinukupkop ng Diyos ang mga matuwid At ang taghoy nila’y kanyang dinirinig … Agad dinirinig daing ng matuwid Inililigtas sila sa mga panganib.” (Awit 34:15, 17 Magandang Balita Biblia)

Sa buhay pa lamang na ito ay pakikinabangan na natin ang pagtataglay ng katangiang ito sapagkat ang matuwid ay kinukupkop ng Diyos, dinirinig Niya sa pagtawag o pananalangin, at inililigtas sa mga panganib.

Ang lingkod ng Diyos na matuwid ay nabubuhay sa pananampalataya:

“Nguni’t ang aking lingkod na matuwid ay mabubuhay sa pananampalataya: At kung siya ay umurong, ay hindi kalulugdan ng aking kaluluwa.” (Heb. 10:38)

Ang nabubuhay sa pananampalataya ay ibinubuhay ang pananampalataya ni Cristo (Gal. 2:20). Kaya taglay niya ang isipan ng Panginoong Jesucristo, ang pagiging masunurin sa kalooban ng Diyos hanggang sa kamatayan (Fil. 2:5, 8).

Ang matuwid na lingkod ng Diyos ay may banal na takot sa Panginoon:

“Siyang matuwid sa kanyang lakad ay natatakot sa PANGINOON, ngunit siyang baluktot ang mga daan ay nagtatakwil sa kanya.” (Kaw. 14:2 NPV)

Ang may banal na takot sa Diyos ay humihiwalay sa kasamaan:

“Sa pamamagitan ng kaawaan at katotohanan ay nalilinis ang kasamaan: At sa pamamagitan ng pagkatakot sa Panginoon ay humihiwalay ang mga tao sa kasamaan.” (Kaw. 16:6)

Gawin nating pamalagiang panuntunan sa ating buhay ang pagiging matuwid at pagiging masunurin sa mga utos ng Diyos upang manatiling nabibigyan natin ng kaluwalhatian ang Diyos at sa gayo’y tamuhin natin ang Kaniyang masaganang pagpapala.

Have your friends and family watched this movie? If not yet, share it to them! ☺👍