قناة الشاعر الحسيني مصطفى الربيعي

المشايه ..


شعيرة المشي .. شعيرة قدسيه
قانون الآهي .. امشي اعله رجليه
بالأربعين بالأربعين بالأربعين

***********************

ياجنة الله اعله الارض
من الله جا هذا الفرض
لبينـــــه

لبيك صحنا اعله المشي
لو من زحل چا هم نجي
برجلينـــه


حاط بيك الله محبه هوايه
خلاك قبلة اطوفــك المشايه
من كل ارض من كتر عنايه
مابي شوائب حبنه وبلا غايه


مشي مشي .. كل انبياء الله تجيك لكربله
مشي مشي .. بشباجك تحط العلك وتقبله

وتهلي بزايرك وتعزّبه أميــه
شعيرة المشي شعيرة قدسيه

**********************

دوخنه هل وادم صـــدك
ترجمنه وش يعني العشك
بمصابك

لن ضامي مكطوع النحر
كل موكب يــوزع نهـــر
بثوابك


كل ساع تسمع هلا بلزاير هله
هلا بخطار الحسين وكربله
يعزبون عيونهم لليمشي اله
وادم بحب الحُسين مكبله


هلا هلا .. واحد يمسدلك جدم واخر متن
هلا هلا .. مايعرفك لكن يلاكيك بحضــن

ويكلك استريح بلموكب شويه
شعيرة المشي شعيرة قدسيه

*******************

شاب وصغير ويل كهل
وعجيزة وحديثه وطفل
تمشيلك

يتسابگون اعله الدرب
بوجوههم صفنه محب
توفيلك


طبع اليحب ميعطلنه ادروبه
لو علجمر هم يوصل لمحبوبه
واحدنه عابس بلعشك شك ثوبه
مشايتك يم الله عدهم حوبـــه

يحج يحج .. المفروض مو زاير يسمون اليجيك
يحج يحج .. يكلوله حاج الزايرك والمعتنيك

حجه وي كل خطوة بلكتب مرويه
شعيرة المشي شعيرة قدسيه

**********************

يم بابك تهيم الخلك
ارواحهم تصبح علك
بعتابك

كل الطوائف تمشي الك
حتى القساوس تكصدك
بمصابك


يا بوعلي مشايه يتعنولك
سني ومسيحي وصابئي يكصدولك
والغايه وحدة هي يتشكرونك
رمز ألاباء والعزه يعتبرونك

الك الك.. جبريل ميكائيل وي طه الامين
الك الك.. وفاطمة تمشي وتجيب ام البنين

يموحد الامم ادماك ثوريــه
شعيرة المشي شعيرة قدسيه

**********************

شكلوا علينه احنه البعض
حجتهم يشـــعن مرض
كورونا

ما يعرفون اسمك دوه
نشتمه طلسم بل هوه
عوفونا


من جان اليزورك يكطعون اجفوفه
ماخفنا من الطاغي ومن سيوفه
ننطي ضريبة ارواحنا ومنعوفه
كورونا ما تمنع جدم ملهوفه


افه افه .. يهتز كياني والك ماتمشي الجدم
افه افه .. كل خطوة مني اطفي نار البلخيم

انفرح ام عون ماتمشي مسبيه
شعيرة المشي شعيرة قدسيه

************************

الشاعر الحسيني مصطفى الربيعي

علي الاكبر ع والحشد الشعبي

موشح .. نزله منبري .. تقرأ زنجيل ثكيل و سريع



طب الاكبر وانجفت بأركانها
الارض تعرِف وقع فرسانهــا

_________________________

طب الاكبر وانشده جيش الكفر
تيهوا المشراد ودروب المفر
هذا حمزه لو علي لولا الكمر
ضيعت السبعين الف حسبانها

________________________

اشبه الخلق بمحمد طلعته
تضوي مثل الكمرة هي جبهته
الشمس وي الكمر من جهبته
رادته يصعد يضوي امجانها

______________________

دخل للطف والهوه بظهره ايلعب
هاشمي والهاشمي يهوه الحرب
حيد يشبه حيدره من ايغضب
العدة اضل تبلع بريجانها

____________________

وكف بلميدان واستهوى القتال
نادى وين الحيد يبرز للنزال
ضمضموا همه الركب مامش رجال
خافت جيوش العده واعوانها

______________________


عاد بلطف حادثة جده علي
وي ابن ود والغبر من تنجلي
اعله صدرك يابكر جا معتلي
ضعضع ايمان العده بفرسانها

______________________

علمخيم باوع وذب اللثام
صاح زينب عمتي ابعثلج سلام
اني الاكبر ياهو يدنيها الخيام
يبگى مامون الخدر وضعونها

_____________________

سطر الاكبر ملاحم تنشهد
توارثوها انصاره ابطال الحشد
كملوا هاي المسيرة للمجد
وادم اعله الحك تشجل اردانها

___________________


عدنا حشد اليملي عينج ياشمس
وادم تسابك تضحي بلنفس
ذوله درع المرجعية والحرس
ذول وادم من صدك شجعانها

_________________


الشاعر الحسيني مصطفى الربيعي
نسألكم الدعاء
ملاحظه .. الروايه تقول ان
مولانا علي الاكبر عليه السلام قَتل ابرز ما في جيش عمر بن سعد وهو ( بكر بن غانم )

.. السبي .. رئيسية

يامهدي شحجيلك
و منيــــن ابــديلك
ماينحجي البيه

الحادي من نادة
ياعمـــه الســادة
تمشين مسبيـــه

يامهـــــــدي •• يامهــــــدي


*********************

اه يمهدي الصار بيه ميتسولف بليســر

طحت قرأن ويوادم زينهم بؤرة كفـــر

ماكو للشيبه احترام وما يقدرون العمر

وكت كدامي يتجاسر بن سعد وي الشمر


عمه نزلــت دمعتي •• جدام الارجاس
طلــع للوادم لسـن •• من طاح عباس

يعمه .. ولــــوني
يعمه .. سبونـــي
يعمه .. اضربوني

بلسوط محنيـــه
تمشين مسبيـــه

********************

وسفه بت حيدر يمهدي توكف اكبال الشمر

وانه المحد شاف ضلها بخير ما دامه الكمـر

جنت اميرة وتاجي ستري والعرش جان الخدر

الهاشميــه العلويــه شلـون خـدي ينسطـــر


يمشي كدامي الضعن •• بي روس اهلنه
روس ماتنزف دمه •• تنــــزف محنــــه

يمهدي دمعنه
يمهدي افتركنه
يمهدي انجرحنه

يسبـّـون علويـــه
تمشين مسبيـــه

******************

وانه فوك الناكه عمه حايره وكلي جـــرح

شفت راس حسين يبجي دمع ينزل منذبح

ليــه باوع دار وجهه بلعجل مــال الرمــــح

شاف متني والعبايه امن الضرب صارن ملح


بحيرة ضليت ودمـــــع •• كل فكري يمــه
يطيح خاف امن الرمح •• ياهــو اليلزمه

عبينه .. محروكه
عبينه .. مبيوكـه
عبينه .. مشكوكه

والعلم خاچيــة
تمشين مسبيـــه

******************

عمه نظرات الشماته اعلينه توكع جن سهم

كمنـه بيدينـه انتلثــم لجـن شيفيـد اللثـم

البعـض مــن الفواطـم ستـر ســـون بالعلـم

كلشي عنده عيون صار واحنه مجموعه حرم


لأبوفاضل درته وجهي •• شاربه اهتز
اختاض ويباوع عليه •• والرمح نز

يباوع .. عليــه
يباوع .. لديـــه
يباوع .. رقيــه

زنــوده ما هيـه
تمشين مسبيـــه

*******************

اه يا هضم الخرايب حيلي من عدها انهدم

جبير وصغير بعباتي لاذت شكد الحرم

كمت اندس روحي بلجت هذا مو واقع حلم

شنو الجارة يابو صالح والضعينه تنسكم


انخبط جلدي وعباتي •• عمه فد لون
انحني لمن اكومن •• واني ام عون

ثكيله اسياطهم
ثكيله جلماتهم
ثكيله نظراتهم

من ماتت ارقيه
تمشين مسبيـــه

*********************
تمت بعون الله
الشاعر الحسيني مصطفى الربيعي
نسألكم الدعاء

موشح السبي

زينب يــوادم انخذت مسبيـه
بت حيدر امست ياخلك محنيه


يبو الاكبر اخذوها زينب مجتوفـه
رحله اطويله بين الشام وبين الكوفه
ماخلوها جسمك يا مـــولاي اطوفه
ذيج الاميــرة ما بگت محميـه

*************************

هي بحيرة مابين ايتامك والضمـــه
جدمها الطاهر عكبك ضل يجري دمه
من الشوك لجمر الخيم بت فاطمــه
المــن تصـد والمـن تفازع هيــه

**********************

بزجر وشتم اخذوها جيش الارجاس
وخدها الشريف امن الشمر سطرة انجاس
تتلفت ضلت هلبت يفزع عباس
علمشرعه اثنين اديّ مرميه

*********************

مابين حادي وشامت زينب جا بقـت
متعوبه من ركض الخيم نوب انسبت
بلعاشر من جويّ الجمر هي اتعبت
حتى العبايه بلجمــر مجويــه

**********************

عدها صبر ما ينوصف هذا الصبر
فوك الهزل وتصد على اخوتها النظر
فوك الرمح محموله ايات النحر
ايقونه صارت للعفه العلويه

*********************

مجتوفه راحت بلحبل اخذوها
تمشي ويجتال اخوتها خلوها
زينـب يوادم كلهــم يشتموهــا
من الحبل ايديها جا مدميه

**********************

وصلت الشام وچنه بلشام العيد
بدف وهلاهل دخلوها ليزيد
تجري دمعتها والدمع لا ميهيد
اباب القصر هي احضنت رقيه

*******************

كد كيدك واسعي شماردت ماتكدر
آل البيت احنه امن الشمس حتى انور
عدنا النبي وي فاطمه وي حيدر
جدنا النبي وانت جدك آميه


الشاعر الحسيني مصطفى الربيعي
نسألكم الدعاء

مابعد ( المقتل ) -- ( السبي )


رايحه مسبيه
ياا ابو الحنيه
راح امد اديــه
مدلي جفك يا حسيـــــن

*********************

طيحتك طعنة رمح
ماخلت انفــاس
ذبحتلي الأحساس
يلتشبه الياس
ياحبيبي

جيت اودعنك لچــن
بلحيره ضليت
ماكو انت من جيت
بس خنصر الكيت
زاد شيبـي

الخيل منك اشخذت جاوبني يحسين

انباك من صدرك ضلع تندله جا وين ؟

حوافــــر .. نهشت هلأضلاع
حوافــــر .. مسحوكـه بلكاع

وين ضلعك
مدلي جفك يا حسيـــــن

*********************

بيــك شمسويه العـدة
نايم علتـــراب
عاري بلا ثياب
عجبن السلاب
من سلبهن

حسين نزلت دمعتي
من شفتك بساع
مجفي على الكاع
من جسمك شضاع ؟
حتى المـــهن

ردت كتر بلا جـــــرح حتى احضنه بشوك

من الاظفـــر للنحـــر بجــروح محيــــوك

اويلـــي .. منيــن اني الزمك
اويلـــي .. اطيح ثلمه منك

خل المــك
مدلي جفك يا حسيـــــن

*********************

راح اروحن لليســر
مجتوفه علنوك
بس بينه متلوك
من ندخل السوك
و الخرايب

بين زجــرات وشتـــم
وسياط وصياح
خويه المتن راح
وانتم علرمــاح
يلحبايب

تدري برقيه من الهزل جم مرة طاحت

كلما تبـــاوع للنحـــر نكـــول ماتــــــت

حبيبـــي .. تحجي ويرمحك
حبيبـــي .. خليني احضنــك

تريد خــدك
مدلي جفك يا حسيـــــن

******************

صبرني شي بس بليســر
راسك يمذبوح
حسيته بي روح
يندبنه وينحوح
دمعتك دم

شفتك تصدلي ومختنـــك
بلعبره يحسين
ماعندك اثنين
لا صدر وايدين
حتى تلطم

عوفك من الوان العبي عاين عل ايـــدين

ركز شويه اعله الحبل شمسوي يحسيــن

يخويــــه .. محزوزة ايــدي
يخويــــه .. مجرح وريـــدي

خويــه احلفك
مدلي جفـــك يا حسيـــــن

*********************

وين اضمن وجهي انـــه
كلهم يشوفون
ليه و يظحكون
بيه يشتمــــون
العواذل

يأشرون اعله الحبــل
وبهمسه يحجون
ادري شيكولون
مو هاي ام عــون ؟
ع الهزايل

زفونه جن زفه عرس ياخويه للشام

وادم اتصفك والبقت بيديها دمـــام

مصيبـــه .. علويــــه اني
مصيبـــه .. لكن سبونــي

متت بعـدك
مدلي جفـك يا حسيـــــن

********************

الشاعر الحسيني مصطفى الربيعي
نسألكم الدعاء

.. فزاعيه ..

عباس وين جفوفك حسين صاح اعله النهــر

___________

يركض وذب اعمامتــه .. حسين صاح اعله النهر
فيض الطف بدمعتــــه
بلخيم زينب سمعتـــه
من صاح ياخوووي الگمر

عباس وين جفوفك حسين صاح اعله النهــر

_____________

يركض وگلبه منچــوي
معذور امفارك خـــوي
جرح الاخو جدا قوي
خنجر وينــدج بالظهـر

عباس وين جفوفك حسين صاح اعله النهــر


_____________

كلاله يا شيــــخ الزلـــم
للخوه ماضــل اي طعم
من شاجخ بعينك سهــم
جا ويـــن ذنيج السمــــــر

عباس وين جفوفك حسين صاح اعله النهر

_____________

الآن قلت حيلتــــــــي
من طاح نكهه دنيتـي
يا سند روحي وتجوتي
أبطيحتك كلشــي انكســـر

عباس وين جفوفك حسين صاح اعله النهــر

____________

الأخــو ياوادم سنــد
لا ميتعوض لا ابــــد
ميحل مجانه الف ولد
لو مات شيفيــد العمــــر

عباس وين جفوفك حسين صاح اعله النهــر

___________

يا ويلي سبع الگنطـــرة
اثنيــن آديـك مبتـــــرة
الميمنــــه والميســـرة
ومثلــــث بعينك عبــر

عباس وين جفوفك حسين صاح اعله النهــر

____________

لملم زنـــودك يا نفــل
ماتقبل لوحدي اضــل
كوم انتفض يبن الفحل
كوم انتقاسم بلنظــر

عباس وين جفوفك حسين صاح اعله النهــر

____________

يا وسفه من عندي رحت
كوم اكشخ بطولك ردت
هادود هاشم جا جنت
خل سيفك يرذرذ جمر

عباس وين جفوفك حسين صاح اعله النهــر



الشاعر الحسيني مصطفى الربيعي
نسألكم الدعاء

قصيدة الشهداء

رايحين وبسلامـــه مودعين
نلتقي يحبابنا عند الحسين
من وكت صار الهجر
هذا مو وكت الگبــر
رايحيــن رايحيـــن

************

شكثر يعقوب انتظر
وفارك عيونه النظر
لچن تاليته فرح

والدفن غالي بگبر
هذا گلي شينتظر
شينتظر غير الجرح

صغار لسه اعله اللحد
يا ارق من الــورد
اللحد بيكـــم ربـــح

مسافرين .. لديره مابيها محنه ولا ضوه
مسافرين ..فارگــونا عگــب ما جنه سوه

ما بـقى بيه صبــر
هذا مو وكت الگبر

************

ليش يومية نزف
چم شهيد وچم ترف
بس شباب التندفن

يا زمن شنهي الجرة
احبابي سكنوا مگبرة
وانه ساكني الحزن

الراح نعرف ما يرد
كلهم بعمر الورد
الورد يمهم خشن

عايفيـن .. ذكريات وضحكه وشويت صور
عايفين .. تلجم العين شكثر من تنذكـــر

راحوا احباب العمر
هذا مو وكت الكبر
..........................

شكم كمر طاح وخسف
حاضن تراب النجف
صار بخت المكبرة

ابو الوكـفه والوفه
راح يا دنيــا آفــه
الزمن ميكــــرره

راحوا اعزازي ومشوا
للمنايا توكلـــوا
كلبي الله يصبره

مناطرين .. روحي تنطركم لجن مدري شتريد
مناطرين .. تعتقد من مگبرة يرجع شهيد

ها يمر ها ما يمر
هذا مو وكت الكبر
........................

من اعاين ع الصور
يلتوي بعيني النظر
واغرك اني بحسرتي

بكل فرع وبكل درب
معلكه صوره محب
ذوله كلهم اخوتي

لبو لحيدر نداء
قدموا كلشي فداء
روحهم وي دمعتي

وين وين .. رايحين وعايفيني بدمعتي
وين وين .. اختنك كلما تذكر صحبتي

دمعتي تنزل جمر
هذا مو وكت الكبر
.................

شيگظي عمري بلهجر
وراحت اعزاز العمــــر
فاركونه ياعلـــي

اختنك وكت المسه
والونين اني احبسه
شوگ بيه يعتلي

صار يخنكني الهوه
ومات بعيوني الضوه
همي مااظن ينجلي

عايشين .. بروحي مثل الشمعه لمن تعتلگ
عايشين .. بيه واني احجيلكم عن الفرگ

امنياتي اني شكثر
هذا مو وكت الكبر

الشاعر الحسيني مصطفى الربيعي

محاورة بين السيدة زينب والعباس عليهما السلام


دموعـــي .. من الخيمة حد زنودك
دموعــي .. عوف الشريعه وجودك
الحــك عليـه مجتــوفه اديـه
يابوفاضــــــل يابوفاضـــــــل

***********
السيدة عليها السلام تقول

يادمعي ماخله جفن
طبكن بلخدود
من البجي سود اه يا عيوني

كل دمعة تجريلك ترة
بيها محنـــه
ياعطر اهلنه و رجوة ظنوني

جروح بيه اني شكثر لو تدري جا جيت
ابيــرغ الخيمه انه جـم عــــكدة سويت

حنيني حنيني ياجافل شلون
حنيني حنيني ذبلن هلعيــون
يابوفاضل يابوفاضل

************
يرد العباس عليه السلام

يختي اني اسف تيهت
دربــج يلخيــام
بعيني السهم نام بعيوني نابت

ردت اني اجيلج للخيم
ازحفلج ازحوف
تدريني ماشوف وزنودي طاحت

ابيش جودي اني احمله ماعندي ايدين
بسنوي شلته واركظت لخيام الحسين

يزينب يزينب طاحن سويــه
يزينب يزينب جودي واديــه
يابوفاضل يابوفاضل

***********
ترد السيدة عليها السلام

يلعازتك مثل الهوه
تبعد اموتن
تگرب اعيشن وحدك دوايه

يا نسمه بيه من تهب
تحييني عباس
اشتمك انفاس انت هوايه

كدما حنتني فركتك كـــد ما تأذيت
احزام من حبل الخيم بي ظهري شديت

يكافل يكافل ارحم حنيني
يكافل يكافل ردتك تجيني
يابوفاضل يابوفاضل

***********
يرد العباس عليه السلام

زينب لوّن عندي زند
اركظلج افياي
للخيمة بلماي وليمج اوصل

لو بيه حيل اكدر اجي
اتأخر شلون
غير انتي العيون بس حيل ماضل

گصرت خطوتي والدرب ياكل بالاحلام
ثكلت اجدامي والسبب اثگيله الاسهام


مصيبه مصيبه مكطوعه الأزنود
مصيبه مصيبه بلجبهه عامود
يابوفاضل يابوفاضل

**********
ترد السيدة زينب عليها السلام

ياخويه صحتك والشمر
واكف امامي
ويسب امامي ردتك تجيني

ردت اكشخ بطولك لجن
كلولي طايح
خيمة فواتح يا ضوه عيني

ماترضى خدي ينسطر من اردئ الناس
اكبالي ويصّيح الشمر ماعدها عبـاس

يخويه يخويه جرحك ذبحني
يخويه يخويه هجرك جرحني
يابوفاضل يابوفاضل


************
نسألكم الدعاء
الشاعر الحسيني مصطفى الربيعي