နိုင်ငံတော်က မိုးစပါးစိုက် ဧက (၅)သိန်းကျော်အတွက် ဓာတ်မြေဩဇာများကို အထူးဈေးဖြင့် ရောင်းချပေးမည်

နိုင်ငံ့စီးပွားမြှင့်တင်ရေး ရန်ပုံငွေဖြင့် စိုက်ပျိုးမည့် မိုးစပါး စီမံကိန်း ဧက (၅ ဒသမ ၃)သိန်းအတွက် လိုအပ်သည့် ဓာတ်မြေဩဇာနှင့် သွင်းအားစုများကို သက်သာသောအထူးဈေးနှုန်းဖြင့်ရောင်းချပေးသွားမည်ဖြစ်ကြောင်း သမဝါယမနှင့် ကျေးလက်ဖွံ့ဖြိုးရေးဝန်ကြီးဌာနမှ သိရပါတယ်။

အဆိုပါ မိုးစပါးစီမံကိန်းကို ရန်ကုန်တိုင်း၊ ဧရာဝတီတိုင်း၊ စစ်ကိုင်းတိုင်း နှင့် မန္တလေးတိုင်းဒေသကြီးများတွင် အကောင်အထည်ဖော်သွားမည်ဖြစ်ပြီး ၎င်းစိုက်ဧကများအတွက် ဓာတ်မြေဩဇာ တန်ချိန်ပေါင်း ၇၉,၅ဝဝ လိုအပ်မည်ဖြစ်ကြောင်း သိရပါတယ်။

လိုအပ်လာမည့် ဓာတ်မြေဩဇာများကို အထူးသက်သာသောဈေးနှုန်းဖြင့်ရောင်းချပေးသွားရန် သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန ၊ မြန်မာနိုင်ငံမျိုးစေ့၊ မြေဩဇာနှင့်စိုက်ပျိုးရေးဆေးလုပ်ငန်းရှင်များအသင်းတို့က ညှိနှိုင်းစီစဉ်ဆောင်ရွက်နေကြောင်း သမဝါယမဦးစီးဌာနမှ သိရှိရပါတယ်။