تکرار


سپین انقلاب


سپين انقلاب به راولمه دا مې ژمنه کړې

ځان تر ارمانه رسومه دا مې ژمنه کړې

شبنم د اوښکو له مظلومو اننګو وچوم

لمر يمه وړانګې خورومه دا مې ژمنه کړې

زه يم نسيم د خپلواکۍ د ارمانونو بڼ ته

غوټۍ د هيلو راسپړمه دا مې ژمنه کړې

يتيمه ستا سوو آهونو پارولی يمه

ستا انتقام کله پرېږدمه؟ دا مې ژمنه کړې

مسته څپه د رودِنيل يمه په جوش راغلی

د وخت فرعون به غرقومه دا مې ژمنه کړې

مغرور جهان چي لاس په نام شي يو ځل بيا پامير ته

دا سپين بيرغ پرې رپومه دا مې ژمنه کړې

نظامه کړې مې ازل کې ده وعده د وفا

سر په دې لار قربانومه دا مې ژمنه کړې