GADDI HAA GADDU
----------------------------------------------
Abdii kutuun dawaa hinqabu
Onnee cabsee sammuu onsa
Burqaa yaadaaf abjuu guddaa
Keessa namaa haree gogsa!
Kophaa baasee garaa hammeessa
Itti hasaasee rakkoo itti hima
"Mudannookee kana caala
Maaltu ulfaata, maaltu cima?"
"Maali kan kee hiikni jiruu
Erga dhabdee falaaf hiikoo
Jireenya kee kan yaadatu
Firumallee qabdaa siikoo?"
"Milkooma keef kan gammadu
Dhukkuba keef darbee aadee
Kan bilbilee si dubbisu
Jireenya kee ofiin yaadee?"
Hin qabdu...!
"Maalifiree dadhabbiin kee
Eenyuuf jettee tabba dhiibda
Eessa geessee eenyu arguuf
Yeroo hundaa kaatee fiigda?"
"Kee asuma lafa gaddaa
Boquu buusii kana yaadi
Akka nama dhukkubsatuu
Fayyaa ta'ii eela aadi!"
Yoo siin jedhee sitti asaase
Abdii kutuun akka malee
Dubbiin sobaa harka hin laatiin
Didii darbi yaa qaxalee!
Fuuldurakee waatu jiraa
Burqaa guddaa lafa akka
Suuta hindeemiin darbi fiigii
Furtuunsaayyuu suma harkaa!
Namni kaayyoo rakkattullee
Tasa kuftee tasa hin badduu
Maaf gaddita yaa qaxalee
Ofiisaatii gaddi haa gadduu!
------------------------------------------------
Ifargan Guddataa.
@Jimmaapress@JimmaapressMust share it🙏🙏
