Oshiq Darvesh💌

Тарки дунё қилсам, Худо яратган мўъжизалардан бебаҳра қоламан. Ахир бу дунё ҳам уники.

Ошиқ Дарвеш
@oshiq_darvesh

Санъат - диннинг дунёвий синглисидир.

Адалберт Штифтер.

@oshiq_darvesh

Jannati qiz.

Sening mayus ko'zlaring kulmas
Kulmas nega charos ko'zlaring?
Bugun botmas ranjitmas aslo
Xanjar kabi o'tkir so'zlaring.

Nima bo'ldi, g'amginsan juda?
Nega buncha o'ylarga tolding?
Uzoq kutib tun og'ushida
Oymomoni quchoqlab olding.

Ey jannati, ey malak siymo
Mayus qarab yuragim ezma
Sen jannatdan kelgansan axir
Bu dunyoni behuda kezma.

Maraz dunyo qalbingga kirib
Seni ishqdan tutmasin uzoq
Sevgisizlar xayoling buzib
Pok yo'lingga qo'ymasin tuzoq.

Ay jannati, ay malak siymo
Parvo qilma, o'kinma hech ham
Seni asrar vafoli hayo
Xudo seni yaratmagan kam.

Sening mayus ko'zlaring kulsin...

Oshiq Darvesh.

Sevgini xotirlab.

Izlayman muhabbat makoning
Armon ichra borar qadamlar
Ko'ksimda ochilgan tikoning
G'uncha bo'lmoq-chun odimlar.

Otashing jahannam deydilar
Men uchun jannatdir bu g'amlar
Ishqsizlar o'z boshin yeydilar
Tushunmas azizdir bu damlar.

Sevgini quvarlar dargohdan
Dargohing qadrsiz mayxona
Ko'zyoshlar yaralur bir ohdan
Muhabbat sen qandayin ona?

Sevgini so'karlar chapallab
Qadri yo'q bechora gadoymi?
Oshiqlar kun ko'rar amallab
Orzu ham qilmaslar saroyni.

Saroyga sultondir xiyonat
Sevgini buyurdi o'limga
Muhabbat, jimliging jinoyat
Aldama, may tutma qo'limga.

Suyangan do'stginam sen eding
Umidvor qalbimning tayanchi
Sevgining boshini sen yeding
Muhabbat, barchasi ayanchli.

Men endi kimlarga suyanay?
Sevgisiz bu dunyo keraksiz
Men endi kimlarga aylanay?
Sevgi yo'q! Yorim ham yuraksiz.

Oshiq Darvesh.
22.10.21

Куч

Кўзингдан чиқмаган ёшларга
Ачиниб кетаман гоҳида
Қалбингни қоплаган тошларга
Дардимни айтаман гоҳида.

Лабларинг сўзлайди ёлғонлар
Дилингда ҳақиқат йиғлайди
Ёлғонга учади нодонлар
Билмасдан юрагин тиғлайди.

Кулишга журъатлар топасан
Бардошинг ҳайқирар ичингдан
Сен эса барибир тонасан
Ишониб ожиза кучингга.

Сочингдан ясалган дорларга
Қатлимни топширгум ишониб
Сен эса сочингга зорларга
Жазони топширдинг ийманиб.

Ошиқ Дарвеш.
1.12.21

Дуо қил.

Сажда қилгин, дуолар қилгин
Сохта кўзёш тўккандан кўра
Сендан кечиб кетишим дилбар,
Мендан эмас, худодан сўра.

Тунлар бедор тилагинг тила
Ёлвор, йиғла, интил Тангрига
Мен-чи, бўлсам қотил ишқ ила
Кўмилайин сенинг бағрингга.

Худо қувсин дунёдан мени
Дуо қилгин, ёлвориб сўра
Тушларингда чақирсам сени
Ўқиб қўйгин бирорта сура.

Худо айтсин менинг қалбимга,
Ишқинг чиқсин оташ қонимдан,
Жазо берсин тошдек сабримга,
Жоним олсин сенинг жонингдан.

Ошиқ Дарвеш.

Parizod.

Go'zalsan, go'zalsan chiroyda tengsiz
Men sendan tiladim visol parizod
Ko'zlaring, ko'zlaring toshqin bir dengiz
Sevgimni shafqatsiz bir bo'sangga sot.

Meni ko'm! Ko'm meni! Ko'mgin parizod
Ko'milib yo'q bo'lay ko'ngling dashtida
Kipriging tig'i-la ko'ksimga otsang, ot!
Jazo ber oshiqqa mashuqlik shashtida.

So'zlagin, so'zlagin haqqing bor axir
Bilaman, sezaman so'zlarim taxir
Ishonib, suyanib yashay orzuga
Qulog'im ostida sassiz bir hayqir!

So'zlasa, so'zlamas lablaring mayli
Yuraging ismim-la, ursin to'xtovsiz
Teskari aylansin zamona zayli
Sevishib yashaylik mayli o'xshovsiz.

Sevishib yashaylik odamlar kulsin
Kulsin, kulib-kulib, yig'lab qolishsin
Mayli sevgimizdan bu dunyo kuysin
Mayli g'iybat qilib, mayli nolishsin.

Bardoshni quchaylik matonat ila
Qo'llarim ushlagin manguga faqat
Hammasin parizod Xudodan tila
Azaliy baxt erur biz kutgan toqat.

Visolga erishsak shul erur bizga
Yolg'izim Xudodan mangu saodat.

Oshiq Darvesh

Qaydasan sevgilim?

Tirikmanmi sensiz o'zim?
Ko'rmayapti sensiz ko'zim
Kim tinglar ayt erinmasdan
Mening aytgan har bir so'zim.
Qayga ketding sevikligim?
Sen qaydasan sevgilim?

Uyqu qochdi xayol daydi
Seni izlar yurak sho'rlik
Kutganimiz bahor qaytdi
Eh, yo'qliging ne ko'rgulik.
Qayga ketding sevikligim?
Sen qaydasan sevgilim?

Araz meni ketsin so'yib
Orom olsin sening ko'ngling
O'jar rashking qolsin suyib
Ishqdan ravon bo'lsin yo'ling.
Qayga ketding sevikligim?
Sen qaydasan sevgilim?

Izlaringdan unsin chechak
Kel, azizim qayda bo'lsang
Sen yoqtirgan oq moychechak
Ochilarmish agar kelsang.
Qayga ketding sevikligim?
Sen qaydasan sevgilim?

Qizg'aldoqlar ko'zyoshi qon
Yo'llaringga tikarlar ko'z
Jonsiz tanam axtarar jon
Bo'g'zim ichra oxirgi so'z.
Qaytib kelgin sevikligim
Yonimga qayt sevgilim!

Oshiq Darvesh.
30.10.21.

Kumush.

Bahorlarni sog'intirgan
Lahzalarni ovuntirgan
Uyqularim o'ngidagi tush.
Balki orzu, shirin orzu
Oralagan sokingina tush.
Balki taqdir, achchiq taqdir
Saralagan vafosiz bir tush.
Balki telba, oshiqona
Aqldanam begona,
Esdan og'gan hush.
Balki naydir, balki maydir
Nechun meni ayamaydir?
Kim ekan u, ajal soqiy?
Ayladi-ku, meni sarxush.
Meni tinglang, tinglang meni
Oy Kumush, oppoq Kumush.
Nola qilmang, qilmang da'vo,
Mayli bo'lmang Momo Havvo
Yo'qolmasin sizdan kulgu
Nari ketsin johil jafo.
Kuyib ketsin yolg'on vafo!
Sevgi kuylang, kuylang sevgi!
Yuragingiz sevgi dedi
Xasadchilar, sevgisizlar
Sevgi yolg'on desa debdi,
Siz ularga qilmang parvo.
Parvoz aylang misli oqqush,
Oy Kumush, oppoq Kumush.
Odamlarni suring chetga
Ular kasbi aniq mish-mish
Gaplarini aytmas betga
Biling Kumush, biling Kumush!
Siz jilmayib, xandon otib
Kuling Kumush, kuling Kumush!
Garchi she'rim kelmasa xush
Yoqmasa ham bo'lmas xomush
Sizni sevdi Oshiq Darvesh.
Biling Kumush, biling Kumush!
Tushlarimdan ketmas bo'lib
Keling Kumush, keling Kumush!

Oy Kumush, oppoq Kumush.

Oshiq Darvesh.
06.10.21

Ta'rif.

Kulgular soxtamas ammo yondurur
Oq yuzda hayo mavj urib turadi
Ko'zlar jilolanib beradi surur
Tutash qalblar ishqdan yonib turadi.
Shamol ham esadi sochlar ostidan
Soyaboni erur bulutlar oppoq
Ta'rifini so'rang oshiq xastadan
Zaboni aylanmas bosadi titroq.
O't chaqnar qadamlar keladi shaxdam
Dudoqlar atirgul qonidan ichgan
Boshida gulchambar turadi har dam
Gullar ham alamdan chamandan kechgan.
Ey, Darvesh holingni kimga aytasan?
Bechora sevgingga kuladi pari
Joningni ne uchun jafo aylaysan?
Nahot armon bo'lsa orzular bari?!

Oshiq Darvesh

Таажжуб.

Кимлар кетди билмайман
Қолганлар йўқ ёнимда
Мен сира нолимайман
Шукрона ҳар онимда.

Кимлар керак билмайман
Қалбим сўрар худони
Нажот истаб кулмайман
Соғингайман самони.

Жилмаяди оймомо
Ачинади ёлғондан
Алла айтар бир момо
Сўзлар тўқир армондан.

Шивирлайди юлдузлар
Кетган асли ким дея
Ёришади кундузлар
Умримни ея-ея.

Кундуз кетди сен билан
Мен тун билан қолганман
Қолган умримни жоним
Тундан қарзга олганман.

Ошиқ Дарвеш.
20.12.21

Taqvo

Mardlikdan so'zlama fidolik qilma
Sadaqa qilib ket gado qalblarga
O'zgacha yashama ayrolik qilma
Haq so'zni qistirgin jonsiz lablarga.

Taqvodan so'z ochsang, o'zing eshitgin
Yuraging ichidan alamlar chiqsin
She'rlaring ichida chaqmoqlar chaqib
Qalamlar yozolmay bo'linib sinsin.

O'zingga ishonib, o'zingga kulgin
O'zingga suyanib, o'zingga yig'la
Qalbingga ko'milib, ko'ksingga to'lgin
Sajdaga bosh qo'yib peshonang tig'la.
(O'ziga yig'lagin faqat O'ziga)

Ibodat aylagin yakka Xudoga
Iymonning zaridan tobuting yasa
Noumid qo'lingni ochma duoga
Sen hayvon emassan, insondek yasha!

Oshiq Darvesh

@Oshiq_Darvesh 🕋

🕋Bismillohir Rohmanir Rohim🕋