هالحوافر ➖باگن امن اعيوني صدرك
هالبواتر➖گطعن جدامي نحرك
وين انام➖ والترافه اتوذرت
وين انام➖ والمحنه اتطشرت
🔹🔹🔹🔹🔹🔹🔹🔹🔹🔹🔹🔹🔹🔹🔹
الله لا ينطي الخيول الاعوجيه
                 كسرن وشلعن گلب بتك رقيه
اربعين ارجلهن وداسن سويه
           ساون اضلوعك عله اتراب الوطيه
سحگه سحگه➖ يجولن وانه احسبلهن
طگه طگه➖ انكسر صدرك من فعلهن
وين انام➖ والضلوع اتكسرت
وين انام➖ والمحنه اتطشرت
🔹🔹🔹🔹🔹🔹🔹🔹🔹🔹🔹🔹🔹🔹🔹
جيت اركض حي اشوفك هذا ضني
         عمتي زينب وختي سكنه ايناطرني
بويه سطرات آل اميه عورني
          ياهو امر من يمه ياخذ سطره مني
والهضيمه ➖عمتي زينب شتموهه
جم يتيمه➖ خلاف عينك سلبوهه
ويم انام ➖ والخيام اتبعثرت
وين انام➖ والمحنه اتطشرت
🔹🔹🔹🔹🔹🔹🔹🔹🔹🔹🔹🔹🔹🔹🔹
الليل راح يجل عليه وانه طفله
                واليريد ايطگني بابا شنهو أگله
السطره تحرگ خدي والله وماهي سهله
          متني هادل بابا ضرب السوط شله
بابا تدري➖ركد حيلي امن البواجي
وكسر ضهري ➖الجرها من ذاني التراجي
وين انام➖وعيني لجلك ساهرت
وين انام➖ والمحنه اتطشرت
🔹🔹🔹🔹🔹🔹🔹🔹🔹🔹🔹🔹🔹🔹🔹
هذا انته الطايح وخدك تعفر
                 هذا انته النايم وجسمك توذر
وين راسك بويه شو مگطوع منحر
             وين بابا مبسمك والوجهه الازهر
وين هدمك➖ليش عاري اعله الترابه
يجري دمك➖وعالوجه نايم يبابا
وين نايم ➖ يلشفاك اتفطرت
وين انام➖ والمحنه اتطشرت
🔹🔹🔹🔹🔹🔹🔹🔹🔹🔹🔹🔹🔹🔹🔹
بابا اگعد خل نرد انطيني ادينك
        اتجه يا بابا اعله ضهري وخل اعينك
اهناك سكنه تصيح بويه حسين وينك
               اطفالك وعماتي كلهم ناطرينك
گوم ردني ➖امن النده گلبي تگطع
وعله متني ➖ انتجي وخليمه نرجع
وين انام ➖ روحي والله تحيرت
وين انام➖ والمحنه اتطشرت
🔹🔹🔹🔹🔹🔹🔹🔹🔹🔹🔹🔹🔹🔹🔹
انجان ما تگدر ترد آنه ابقى يمك
           بابا بس اشبگني حتى اگدر اضمك
افتحلي صدرك خلي ابوسنك واشمك
               وين ما احط ثوبي يجري دمك
ما لگيته➖بس جلد جا وينه صدرك
اتلمسيته➖الكيته متساوي ويه ضهرك
وين انام➖ ابنيتك شكد ناطرت
وين انام➖ والمحنه اتطشرت
🔹🔹🔹🔹🔹🔹🔹🔹🔹🔹🔹
حسين باهض الحلفي


🌲 دوحة الإبداع الحسيني 🌲

بإدارة معلم المقامات والملحن الأستاذ علاء الفهد

نتشرف بكل خدام الحسين ع المخلصين

كروب للنشر القصائد والألحان
والدروس الخاصه لتطوير الانشاد الحسيني

رابط المجموعة 👇

https://t.me/joinchat/AGWwjj3bQas6di_ZBggXoA