《 د قندز غميزي ته 》

غــم دي لـه زغــم نه شو برون قندزه
چي شو په سرو اورو دي یـون قندزه

لکه غاټول سُنبل ریحان ماشومان
ځي ستا له غیږي نه ګلګون قندزه

هَدَر به نه شي ستا معصومي ویني
زلمو دی کړی پیوستون قندزه

کاش چي ها ستا فاتح نن هم ژوندی وای
بیا بې در کړی وای ژوندون قندزه

په لر او بر کي مسلمه اُمت شو
دا ستا په حال باندي مَحزون قندزه

یوازي ته نه یې په سرو لمبو کي
فراه وه ستا پر حال پرون قندزه

دا بې ضمیره بې وجدانه باچا
ولئ تړلی لا زبـــــون قندزه

تر سترګو نم له زړه یې ویني څاڅي
حُسَام دی ستا په حال شواخون قندزه

سیدحسام هاشمي