Рус адабиётининг забардаст вакилларидан бири Александр Блок шеъру достонларининг муҳиблари ўзбек халқи орасида анчагина. Асқад Мухтор, Эркин Воҳидов, Шукрулло, Абдулла Шер ва бошқа ҳамюрт ижодкорлар томонидан унинг ёзганлари қўйма тарзда она тилимизга ўгирилган ва қалбимиз тўридан жой олган. Яқинда “Ўзбекистон” нашриёти томонидан унинг “Булбул чамани” номли (“Рус адабиёти дурдоналари” рукнида) шеъру достонларини жамлаган китоби нашр этилди. Адади 10000 нусха.
Китобдан каминанинг ҳам 40га яқин таржималари ўрин олганидан бахтиёрман.
Блок қолдирган улкан адабий мерос теранлиги билан умумбашарий аҳамият касб этади.
***
Хўп даҳшатли сен-ла учрашмоқ,
Учрашмаслик ундан-да даҳшат.
Ҳайрат ичра тонг қотдим ҳар чоқ,
Ҳар неда жам белги, ишорат.
Кўча бўйлаб изғир соялар,
Яшадимми, ухладим, билмам.
Етакларку зинапоялар,
Ортга боқмоқ қўрқинчли ҳар дам.
Қўлин қўяр елкамга вазмин,
Аммо исмин эслай олмайман.
Тунов кунги азадаги ун
Қулоғимда янграр, нетай ман?
Пастлаганча хўмрайган само,
Бутхонани чулғайди бутун.
Сен ҳозирсан, яқинсан, аммо
У томондан боқасан маҳзун. @UrozHaydar804