(ثكيل الى علي الاكبر )


  يمي  ياليلى  تعالي ... تحضري  للسود الليالي


راح ابني الاكبر بعد ... وتدرين ابني شكثر غالي



_________________________________


مو توني فاكد صحبتي وهساع راح اوليدي

كل  حيل ماضلي بعد وخايف اضل وحيدي

تمددت  انه  وي  علي وكلته  يبني  اشبيدي

الموت  غفله  غافلك  وياعلي  ضل  ترديدي



ياليلى ماسالم شبر ... وعمره مو مالت كبر


حاجيته لاجن مايرد ... وطايح اوليدي اكبالي




____________________________________


شاب واعز من النفس ابني طريح الحومه

ياليلى وسيوف العده غيرت حيل ارسومه

حاجيته وانظر لوجنته سابح علي بدمومه

هيه الفركه من الزغر لوليدي جن مقسومه





طولي وي طوله انمدن ... ودمعاتي لجله اتبدن


 ياليلى  شو  راح الولد ... واني   انمرد   دلاالي




____________________________________


من صاحني الحك علي كلبي انكسر واتفطر

وكلت  ياربي  دخيل  بس كون موش الاكبر

من  صاح  ياليلى  كمت امشي واردن واعثر

هيج  الدرب خلص ركض لحين نظرته مطبر



عاتبته بس شفيد العتاب ... من شفته فوك التراب


  كتله  انته  للوالد  سند ... حاله شده كل حالي



___________________________________


بحر الرمل خده انصهر وعيونه كوه يفكها

وانه  كلت  لو  تنفجع  ليلى  وماتت حكها

لمن  وصلت  انه  اله شهكت  بعد يشهكها

ليلى كوه احجي انه روحي الحزن خانكها




غمض اعيونه وغمضت ... وجلمه بعد ما اسمعت


والموت   مايرجع  احد ... وراح انتظر موتي التالي



____________________________________


جلمه يابويه من علي ماظن بعد نسمعها

لو  طالعه  روحي  انه  ولا الدهر فاجعها

ايامنه  البيهه علي شنهو  الذي  يرجعها

يكسر الخاطر حالنا وروحي فكد روعها




  من اربع جهات مطبر ... ويلي اعلى ابني الاكبر


خان   الدهر  بيه  الوعد ... والموت اجه ويبرالي





____________________________________



ضنوتنه ذاك الجان امس شمعه يشع اضواها

ياليلى   ياوسفه  الدهر  بغلفه  بدمع  طفاها

صورة  جماله  وهيبته  هيهات  انه وانساها

ابني  طاسه  ماي  الي  وبس  الوكت  بداها




طابك ارموشه ماانفتحن ... يمه فدوه لاتصيحن


   نايم   عفته   ولا  كعد ... نايم   اوجه   يلاالي




الخادم : عباس محمد الحميداوي


1442.2020محرم الحرام