Ko'nglimdagi gap

Bobo dehqon kaftlarida yer aylansin,
Yenglarida to'rtta fasl gir aylansin,
Belbog'idan mehri tomib ter aylansin,
Bug'doylari unib-o'sin qor ishqida.

Aylanayin shirmoy kulcha, patirlardan,
Tong yeliga rayhon sochgan atirlardan,
Cho'pon o'tov tikib baxmal adirlardan
Qo'shiq aytsin childirma-yu tor ishqida.

Gul labiga kapalaklar qo'yganda bosh,
Bir olamda ikki xilqat bo'lar sirdosh,
Koinotni erkalatib bobo quyosh,
Nurlar sochsin burgutlar-u sor ishqida.

Tun qo'ynida yulduz kezar falaklarni,
Ko'ngillardan terib ezgu tilaklarni
Kokillari bo'yiga teng malaklarni
Oshiqlari yig'lab kelsin yor ishqida.

Dunyo kezib aylanadi sopol lagan,
Usta kulol kunda tuproq hovuchlagan,
Ipak yo'li karvonini opichlagan
Saxrolar ham bor bo'lsin-da nor ishqida.

Qoyalardan uchar ohu jayronlari,
Yerda yotgan ayting kimning armonlari?
Belin bog'lab O'zbegimning o'g'lonlari,
Ot choptirib maydon kezsin or ishqida.

Eski shiypon ayvonida sayrar qumri,
Shukur qilib ovozini qayrar qumri,
Tugamasdan har insonni go'zal umri,
To'nin tashlab ketmasin hech dor ishqida.

✍Ergashev Biloliddin

@sherlarolamii