🌹🌹🌹🌹🌹🌹🌹🌹
BU OQSHOM

Bu oqshom porillar dil, nuringgizda,
Diydor baxti nasib yana Siz bilan.
Turibman, azizlar, huzuringizda,
Hamon o'tlig' ko'ngil, yorug' yuz bilan.

Hamon mulkimdagi siymu zarim- she'r,
Sochimda, chehramda yillardan nishon.
Sajdagohim tanho Vatan, ona Yer,
Orzularim karvon, sarbonim ishonch.

Hamon ota-onam, ikki jahonim,
Aziz yodi aro shikasta, butman.
Ishqim-alangadir qordir hijronim,
Sakson yil, lovullab so'nmagan o'tman.

Ikkita ko'zimga ikki qorachig'
-Munisim Hulkarim, alpim Omonim.
Shirin nabiralar hayotdan tortig'
Har biri joniga payvanddir jonim.

Nomlari , yodlari payg'ambar monand,
Hazrat ustozlarim-teran ildizlar.
Men undan jon olib ko'kargan daraxt,
Mevasi-qalbimdan otilgan so'zlar.

Hikmatlar bag'rimda dur marvaridim,
Ajdodlarim menga iftixor, g'urur.
Shu mavjlardan tomgan nuqra umidim,
Shoira qizlarim baxsh etgan surur.

Bu nazm bog'iga kirolmas xazon,
Bizni mahf etolmas zavol lashkari.
Men ketsam mung'aymas umrim hech qachon,
Bu bog'lar-bir bog'lar bo'ladi hali...

Hamon e'tiqodim-haqiqat, haqdir,
So'zlayman, yuzimni tutib Ka'baga.
Yemira olmaydi o'tkinchi taqdir,
Osuda o'tadi ruhim abadga.

E'zozlar, ardog'lar uchun tashakkur,
Asli Siz oftobim, men ziyosiman!
Tonglaringgiz kulsin dorilomon, hur,
Baxtim shul-o'zbekning Zulfiyasiman!

🔥🔥🔥🔥🔥🔥🔥🔥