Hayot eng yaxshi muallim, lekin u juda qimmatga o'rgatadi!

Insonlar umuminsoniy sifatlardan yiroqlashib ketmagan bo'lsa, yaxshi yoki yomon deb atalishi har kimning o'lchoviga ko'radir. Hammasidan ham saboq olish mumkin.

Sizga shunday — ongimda muhrlanib qolishini istaydiganim, amal qilishim kerak bo'lgan bir saboqni ulashmoqchiman:

✅ Imkoningiz bo'lsa, hech kimdan tilingiz qisiq bo'lmasin ekan. Nafaqat moddiy jihatdan, hatto ma'naviy tomondan ham.

Albatta, bu jamiyat orasida yashar ekanmiz, insonning insonga ishi tushadi, yordamiga muhtoj bo'ladi. Hatto ba'zan tasalli istaysiz-u, uning o'rnini hech narsa bosa olmaydi.

Ammo odamlar sizga o'tgan hech bir haqqini unutmaydi:

— men seni kechirganman;
— men seni tushunganman;
— men seni qo'llab-quvvatlaganman...

Pul qarz bo'lgan bo'lsangiz-u, berib qutulsangiz, ammo tuyg'ularning to'lovi nima?

Keyin mulzam qilmoqchi bo'lsang, nega kechirding? Kim uchun kechirgan eding — men uchunmi yoki Alloh uchun?

Sen meni qarzga tushungan edingmi? Seni tushunmay qolganimda qarzimni eslatyapsanmi? Yoki tushunishlarimizni hisoblab boramizmi — sen 5 marta tushunding, men 4 marta deb-a?

Qo'llab-quvvatlagan bo'lsang, nega qo'llab-quvvatlagan eding? Bir kun yuzimga solish uchunmi?..

Xulosa shuki, odamlarga beminnat yaxshilik qiling va o'zingiz ulardan "qarzdor" bo'lib qolmang ekan. Shunday kunlar keldiki, odamlar bosgan laykini ham minnat qiladi!..

#Kechinmalar

@GiyosiddinYusuf