ဘောလုံးသတင်းစုံ

ပရီးမီးယားလိဂ် ထိပ်သီးကလပ်များဖြစ်သည့် မန်ယူ၊ အာဆင်နယ်နှင့် ချယ်လ်ဆီးအသင်းတို့သည် လိုက်ပ်ဇစ်အသင်းမှ ဆလိုဗေးနီးယားတိုက်စစ်မှူး ရှက်ရှ်ကို ကို လာမည့် ဇန်နဝါရီအပြောင်းအရွှေ့တွင် ခေါ်ယူရန် ချိန်ရွယ်နေကြောင်း သိရသည်။

အသက်(၂၁)နှစ်သာရှိသေးသည့် ရှက်ရှ်ကိုသည် ဆလိုဗေးနီးယားလက်ရွေးစင်အသင်းတွင် အမာခံကစားသမားအဖြစ် ရပ်တည်နေသလို၊ လက်ရှိကလပ် လိုက်ပ်ဇစ်အသင်းတွင်လည်း ခြေစွမ်းပြနေသည့်အတွက် ပရီးမီးယားလိဂ်ထိပ်သီးအသင်းများက မျက်စိကျနေခြင်းဖြစ်သည်။

အာဆင်နယ်၊ ချယ်လ်ဆီးနှင့် မန်ယူအသင်းတို့သည် ၎င်းကို ပြီးခဲ့သည့် နွေရာသီကတည်းက ခေါ်ယူရန် ပစ်မှတ်ထားခဲ့သော်လည်း ရှက်ရှ်ကိုက လိုက်ပ်ဇစ်အသင်းတွင် ဆက်နေရန်သာ ဆုံးဖြတ်ခဲ့ပြီး ၂၀၂၉ ခုနှစ်အထိ သက်တမ်းတိုးစာချုပ် ချုပ်ဆိုခဲ့သည်။ ယခုအခါ ပရီးမီးယားလိဂ်ထိပ်သီး(၃)သင်းက ဇန်နဝါရီစျေးကွက်တွင် ၎င်းကို ထပ်မံကြိုးပမ်းရန် ချိန်ရွယ်လာခြင်းဖြစ်ကြောင်း သိရသည်။

အာဆင်နယ်အသင်းသည် အဓိကတိုက်စစ်ကစားသမား ဆာကာအား နှစ်လဝန်းကျင် အနားပေးရမည့်အပြင် မူလကတည်းက တိုက်စစ်ပိုင်းကို အားဖြည့်ရန် လိုအပ်နေခြင်းကြောင့် ရှက်ရှ်ကိုကို ကမ်းလှမ်းမှုပြုလုပ်ရန် စီစဉ်လာခြင်းဖြစ်ကြောင်း သိရသည်။ မန်ယူအသင်းကလည်း နည်းပြသစ် အာမိုရင်မ် သဘောကျခြင်းမရှိသည့် အင်္ဂလန်တိုက်စစ်မှူး ရပ်ရှ်ဖို့ဒ်အား ရောင်းထုတ်ကာ ရှက်ရှ်ကိုကို အစားထိုးခေါ်ယူရန် စီစဉ်နေခြင်းဖြစ်ကြောင်း သိရသည်။ ချယ်လ်ဆီးအသင်းမှာမူ တိုက်စစ်ကစားသမားများစွာ ပိုင်ဆိုင်ထားသော်လည်း ကာလရှည်အသုံးပြုနိုင်မည့် လူငယ်ကစားသမား ရှက်ရှ်ကိုအား ခေါ်ယူ၍ အပြောင်းအလဲပြုလုပ်ရန် စီစဉ်ခြင်းဖြစ်ကြောင်း သိရသည်။

ရှက်ရှ်ကိုသည် မန်စီးတီးတိုက်စစ်မှူး ဟာလန်းကဲ့သို့ ပရီးမီးယားလိဂ်တွင် ခြေစွမ်းပြနိုင်မည့်သူအဖြစ် ထင်ကြေးပေးခံထားရသူဖြစ်ပြီး ၎င်းကလည်း တစ်ချိန်ချိန်၌ ပရီးမီးယားလိဂ်တွင် ပြောင်းရွှေ့ကစားရန် ရည်မှန်းထားကြောင်း သိရသည်။ ၎င်း၏ အသက်အရွယ်နှင့် လက်ရှိခြေစွမ်းအရ ၎င်း၏စျေးကွက်တန်ဖိုးမှာ ယူရိုသန်း(၈၀)ဝန်းကျင်ရှိနေပြီး ယင်းပမာဏ သုံးစွဲမှသာ ခေါ်ယူနိုင်ဖွယ်ရှိကြောင်းလည်း ကျွမ်းကျင်သူများက သုံးသပ်ထားသည်။

ပြင်သစ်ထိပ်သီး PSG အသင်းသည် တူရကီကလပ် ဂါလာတာစာရေးအသင်းတွင် တစ်ရာသီအငှားဖြင့်သွားရောက်ကစားနေသည့် နာပိုလီတိုက်စစ်မှူး အိုဆင်မန်အား လာမည့် ဇန်နဝါရီအပြောင်းအရွှေ့ကာလတွင် ခေါ်ယူသွားရန် စီစဉ်နေကြောင်း RMC Sport က ဖော်ပြခဲ့သည်။

အသက် (၂၅)နှစ်အရွယ် နိုင်ဂျီးရီးယားတိုက်စစ်မှူး အိုဆင်မန်သည် ယခုရာသီတွင် ဂါလာတာစာရေးအသင်းအတွက် ခြေစွမ်းပြနေပြီး ပြိုင်ပွဲ စုံ (၁၄) ပွဲတွင် (၁၀) ဂိုးသွင်းကာ ဂိုးဖန်တီးမှု (၅) ကြိမ် ပြုလုပ်ထားသည်။

PSG အသင်းသည် အသင်းတိုက်စစ်မှူး ဘာပေ ထွက်ခွာသွားပြီးနောက် အသင်းတိုက်စစ်ပိုင်းကို ထိပ်တန်းတိုက်စစ်မှူးတစ်ဦးဖြင့် အားဖြည့်ရန် ရည်မှန်းနေခြင်းဖြစ်သည်။

PSG အ သင်းသည် ပြီးခဲ့သည့်နွေရာသီတည်းက အိုဆင်မန်အား ခေါ်ယူရန် ကြိုးပမ်းခဲ့ခြင်းဖြစ်သည်။

သို့သော် PSG အသင်းသည် အိုဆင်မန်၏ခြေစွမ်းကို မယုံရဲသဖြင့် ခေါ်ယူရန် လက်တွန့်ခဲ့ပြီး ယခုအခါ ဂါလာတာစာရေးတွင် ပြသနေသည့် ခြေစွမ်းကြောင့် ၎င်းကိုခေါ်ယူရန် ပြန်လည်စိတ်ဝင်စားလာခြင်းဖြစ်ကြောင်း သိရသည်။

PSG အသင်းအနေဖြင့် အိုဆင်မန်ကို ခေါ်ယူနိုင်ရန်အတွက် ကစားသမားအပြင် မိခင်ကလပ်ဖြစ်သည့် နာပိုလီ၊ အငှားကစားနေသည့် ဂါလာတာစာရေးအသင်းတို့နှင့် ဆွေးနွေးရမည်ဖြစ်ရာ အပြောင်းအရွှေ့မှာ ထင်သလောက် လွယ်ကူမည်မဟုတ်ကြောင်း RMC Sport က ဖော်ပြခဲ့သည်။

ထို့ပြင် ချယ်လ်ဆီးအသင်းကလည်း အိုဆင်မန်အား ခေါ်ယူရန်ပြင်ဆင်နေရာ PSG အတွက် ခက်ခဲဖွယ်ရှိကြောင်း သိရသည်။

PSG အသင်းသည် မူအာနီကို ရောင်းထုတ်ပြီး အိုဆင်မန်ဖြင့် အစားထိုးလိုနေခြင်းဖြစ်သည်။